Umuhanzi mu muziki wo kuramya no guhimbaza Imana, Rugamba Erneste utuye i Washington, DC, muri Leta Zunze Ubumwe za Amerika, yagaragaje ko muri ibi bihe byo #Kwibuka32, ubutumwa bwe bwibanda ku kuri, ubumwe n’icyizere cy’ejo hazaza, anashimangira uruhare rukomeye rw’urubyiruko mu kubaka sosiyete nyarwanda.
Uyu muhanzi uzwi mu ndirimbo y'ihumure yise "Hari Imana", yakomeje agaragaza ko urubyiruko rw’iki gihe rufite imbaraga zidasanzwe, cyane cyane binyuze ku mbuga nkoranyambaga n’ikoranabuhanga rigezweho, bituma ruba umuyoboro ukomeye mu gukwirakwiza ibitekerezo bigira ingaruka ku muryango nyarwanda.
Ati: "Uyu munsi, urubyiruko rufite uruhare rukomeye mu kubaka sosiyete nyarwanda binyuze ku mbuga nkoranyambaga n’ikoranabuhanga rigezweho. Ibi bituma ruba umuyoboro ukomeye mu gukwirakwiza ibitekerezo bifite ingaruka ku muryango nyarwanda."
Yasabye urubyiruko, by’umwihariko abahanzi n’abakora ibijyanye no gutunganya ibiri ku mbuga nkoranyambaga (content creators), gukoresha neza ayo mahirwe bafite, bagatanga ubutumwa bwubaka sosiyete, bushishikariza amahoro, ubumwe n’ubwiyunge, ndetse bukarwanya amacakubiri.
Yagize ati: "Ni yo mpamvu ari ingenzi ko urubyiruko, cyane cyane abahanzi n’aba 'content creators', rukoresha neza ayo mahirwe rugatanga ubutumwa bwubaka, bushishikariza amahoro, ubumwe n’ubwiyunge, kandi burwanya amacakubiri."
Mu kiganiro yagiranye na InyaRwanda, Rugamba yakomeje agaragaza ko urubyiruko rukwiye kwigira ku ngabo zahoze ari iza RPA zabohoye igihugu kandi bari bakiri bato, zikanahagarika Jenoside yakorewe Abatutsi mu 1994, zikaba zaragaragaje ko ubufatanye n’urukundo bakunda igihugu bishobora guhindura amateka.
Ati: "Nk’urubyiruko rwa none, dukwiye kwigira ku rugero rw’ababohoye igihugu bakiri bato, bagaragaje ko guhuza imbaraga n’umutima ukunda igihugu bishobora guhindura amateka. Iyi 'spirit' ikwiye kudushishikariza gukomeza kubaka igihugu no guhesha ishema izina ry’u Rwanda, haba imbere mu gihugu no hanze yacyo."
Ku bijyanye n’uruhare rwe bwite mu kwimakaza ubudaheranwa no kurwanya ingengabitekerezo ya Jenoside, Rugamba Erneste yavuze ko buri wese, cyane cyane urubyiruko, afite inshingano ikomeye muri uru rugamba. Ati: "Ntekereza ko buri wese, cyane cyane urubyiruko, afite uruhare rukomeye mu kwimakaza ubudaheranwa no kurwanya ingengabitekerezo ya Jenoside."
Yakomeje asobanura ko mu isi y’ikoranabuhanga ryihuta aho ubutumwa bugera kuri benshi mu gihe gito, "dufite inshingano yo gukoresha neza ayo mahirwe tugatanga ubutumwa bwubaka, bushishikariza ubumwe, kandi burinda amateka yacu."
Yongeyeho ko uruhare rwe ari ugukangurira abantu kuba abarinzi b’ukuri, bagaharanira kubana mu mahoro n’ubwiyunge, ndetse no kwamagana ingengabitekerezo ya Jenoside aho igaragara hose.
Ati: "Uruhare rwanjye ni ugukangurira abantu kuba abarinzi b’ukuri, bagaharanira ubumwe no kubana mu mahoro n’ubwiyunge, no kwamagana ingengabitekerezo ya Jenoside aho igaragara hose."
Yanashimangiye akamaro ko guhuza imbaraga z’urubyiruko, cyane cyane abahanzi n’aba content creators, "ni ingenzi, kugira ngo ubutumwa bugere kuri benshi, bukagira uruhare mu kubaka sosiyete ifite indangagaciro z’ubumuntu, ubumwe n’amahoro arambye."
Mu gusoza, Rugamba yasize ubutumwa bwibutsa buri Munyarwanda inshingano afite mu kurinda amateka no kubaka ejo hazaza heza h’igihugu. Yagize ati: "Twese nk’Abanyarwanda turi abarinzi b’amateka yacu, kandi dufite inshingano yo kurinda ejo hazaza."
"Twese nk’Abanyarwanda turi abarinzi b’amateka yacu, kandi dufite inshingano yo kurinda ejo hazaza." Rugamba Erneste
Rugamba Erneste arakangurira abantu bose kuba abarinzi b’ukuri, bagaharanira ubumwe no kubana mu mahoro n’ubwiyunge, no kwamagana ingengabitekerezo ya Jenoside aho igaragara hose
Rugamba Erneste arasaba urubyiruko cyane cyane abahanzi n’aba 'content creators', gukoresha neza amahirwe bahabwa n'igihugu bagatanga ubutumwa bwubaka