Kuri miliyoni zigera kuri Miliyoni €400 Lamine Yamal arashakwa muri Saudi Arabia

Inkuru dukesha ikinyamakuru Fichajes.com iravuga ko ikipe itaratangazwa yo muri Saudi Arabia yifuza gusinyisha Lamine Yamal uri guca ibintu muri FC Barcelona no mu ikipe y’iguhugu ya Espagne, aho bivugwa ko iyi kipe yiteguye kurekura miliyoni 400 z’amayelo kuri uyu musore w’imyaka 17.

Yamal afite amasezerano muri FC Barcelona azarangira mu 2026, ndetse iyi kipe irateganya kumwongerera amasezerano ubwo azaba yujuje imyaka 18 muri uyu mwaka wa 2025. Uyu musore kandi akomeje kwitwara neza, kuko mu mikino 43 amaze gukinira iyi kipe, amaze gutsindamo ibitego 14 ndetse anatanga imipira 21 yavuyemo ibitego.

Gahunda yo gukurura abakinnyi bakomeye muri Saudi Arabia ni gahunda ya leta, kurusha uko yaba iy’amakipe ku giti cyayo. Mu minsi ishize byavuzwe ko Vinicius Jr ari we wifuzwa muri iki gihugu, gusa Lamine Yamal ukiri muto ngo nawe yaba ari indi mpano ikomeye babonye ikomeza kugaragaza neza iki gihugu kizakira Igikombe cy’Isi cya 2034.