Ubuhamya bwatanzwe na bamwe barokotse Jenoside yakorewe Abatutsi mu 1994, bari bahungiye kuri paruwasi ya Mukarange mu karere ka Kayonza, bashimye uburyo uwari Padiri mukuru wa Paruwasi Gatolika ya Mukarange yanze kwitandukanya n'Abatutsi biciwe kuri Paruwasi yari ayoboye.
Mbere yo kwica abari bahungiye kuri Paruwasi Mukarange, Padiri Munyaneza Bosco yasabwe kwitandukanya n'abatutsi bamuhungiyeho, aranga agahitamo gupfana nabo aho kwitandukanya nabo.
Mudaheranwa Audace wari uhagarariye Ibuka mu gikorwa cyo kwibuka abazize Jenoside yakorewe Abatutsi mu 1994, no gushyingura mu cyubahiro imibiri 7 yabonetse mu mirenge itatu yo karere ka Kayonza, yasabye abanyarwanda kurwanya ingangabitekerezo ya Jenoside no guharanira gusigasira Ubumwe bw'Abanyarwanda.
Yanashimye Inkotanyi zagize ubutwari bwo kwitanga mu rugamba rwo guhagarika Jenoside yakorewe Abatutsi mu 1994. Ati" Turashimira Inkotanyi zitanze zigahagarika Jenoside yakorewe Abatutsi mu 1994. Inkotanyi zaritanze ndetse bamwe muri bo bemera kuhasiga ubuzima."
Senateri Bideri John Bonds, yasabye abafite amakuru y'ahantu hari imibiri y'abazize Jenoside yakorewe Abatutsi mu 1994 kuyatanga kugira ngo ishyingurwe mu cyubahiro.
Yagize ati: "Dushyinguye mu cyubahiro imibiri 7 yabonetse mu mirenge itatu yo mu Karere ka Kayonza. Nk'uko twabibwiwe, umwe muri iyi mibiri bawusanze mu murima ahantu bahingaga buri gihe.
Birababaje kubona ahantu bahisha amakuru ntibayatange nyuma y'imyaka 29 hakaba hari imibiri y'abishwe muri Jenoside yakorewe Abatutsi mu 1994 itaraboneka kugira ngo ishyingurwe mu cyubahiro."
Senateri Bideri yakomeje ati: "Mu ijambo navuze, nakomeje gushishikariza abanyarwanda aho bari hose gutanga amakuru ku hantu hakiri imibiri y'Abatutsi bishwe muri Jenoside, itarashyingurwa kugira ngo abavandimwe babuze imibiri yabo bayibone bayishyingure mu cyubahiro. Gutanga ayo makuru ni ikintu cy'ingenzi mu kubaka Ubumwe bw'Abanyarwanda."
Senateri Bideri yanavuze ko Padiri Munyaneza Bosco wasabwe kwitandukanya n'abatutsi bamuhungiyeho ariko akabyanga, ibyo yakoze ari ibikorwa cy'ubutwari byo gushimwa.
Ati: "Padiri Bosiko wahoze ari umupadiri kuri Paruwasi Mukarange, mu gihe abicanyi bahigaga Abatutsi bari kuri paruwasi kugira ngo babice, bamusabye kwitandukanya nabo kuko atahigwaga ariko avuga ko atasiga intama z'Imana nawe bahita bamwica."
Senateri Bideri yunzemo ati "Birumvikana ko yabaye intwari atanga ubuzima bwe yashoboraga kuba yarabukijije iyo yitandukanya nabo, ariko ntiyabikoze kuko yari afite umutima wa kimuntu.
Nk'uko mwabyiyumviye mu buhamya bwatanzwe, ni uko Padiri Munyaneza yabaye intwari kubera ko yabaye hafi y'abamuhungiyeho, bigatuma n'ubuzima bwe abutakaza."
Urwibutso rwa Jenoside yakorewe Abatutsi mu 1994 rwa Mukarange, rwari rusanzwe rushyinguyemo imibiri y'Abatutsi 8.732, hiyongereyeho indi mibiri y'abantu 7 bazize Jenoside yakorewe Abatutsi mu 1994, ubu rukaba rushyinguyemo imibiri 8.739 y'abazize Jenoside yakorewe Abatutsi mu 1994.
Bashyinguye mu cyubahiro imibiri 7 y'abazize Jenoside yakorewe Abatutsi mu 1994