Iki
gikorwa cyateguwe binyuze mu Ishuri ry’Inshuke Ecole Maternelle Fondation
Ndayisaba Fabrice ku bufatanye n’Akarere ka Nyabihu, kikaba ari ku nshuro ya
gatatu kibaye muri aka Karere. Cyitabiriwe n’abanyeshuri bo mu mashuri
y’inshuke, abanza, ayisumbuye ndetse n’ay’imyuga n’ubumenyingiro, hamwe
n’abarezi babo.
Hanagaragayemo
kandi ubuyobozi bw’Akarere ka Nyabihu, Komite ya IBUKA ku rwego rw’Akarere
n’imirenge, Abanyamabanga Nshingwabikorwa b’imirenge ndetse n’abagenzuzi
b’uburezi, bose bafatanya mu kwibuka no guha icyubahiro abana n’impinja bazize
Jenoside.
Mu
gutangiza ku mugaragaro iki gikorwa, Umuyobozi w’Akarere ka Nyabihu Wungirije
ushinzwe imibereho myiza y’abaturage, Simpenzwe Pascal, yasabye ko abana
batozwa indangagaciro nziza bakiri bato kugira ngo bakure bazi ukuri kw’amateka
y’igihugu cyabo, anagaragaza ko igihugu kigihanganye n’ingaruka za Jenoside
zirimo ihakana n’ipfobya.
Yagize
ati: “Icyo nemera ni uko kwereka umwana inzira nziza akiri muto bimufasha
kutayoba, kudahuzagurika mu buzima bwe bwose.”
Abanyeshuri
bitabiriye iki gikorwa basobanuriwe akamaro ko Kwibuka, gahunda ya “Ndi
Umunyarwanda” ndetse n’indangagaciro z’ubumwe n’ubudaheranwa nk’ishingiro
ry’iterambere ry’igihugu.
Umuyobozi
w’ishuri ryateguye iki gikorwa, Ndayisaba Fabrice, yavuze ko kigamije gutoza
abana n’urubyiruko umuco wo kwibuka Jenoside yakorewe Abatutsi, kubarinda
ingengabitekerezo yayo no kubafasha gukurana indangagaciro z’ubumuntu, urukundo
rw’igihugu n’umuco w’ubwiyunge.
Yagaragaje
kandi ko kwibuka abana n’impinja bikorwa mu buryo bujyanye n’imyaka
y’abanyeshuri, hifashishijwe imikino, imyidagaduro n’ubutumwa bwubaka.
Ndayisaba
Fabrice yabwiye InyaRwanda ko bifuza ko iki gikorwa cyajya kibera mu Ntara y’Amajyaruguru yose.
Ati: “Mu minsi ishize nagiranye ibiganiro na Guverineri Mugabowagahunde Maurice,
kandi kimwe mu byo byaganiriyeho harimo no gutegura iki gikorwa cyo kwibuka abana
n’ibibondo kikagera mu Ntara yose y’Amajyaruguru, kuko niyo ntego twihaye.
Yavuze
kandi ko bifuza ko iki gikorwa kizagera mu Ntara zose. Ati “Ikifuzo n’uko iki
gikorwa cyakorwa mu gihugu hose kuko ubu Nyabihu ni umwaka wa Gatatu
ngitegurayo.”
Ndayisaba
Fabrice yashimye kandi Perezida Paul Kagame, inzego z’umutekano n’abandi ku bw’uruhare
rwabo mu migendekere myiza y’iki gikorwa cyo kwibuka, no kurwanya
ingengabitekerezo ya Jenoside aho iva ikagera.
Ati: “Ndashimira Nyakubahwa Perezida Paul Kagame uruhare rwe mu guteza imbere u
Rwanda n' abanyarwanda, ndashimira Ingabo z'igihugu, Polisi y'igihugu, Urwego
rw’Igihugu rw’Ubugenzacyaha (RIB), Umuryango Ibuka, Akarere ka Nyabihu,
Minisiteri y’Ubumwe bw’Abanyarwanda n’inshinganomboneragihugu, Minisiteri
y'uburezi, uruhare rwabo rukomeye bagira mu gukomeza kurwanya ingengabitekerezo
ya Jenoside no kubaka ubumwe bw'abanyarwanda.”
Hatanzwe
kandi ubutumwa bwo guhumuriza abarokotse Jenoside, by’umwihariko ababyeyi
babuze abana babo n’abana babuze ababyeyi, basabwa gukomera no gukomeza kwizera
ko igihugu kibari hafi kandi kibitayeho.
Abateguye iki gikorwa banashimangiye ko Kwibuka bigomba guhora bigaruka nk’inzira yo kubaka u Rwanda rushingiye ku kuri, ubumwe n’ubworoherane, basoza bagira bati: “Rwanda impore, komera, abana bawe ntituzatuma usubira mu mwijima ukundi.”
Guverineri
w'Intara y'Amajyaruguru, Mugabowagahunde Maurice yaganiriye na Ndayisaba Fabrice ku itegurwa ry'igikorwa cyo kwibuka abana n'impinja, kikajya kibera buri mwaka mu Ntara y'Amajyaruguru
Amashuri arenga 115 yahuriye muri Nyabihu mu gikorwa cyo kwibuka abana n’impinja bazize Jenoside yakorewe Abatutsi, hibandwa ku kubaka ubumwe n’ukuri kw’amateka
Muri Nyabihu habereye igikorwa cy’isanamitima n’inyigisho ku rubyiruko, hibukwa abana n’impinja bazize Jenoside yakorewe Abatutsi mu 1994
Kwibuka binyuze mu mikino n’ubutumwa bwubaka: amashuri yo muri Nyabihu yibutse abana n’impinja bazize Jenoside, asabwa gukura azi amateka y’igihugu
Abayobozi, abarimu n’abanyeshuri bahuriye mu Nyabihu mu gikorwa cyo Kwibuka kigamije kurwanya ingengabitekerezo no gushimangira “Ndi Umunyarwanda”
“Rwanda impore” mu Nyabihu: ubutumwa bwo guhumuriza no gukomeza abarokotse Jenoside mu gikorwa cyitabiriwe n’amashuri arenga 115
