Ku wa Kabiri tariki ya 14 Mata saa Tatu z’ijoro ni bwo kuri Civitas Metropolitano habereye umukino wa Atletico Madrid yari yakiriye FC Barcelona mu mukino wo kwishyura wa 1/4 cya UEFA Champions League 2025/2026.
FC Barcelona yatsinze ibitego 2-1 ariko birangira isezerewe bitewe n’uko mu mukino ubanza Atletico Madrid yari yatsinze ibitego 2-0.
Nyuma y’uyu mukino, Raphinha utakinnye kubera imvune afite yeruye avuga ko bibwe ndetse ashinja imisifurire kubogama. Ati: ”Kuri njye, byari ubusambo. Sinshaka kuvuga ku bijyanye n'abasifuzi, ariko twakinye neza cyane, Atletico yakoze ibihumbi by’amakosa, ariko umusifuzi ntiyigeze yereka umukinnyi n'umwe ikarita y'umuhondo. Ikintu nshaka kumenya ni uburyo abasifuzi babona Barcelona."
Yavuze ko ashaka kumenya impamvu abasifuzi baba bafite ubwoba bwo kubona Barcelona itsinda. Ati: ”Nshaka kumenya impamvu abasifuzi baba bafite ubwoba bwo kubona Barcelona itsinda, kuko numva, gukora ikosa rimwe mu mukino birashoboka, ariko no mu mikino ibiri ikurikiranye? Ndatekereza ko twibwe itike ya 1/2 cya UEFA Champions League”.
Raphinha yashinje abasifuzi kubiba nyuma yo gusezererwa na Atletico Madrid