Kuva kuri Miss Jolly kugera kuri Alliah Cool: Abagore bagaragaje

Mu minsi ishize, kongera kugaragara kw'imodoka nshya z'aba bagore byongeye gutuma abantu babiganiraho cyane ku mbuga nkoranyambaga, bamwe babifata nk'ubuhamya bw'iterambere, abandi bakabibonamo uburyo bwo kwerekana ubuzima bwiza bagezeho.

1.Miss Muyango yongeye kuvugisha benshi nyuma yo kugura Mercedes-Benz GLC 300

Ku wa 21 Nyakanga 2026, Miss Photogenic wa Miss Rwanda 2019, Muyango Claudine, yerekanye imodoka nshya yo mu bwoko bwa Mercedes-Benz GLC 300 yo mu mwaka wa 2022, anayambika plaque yihariye iriho amazina ye.

Ni imwe mu modoka zo mu rwego rwa "luxury SUV" zikunzwe kubera ubwiza, umutekano n'ikoranabuhanga rigezweho. Ku masoko mpuzamahanga, igiciro cyayo kiri hagati ya miliyoni 45 Frw na miliyoni 60 Frw, bitewe n'imiterere yayo ndetse n'ibiyigize.

Ikindi cyakurikiyeho ni uko yayandikishije plaque iriho amazina ye, igikorwa gisaba kwishyura miliyoni 2 Frw mu Rwanda, uretse andi mafaranga ajyanye no kuyinjiza no kuyandikisha.

2.Miss Mutesi Jolly yigaruriye imitima ya benshi nyuma yo kugura G-Wagon

Mu Ukwakira 2025, Miss Mutesi Jolly, wabaye Miss Rwanda 2016, yerekanye Mercedes-AMG G 63 (G-Wagon) yo mu mwaka wa 2025, imwe mu modoka zihenze kandi zikunzwe n'ibyamamare ku Isi.

Agaciro kayo kari hagati ya miliyoni 359 Frw na miliyoni zisaga 400 Frw.

Ifite moteri ya V8 Twin Turbo itanga ‘horsepower’ 585 na torque ya 850 Nm, ibintu bituma iva ku muvuduko wa 0 kugeza kuri 100 km/h mu masegonda 4.4 gusa.

Ni imodoka izwiho guhuza uburanga, imbaraga ndetse n'ubushobozi bwo kunyura mu mihanda yose, ari yo mpamvu ikomeje kuba ikimenyetso cy'ubukire ku bayitunze.

3.Alliah Cool yazamuye impaka kubera G-Class yambaye plaque ya RDC

Ku wa 16 Ukwakira 2025, Alliah Cool na we yerekanye Mercedes-Benz G-Class (G-Wagen) ifite agaciro karenga miliyoni 200 Frw.

Icyakurikiyeho si agaciro kayo gusa, ahubwo ni uko yari yambaye plaque yo muri Repubulika Iharanira Demokarasi ya Congo (RDC), ibintu byateje impaka nyinshi ku mbuga nkoranyambaga.

Mu gusubiza abamunengaga, yavuze ko gukoresha plaque ya RDC bidakuraho agaciro k'imodoka, anashimangira ko yubaha igihugu cye cy'amavuko ndetse anashimira M23 ku ruhare yavuze ko yagize mu gutuma bamwe basubira kuba muri RDC.

Aya magambo ye yakomeje kugibwaho impaka mu gihe kirekire.

4.Isimbi Model yagiye ava kuri Evoque agera kuri Velar

Mu banyamideli b'Abanyarwandakazi, Isimbi Vestine, uzwi nka Isimbi Model, ni umwe mu bamaze imyaka bagaragaza ubuzima buhenze.

Mu mpera za 2022, umugabo we Shaul Hatzir yamuhaye impano ya Range Rover Evoque ifite agaciro ka miliyoni zisaga 46 Frw.

Nyuma y'imyaka itatu, mu Ukwakira 2025, yongeye kumuha indi modoka yo mu bwoko bwa Range Rover Velar, ifite agaciro karenga miliyoni 89 Frw.

Ubwo yayerekanaga, Isimbi yavuze ko yari amaze igihe kirekire ayirota, ashimangira ko atari impano isanzwe ahubwo ko yamukoze ku mutima kubera urukundo n'uburyo umugabo we yitaye ku byifuzo bye.

5.Niragire Marie France yinjiye mu batunze G-Class

Umukinnyi wa filime Niragire Marie France na we ari mu bagore bafite imodoka zihenze mu Rwanda nyuma yo kugura Mercedes-Benz G-Class ifite agaciro karenga miliyoni 150 Frw.

Uyu mukinnyi wa filime umaze imyaka irenga 18 mu ruganda rwa sinema nyarwanda, yakomeje guhuza ibikorwa byo gukina filime no kuyobora televiziyo ye bwite yise ‘Genesis Tv’.

G-Class ye iri mu modoka zikunzwe cyane ku Isi kubera ubushobozi bwo kugenda mu mihanda yose, ubwiza n'icyubahiro ihabwa n'abayitunze.

Imodoka zihenze ziri kurushaho kuba ikimenyetso cy'iterambere ku bagore

Mu bihe bitandukanye, gutunga imodoka y'igiciro kinini byafatwaga nk'ikintu kigaragara cyane ku bagabo bafite ubushobozi.

Gusa uko abagore bagenda bagura ibikorwa byabo mu myidagaduro, ubucuruzi, imideli, sinema no ku mbuga nkoranyambaga, ni ko na bo bagenda bagaragaza ubushobozi bwo kwigurira cyangwa guhabwa imodoka zihenze.

Hari abazigurira ku mbaraga zabo, abandi bakazihabwa nk'impano n'abo bashakanye cyangwa abo bakundana, ariko ikigaragara ni uko izi modoka zikomeje kuba kimwe mu bimenyetso by'ubuzima bagezeho ndetse zikaba zigarukwaho cyane igihe cyose bazerekanye.

Kuva kuri Mercedes-Benz GLC 300 ya Miss Muyango, G-Wagon ya Miss Mutesi Jolly, G-Class ya Alliah Cool na Niragire Marie France, kugeza kuri Range Rover Velar ya Isimbi Model, aba bagore bagaragaza ko urugendo rw'abagore mu kwigira no kugera ku rwego rwo gutunga umutungo ufatika rukomeje gutera imbere, kandi ko no mu myidagaduro y'u Rwanda, gutunga imodoka zihenze bitakiri umwihariko w'abagabo gusa.