Mu myaka itandatu ishize, mbere y'uko Mikel Arteta afata inshingano zo gutoza Arsenal mu Ukuboza 2019, ntawari gutekereza ko iyi kipe yajya mu rugamba rwo gushaka umukinnyi nka Vinicius Junior.
Icyo gihe Arsenal yari ihanganye n'ibibazo byo kutabona itike ya UEFA Champions League ndetse no kutagira ubushobozi bwo guhatana n'amakipe akomeye ku isoko.
Uyu munsi ibintu byarahindutse,Arsenal ni imwe mu makipe ahora ahatanira igikombe cya Premier League, igera kure muri Champions League kandi ifite umushinga ukurura abakinnyi bakomeye ku Isi.
Uburemere bwa transfer ya Vini ntibushingira ku mafaranga gusa
Nubwo amafaranga Arsenal ishobora gutanga atazagera ku yo Liverpool iherutse gutanga igura Alexander Isak, washyizeho agahigo ka miliyoni 125 z'Amapawundi gusa uburemere bwa transfer ya Vini ntibushingira ku giciro.
Igituma iba idasanzwe ni ikipe Vinicius yava avuyemo.Real Madrid si ikipe isanzwe ku isoko ry'abakinnyi. Ni imwe mu makipe akunze kugura abakinnyi beza kurusha uko ibarekura. Mu myaka irenga 30 ishize, ni yo yagiye igura abakinnyi bakomeye muri Premier League aho kuba ariyo ibitakaza.
Mu bakinnyi bakomeye Real Madrid yaguze mu Bwongereza harimo Cristiano Ronaldo, Gareth Bale na Eden Hazard. Bose bari inkingi za mwamba mu makipe yabo, ariko birangira bahisemo kujya kuri Santiago Bernabéu kubera uburemere bwa Real Madrid.
Ni yo mpamvu kuba Arsenal yakura Vinicius muri iyi kipe byafatwa nk'ikintu kidasanzwe mu mateka y'isoko ry'igura n’igurisha ku bakinnyi.
Real Madrid ntipfa kurekura inyenyeri zayo zikirimo gutanga umusaruro
Iyo urebye amateka, abakinnyi bake bagiye bava muri Real Madrid berekeza muri Premier League ntibabaga bakiri inkingi za mwamba. Casemiro yagiye muri Manchester United afite imyaka 30, benshi batangira kuvuga ko urwego rwe rwari rutangiye kugabanuka.
Alvaro Morata na we yagiye muri Chelsea ariko muri Real Madrid ntiyari yarigeze aba rutahizamu utavugwaho rumwe.
Mesut Özil yagiye muri Arsenal mu 2013 nyuma y'uko Real Madrid yari imaze kumvikana na Gareth Bale, mu gihe Ángel Di María na we yagurishijwe muri Manchester United kugira ngo haboneke amafaranga yo kuzana James Rodríguez na Toni Kroos.
Ibyo byose bitandukanye na Vinicius Junior.
Uyu Munya-Brazil ni umwe mu bakinnyi bubakiweho umushinga wa Real Madrid. Ni umwe mu bakinnyi bafite izina rikomeye ku Isi kandi kugeza ubu aracyafite imyaka myiza yo gukina ku rwego rwo hejuru.
Vinicius yamaze kwinjira mu bakinnyi b'ibihangange ku Isi
Mu myaka ine ishize, Vinicius Junior ari mu bakinnyi baba vahataniye Ballon d'Or, aho mu 2024 yabaye uwa kabiri.
Amaze imyaka itanu yikurikiranya atsinda ibitego birenga 10 muri La Liga, anafasha Real Madrid kwegukana ibikombe bikomeye birimo UEFA Champions League na Shampiyona ya Espagne.
Uyu mukinnyi ntabwo akiri impano iri kuzamuka, ahubwo yamaze kuba umwe mu bakinnyi bafite ijambo rikomeye mu mupira w'amaguru w'iki gihe.
Ni yo mpamvu kumusinyisha byagira uburemere burenze ubw'andi masezerano menshi Premier League yigeze kubona.
Hari transfers zikomeye zabaye, ariko iyi yazisiga inyuma
Mu mateka ya Premier League hagiye habaho transfers zikomeye.
Chelsea yaguze Andriy Shevchenko avuye muri AC Milan amaze gutwara Ballon d'Or.
Manchester United yagaruye Paul Pogba avuye muri Juventus ku mafaranga yari agahigo ku Isi.
Manchester City na yo yaguze Erling Haaland wari umwe mu bakinnyi bifuzwaga cyane ku Isi.
Ariko hari ikintu gitandukanya abo bakinnyi na Vinicius,nta n'umwe muri bo wari ikipe nka Real Madrid
Byaba ari intsinzi ikomeye kuri Arteta
Kuba Arsenal yakwegukana umukinnyi nka Vinicius byaba ari intsinzi ikomeye kuri Mikel Arteta ndetse n'ubuyobozi bw'iyi kipe.
Byerekana ko Arsenal itakiri ikipe irwanira gusa kubona imyanya ya mbere muri Premier League, ahubwo yabaye imwe mu makipe ashobora guhangana na Real Madrid, Barcelona na Bayern Munich mu gushaka abakinnyi beza ku Isi.
Byanatanga ubutumwa bukomeye ko Arsenal yagarutse ku rwego rw'amakipe akomeye ku mugabane w'u Burayi.
Mu myaka ishize, amakipe yo muri Espagne ni yo yakundaga kwambura ayo mu Bwongereza abakinnyi bayo bakomeye.
Cristiano Ronaldo, Gareth Bale, Thierry Henry, Cesc Fabregas, Luis Suarez na Philippe Coutinho ni bamwe mu bakinnyi bavuye muri Premier League berekeza muri La Liga.
Ariko kubona Arsenal ikuye Vinicius Junior muri Real Madrid byaba bihinduye iyi sura.
Arsenal iramutse isinyishije Vinicius yaba ari transfer y'amateka muri Premier League