Mu
kiganiro na InyaRwanda, Nkomezi yavuze ko Kwibuka Jenoside yakorewe Abatutsi mu 1994 bikwiye kujyana no kuzirikana ko Jenoside itazongera kubaho ukundi.
Ati: “Muri ibi bihe byo kwibuka ku nshuro ya 32 Jenoside yakorewe Abatutsi mu
1994, ubutumwa natanga ni ukwibuka, twiyubaka, tukazirikana amateka yacu kugira
ngo bitazongera ukundi. Urubyiruko ndarusaba gufata iya mbere mu kubaka u
Rwanda ruzira urwango n’amacakubiri, bagaharanira ukuri, urukundo n’ubumwe."
Nkomezi,
nk’umuhanzi w’indirimbo za ‘Gospel’, yongeraho ko urukundo rw’Imana ari rwo
shingiro rufasha abantu gukira ibikomere byo mu mitima no kubana mu mahoro.
Ati: “Nk’umuhanzi wa ‘Gospel’, nemera ko urukundo rw’Imana ruduhuza rukadufasha
gukira ibikomere, kandi rukatwigisha kubabarira no kubana mu mahoro. Twese
dufite inshingano yo kuba umucyo n’umunyu w’isi, dukwirakwiza amahoro aho turi
hose."
Ubwo
yabazwaga ku ruhare rwe mu guhangana n’ingengabitekerezo ya Jenoside, Nkomezi
yagaragaje ko yifashisha impano Imana yamuhaye mu gukangurira abantu icyizere,
ubumwe n’amahoro.
Yagize
ati: "Niyemeje gukoresha impano Imana yampaye mu kwamamaza ubutumwa
bw’icyizere, amahoro n’ubumwe binyuze mu ndirimbo n’ibindi bikorwa by’ubuhanzi.
Indirimbo zanjye ziba zigamije gukomeza imitima y’abarokotse Jenoside, no
kwigisha abantu bose agaciro ko kubaha ubuzima n’ubumuntu."
Nkomezi
uri kubarizwa muri Leta Zunze Ubumwe za Amerika muri iki gihe, akomeza avuga ko
urubyiruko rugomba kugira uruhare rugaragara mu kurwanya amagambo n’ibikorwa
byatanya Abanyarwanda.
Ati: “Nzahora nanakangurira urubyiruko kwirinda amagambo n’ibikorwa byatanya
Abanyarwanda, ahubwo bagaharanira kubaka igihugu gishingiye ku kuri n’urukundo.
Nizera ko binyuze mu buhanzi, dushobora gufasha benshi guhindura imyumvire,
tukubaka ejo hazaza heza h’u Rwanda.”
Ubwo
u Rwanda rwibuka ku nshuro ya 32 Jenoside yakorewe Abatutsi, ubutumwa nk’ubu
bwa Nkomezi buributsa buri wese ko kwibuka ari intambwe y’ingenzi mu kubaka
igihugu kirangwa n’ubumwe, urukundo n’amahoro.
By’umwihariko,
urubyiruko rurahamagarirwa kwigira ku mateka, kwirinda amakimbirane, no
guharanira iterambere rishingiye ku kuri n’ubumuntu.
Abahanzi
bo mu muziki wa Gospel, nka Prosper Nkomezi, bakoresha indirimbo zabo
n’ibikorwa byabo mu gusigasira ubutumwa bw’ukuri, urukundo, amahoro n’ubumwe.
Indirimbo
zabo zifasha abarokotse Jenoside yakorewe Abatutsi gukira ibikomere no gukangurira urubyiruko
kwiga amateka y’igihugu, bityo bagaharanira ejo hazaza hatarimo urwango cyangwa
amacakubiri.
Kwibuka,
kwiyubaka no gukunda igihugu bisaba uruhare rwa buri wese, ariko cyane cyane
urubyiruko, nk’uko Nkomezi abigaragaza mu butumwa bwe.
Nkomezi
yerekana ko urukundo rw’Imana, ubuhanzi n’ubumwe bishobora gufasha igihugu
cyose gukira no gutera imbere.
Prosper Nkomezi yiyemeje gukoresha impano y’indirimbo ze mu gusakaza ubutumwa
bw’icyizere, urukundo n’amahoro mu Rwanda, cyane cyane mu rubyiruko