Mu kiganiro na inyaRwanda, Pastor Dr. Ian Tumusime, yatangiriye ku kwifatanya n’Abanyarwanda muri ibi bihe bikomeye byo #Kwibuka32, agaragaza ko nubwo ari ibihe byibutsa amateka asharira, bikwiye gufatwa nk’umwanya wo kuzirikana no guhumurizanya.
Yagize ati: “Muri ibi bihe bikomeye turimo, twibuka Jenoside yakorewe Abatutsi mu 1994, umutima wanjye uri kumwe namwe. Nzi ko iyi minsi yongera gufungura ibikomere byimbitse. Amarira, kwibuka n’imva bikivuga — ntibyibagiranye. Ububabare mufite burumvikana kandi bufite agaciro gakomeye.”
Uyu mushumba yakomeje agaragaza ko nubwo amateka u Rwanda rwanyuzemo ababaje cyane, hari impamvu yo gukomeza kugira icyizere, ashimangira ko igihugu cyabashije kongera kwiyubaka.
Yagize ati: “Ariko no muri uyu mubabaro, ndashaka kubabwira ubuzima: Muracyariho. U Rwanda ruracyariho. Nyuma y’umwijima utavugwa, ntimwazimye. Ntimwakomeje kubaho nabi. Mufite amaboko ahinda umushyitsi n’amaso yuzuye amarira, mwarahagurutse. Mu ivu ry’urupfu, mwongeye kubaka ingo zirimo ibyishimo, abana bongeye kurota kwiga, n’igihugu cyanze gusobanurwa n’urwango.”
Yakomeje agaragaza ko amahitamo Abanyarwanda bafashe yo kubabarira no kwiyunga ari igihamya gikomeye cy’imbaraga z’Imana, ati: “Mwahisemo kubabarira mu gihe kwihorera byari byoroshye".
"Mwahisemo ubumwe mu gihe amacakubiri yari yaramunze u Rwanda [kubera ubuyobozi bubi bwakoze Jenoside yakorewe Abatutsi mu 1994]. Mwahisemo ubuzima mu gihe urupfu rwari rwatwaye byinshi. Uwo mutima si uw’abantu gusa — ni imbaraga n’umwuka w’Imana ubakomeza.”
Mu butumwa bwe, Pastor Dr. Ian Tumusime yasabiye Abanyarwanda by’umwihariko abarokotse Jenoside yakorewe Abatutsi mu 1994 n’abafite ibikomere byo mu mutima gukira no guhumurizwa n’Imana, avuga ati: “Uyu munsi ndasenga ngo buri mutima wakomeretse wumve amaboko y’Imana awugose;
Buri mubyeyi urira nijoro, buri mugabo ubitse ububabare mu mutima, buri rubyiruko ruhangayikishijwe n’inkuru rwumvise, n’inshuti zose zihagaze ku ruhande rw’u Rwanda. Imana ibona amarira yose, ibegere kurusha mbere hose.”
Yongeye gushimangira ko amateka y’u Rwanda atarangiye, kandi ko Imana ikomeje kugendana narwo mu rugendo rwo gukira no kubaka ejo hazaza heza, ati: “Amateka yanyu ntararangira. Imana yagendanye namwe mu gicucu cy’urupfu iracyari kumwe namwe ubu, ihindura icyunamo imbaraga n’ibikomere ikabigira ubuhamya buzahumura isi n’ibisekuru bizaza.”
Mu gusoza, Pastor Dr. Ian Tumusime yasabiye u Rwanda gukomeza kuba urumuri ku Isi yose, ashimangira ko ari igihugu cy’igitangaza cyuzuyemo ubudaheranwa, kubabarira, ubwiyunge n’icyizere kidacogora.
Yagize ati: “Imana yomore ibyo ukuboko k'umuntu kutakora. Igarure imyaka yibwe, isane inzozi zangijwe, kandi ishyire ibyiringiro bishya mu mitima yanyu. U Rwanda rukomeze kuzamuka nk’igitangaza kizima — urumuri rw’ubudaheranwa, kubabarira, ubwiyunge n’icyizere ku Isi yose. Ntimuri ibyo mwakorewe, muri abana b’Imana ikomeye, kandi muri abanditsi b’igice gishya cyiza cy’amateka yanyu.”
Yasoje ubutumwa bwe agaragaza urukundo, icyubahiro n’amasengesho byinshi afitiye Abanyarwanda.
