Ku munsi w'ejo ni bwo Espagne yasanze Portugal ku mukino wa nyuma wa UEFA Nations League isezereye u Bufaransa muri 1/2 ku bitego 5-4. Nyuma y'uyu mukino, Kylian Mbappé yikomye umusifuzi avuga ko ataretse ngo bakine iminota yose yari yongeweho.
Yagize ati: "Ntabwo nemeranya n'umusifuzi ku byerekeye igihe cyongeweho, ariko ndamutse mbivuze, bazatekereza ko ari ukubabara. Iyo baguhaye iminota itanu, ugomba gukina iminota itanu".
Yavuze ko muri uyu mukino batagize uguhozaho dore ko iyo babaga bari mu bihe byabo bakinaga neza. Yagize ati: "Iyo twari mu bihe byacu by'ako kanya , navuga ko twakinnye neza. Twari dufite gukina twiruka ariko ntabwo byabayeho igihe kinini. Twagize iminota 10 mibi mu gice cya mbere maze dutsindwa ibitego bibiri, kandi ni nako byagenze mu gice cya kabiri. Ntabwo twahojejeho mu minota 90".
Kapiteni w'ikipe y'igihugu y'u Bufaransa abajijwe ku bijyanye no kuba ubwugarizi umutoza yababanjemo ataba ari bwo bwabateye gutsindwa kubera ko ari bushya, yavuze ko ibyo atari urwitwazo. Yagize ati: "Ntabwo ari urwitwazo; turi abakinnyi bakuru. Ariko ntabwo byose byari bibi. Turababaye, ni byo rwose turarakaye".
Espagne izakina na Portugal ku mukino wa nyuma wa UEFA Nations League ku Cyumweru, tariki ya 8 Kamena 2025 Saa Tatu z’ijoro.