Ariko mu myaka ya vuba, ibibazo bijyanye n'umubano we na Jeffrey Epstein, gatanya ye na Melinda French Gates, ndetse n'ibindi birego byangije isura ye byatangiye gutuma bamwe bibaza niba ishusho y'umugiraneza yari yarubatse igikomeje guhungabana.
Uko Bill Gates yabaye umwe mu bantu bakomeye ku isi
Bill Gates yavukiye muri Leta ya Washington muri Amerika mu 1955. Mu 1975, we na mugenzi we Paul Allen bashinze Microsoft, ikigo cyahise gihindura amateka y'ikoranabuhanga ku isi.
Mu myaka yakurikiyeho, mudasobwa zikoresha Windows zagiye zigaragara mu biro, amashuri no mu ngo hirya no hino ku isi. Uwo muvuduko watumye Gates aba umwe mu bakire kurusha abandi ku isi, ndetse imyaka myinshi aza kuyobora urutonde rw'abaherwe ku isi.
Ariko icyatumye izina rye rirushaho gukundwa si ubutunzi gusa. Mu 2000, yashinze Bill & Melinda Gates Foundation, kimwe mu bigo by'ubugiraneza bifite umutungo munini ku isi, cyatanze miliyari z'amadolari mu kurwanya indwara nka Malariya na Polio no guteza imbere ubuzima n'uburezi mu bihugu bikennye.
Iby’umubano na Jeffrey Epstein watangiye kwica byose
Nubwo Gates yari yarubatse izina rikomeye nk'umugiraneza, ibintu byatangiye guhinduka ubwo hasohokaga amakuru ku mubano yagiranye na Jeffrey Epstein.
Mu kwezi kwa Kamena 2026, Gates yatanze ubuhamya imbere ya Komisiyo y'Ubugenzuzi mu Nteko Ishinga Amategeko ya Amerika ku bijyanye n'uwo mubano.
Mu buhamya bwe, yavuze ko guhura na Epstein byari "ikosa rikomeye mu mikirize" kandi yemera ko atagombaga kuba yarigeze amugana. Yavuze kandi ko Epstein yagerageje gukoresha amakuru ku buzima bwe bwite kugira ngo amugireho igitutu.
Gates yavuze ko yamenyanye na Epstein mu 2011 binyuze ku bantu yizeraga mu bikorwa by'ubugiraneza, kandi ko yari yizeye ko uwo munyemari ashobora gufasha gukusanya amafaranga menshi yo gushyigikira ibikorwa by'ubuzima ku isi. Nyuma yaje kwicuza uwo mubano.
Gatanya ya Melinda n'ibibazo by'icyizere
Mu 2021, Bill Gates na Melinda French Gates batangaje ko batandukanye nyuma y'imyaka 27 bashakanye.
Nyuma yaho, Melinda yavuze ko guhura na Jeffrey Epstein byari ibintu byamuhungabanyije cyane, ndetse amusobanura nk'umuntu wamuteje impungenge kuva bakimubonana bwa mbere. Yavuze ko ikibazo cya Epstein cyagize uruhare mu gusenyuka kw'icyizere cyari kiri hagati yabo.
Iyi gatanya yabaye imwe mu nkuru zikomeye zatumye abantu benshi batangira kurebera hafi ubuzima bwite bwa Gates, ibintu byari bitamenyerewe mbere.
Kuva kukuba intwari y'ikoranabuhanga kugeza ku muntu utavugwaho rumwe
N'ubwo Gates akomeje kuba umwe mu bagiraneza bakomeye ku isi kandi ibikorwa bye bikomeje kugirira akamaro abantu benshi, ishusho ye ntabwo ikimeze nk'uko yari imeze mu myaka ya 2000.
Ku ruhande rumwe, hari abamushimira uruhare yagize mu kurwanya indwara, guteza imbere ikoranabuhanga no gutanga umutungo we mu bikorwa by'ubugiraneza. Ku rundi ruhande, hari abavuga ko ibibazo byagiye bimuvugwaho byatumye icyizere bamwe bari bamufitiye kigabanuka.
Inkuru ya Bill Gates ni urugero rw'uburyo umuntu ashobora kuzamuka akagera ku rwego rwo hejuru rw'icyubahiro no gukundwa ku isi, ariko kandi bikerekana ko izina ryubakwa imyaka myinshi rishobora guhura n'ibibazo bikomeye mu gihe gito.
Uyu munsi, Bill Gates aracyari umwe mu bantu bafite ijambo rikomeye mu ikoranabuhanga no mu bugiraneza ku isi. Ariko amateka ye agaragaza ko no ku bantu bageze ku rwego rwo hejuru, isura rusange n'icyizere by'abaturage bishobora guhinduka bitewe n'ibyemezo bafata n'abantu biyegereza.