Mu kiganiro na inyaRwanda, Alicia na Germaine [Alicia Ufitimana na Germaine Ufitimana] bagaragaje ko Kwibuka ari umwanya wo guha agaciro abazize Jenoside yakorewe Abatutsi mu 1994, no gukomeza urugendo rwo kubaka ejo hazaza heza.
Bashimangiye ko abambuwe ubuzima muri Jenoside yakorewe Abatutsi, batagomba kuzima mu mitima y’Abanyarwanda, ahubwo ko ari inshingano z’abasigaye gukomeza kubazirikana no kubakira ku mateka igihugu cyifuzwa.
By’umwihariko, aba bakobwa bagezweho mu muziki wo kuramya no guhimbaza Imana basabye urubyiruko kudacika intege, ahubwo rukagira uruhare rugaragara mu kubaka u Rwanda rushya rufite icyerekezo cyiza.
Alicia na Germaine bati: "Rubyiruko, twe kuba gito, ahubwo dukure isomo ku hashize hacu hasharira, twubaka u Rwanda rwifuzwa. Twimakaze ubudaheranwa ndetse turwanye ingengabitekerezo ya Jenoside".
Bagaragaje ko Kwibuka atari ugusubira mu mateka hagamijwe inzika, ahubwo ari inzira yo gusubiza agaciro abambuwe ubuzima bwabo bazira uko baremwe, no gukomeza kubaka igihugu kirangwa n’amahoro arambye. Bati: "Kwibuka ntabwo ari inzika ahubwo ni ugusubiza agaciro abakambuwe bazira uko Imana yabaremye".
Aba bahanzikazi baherutse kwandika amateka yo gutaramira bwa mbere muri BK Arena mu gitaramo "Easter Jubilee" cya Ben na Chance, bashimangiye ko buri Munyarwanda afite inshingano yo guca burundu icyo ari cyo cyose cyasubiza igihugu inyuma, cyane cyane ingengabitekerezo ya Jenoside, anamagana abagerageza kuyihakana cyangwa kuyipfobya.
Mu gusoza ubutumwa bwabo, Alicia na Germaine bongeye kwibutsa Abanyarwanda ko u Rwanda rudakwiye kongera kunyura mu mateka mabi nk’ayo rwanyuzemo, basubiramo amagambo aherutse kuvugwa na Perezida Kagame bati: “U Rwanda ntirwapfa kabiri.”
Aba bakobwa batuye i Rubavu, bakaba ari abakristo muri ADEPR, bagize bati: "Duce buri mugozi udukururira gusubira mu bihe bibi igihugu cyacu cyanyuzemo, twamagane abahakana bakanapfobya Jenoside yakorewe Abatutsi mu 1994. U Rwanda ntirwapfa kabiri."
Alicia na Germaine barasaba urubyiruko kutaba gito ahubwo bagahagurukira kurwanya ingengabitekerezo ya Jenoside