Kuva kuri ‘Ngwino Maman’ kugeza kuri ‘Nguhorane’: Urugendo rushya rw’Ibihangange -VIDEO

Mu rugendo rwaryo rwa muzika, Ibihangange bagiye bakorana n’abandi bahanzi mu bihangano bitandukanye birimo ‘Ngwino Maman’ na Ruti Joel, ‘Nimuberwe Bakobwa’ na Butera Knowless, n’ibindi byagiye bifasha iri torero kurushaho kumenyekana no kugeza umuziki gakondo ku bawukunda.

Nubwo gukorana n’abandi bahanzi ari imwe mu nzira iri torero rikomeje guha agaciro, kuri iyi nshuro ryahisemo gufata iya mbere mu gukora igihangano cyaryo bwite, kuva mu ntangiriro kugeza ku musozo, kugira ngo rigaragaze neza icyo rifite cyo kugeza ku bakunzi b’umuziki Nyarwanda.

Mu kiganiro na InyaRwanda, abagize Itorero Ibihangange basobanuye ko ‘Nguhorane’ ari intambwe nshya mu rugendo rwabo, kuko nyuma y'ibihangano bakoze bafatanyije n’abandi bahanzi, bahisemo kugeza ku bakunzi babo indirimbo bihangiye ubwabo.

Umuyobozi w’Itorero Ibihangange Kitoko yabwiye InyaRwanda ati “Nguhorane ni igihangano kigaragaza intambwe nshya mu rugendo rwacu nk’Ibihangange. Nyuma yo gukora indirimbo zirimo ‘Ngwino Maman’ na Ruti Joel ndetse na ‘Nimuberwe Bakobwa’ na Butera, twahisemo kugeza ku bakunzi b’umuziki gakondo indirimbo yacu bwite, twakoze twe ubwacu.

Akomeza ati “Ibi ariko ntibivuze ko tutazongera gukorana n’abandi bahanzi, kuko tuzakomeza ubufatanye na bo. Icyakora, kuri iyi nshuro twahisemo kwikorana kugira ngo tugaragaze umwihariko wacu no gutanga umusanzu wacu mu muziki Nyarwanda.”

Basobanuye ko bahisemo gukora ‘Nguhorane’ mu rwego rwo kurushaho kugaragaza ubushobozi bwabo mu guhanga, ariko by'umwihariko bakerekana ijwi ryabo nk’Itorero rifite intego yo kugira uruhare mu iterambere ry’umuziki gakondo.

Kuri bo, iyi ndirimbo ifite igisobanuro kirenze kuba igihangano gisanzwe, kuko ihagarariye icyemezo bafashe cyo gutera indi ntambwe mu buhanzi bwabo, bakagaragariza abakunzi babo ibyo bashoboye guhanga batagendeye gusa ku bufatanye n’abandi.

Uretse kuba ari igihangano cyabo bwite, ‘Nguhorane’ inafite ubutumwa bushingiye ku rukundo, ariko Itorero Ibihangange rigaragaza ko ritagarukiye ku rukundo ruba hagati y’umusore n’umukobwa.

Iri torero risobanura ko ubutumwa buri muri iyi ndirimbo bushobora kumvikana mu buryo butandukanye bitewe n’uwuyumva, kuko rivuga ku rukundo umuntu ashobora gukunda uwo bakundana, inshuti ye cyangwa umuvandimwe we.

Ni ukuvuga ko ‘Nguhorane’ atari indirimbo igenewe gusa abantu bari mu rukundo rw’abakundana, ahubwo ari igihangano gishobora no guherekeza amarangamutima y’urukundo abantu bagirira abo bafitanye isano cyangwa ubucuti.

Abagize Itorero Ibihangange bavuga ko bahisemo ubu butumwa kugira ngo indirimbo yabo igere ku bantu benshi, buri wese abashe kuyisanisha n’urukundo afite mu buzima bwe.

Mu gihe umuziki gakondo ukomeje guhabwa umwanya mu ruganda rw’imyidagaduro Nyarwanda, ibikorwa nk’ibi by’Itorero Ibihangange bigaragaza ubushake bw’abahanzi mu gukomeza kuwagura, kuwuhanga no kuwugeza ku bisekuru bitandukanye.

‘Nguhorane’ ni intambwe iri torero ryishimira, kuko ryiyemeje kudahagararira gusa ku guherekeza ibihangano by’abandi, ahubwo rikagira uruhare mu kubyara ibihangano byaryo bwite, bigaragaza umwihariko n'ubutumwa ryifuza kugeza ku bakunzi b’umuziki Nyarwanda.

Itorero Ibihangange ryasohoye ‘Nguhorane’, indirimbo nshya rifata nk’intambwe ikomeye mu rugendo rwo kwihangira ibihangano no kugaragaza umwihariko waryo mu muziki gakondo Nyarwanda

Nyuma yo gukorana n’abahanzi barimo Ruti Joel na Butera mu ndirimbo zitandukanye, Ibihangange byahisemo gukora ‘Nguhorane’ byonyine, nubwo byemeza ko ubufatanye n’abandi bahanzi buzakomeza

KANDA HANO UBASHE KUREBA INDIRIMBO ‘NGUHORANE’ Y’ITOREROIBIHANGANGE