Iki giterane
cyabaye tariki 23-24 Gashyantare 2019 kibera mu karere ka Rutsiro mu murenge wa
Boneza. Ni igiterane cyiswe 'Fearless faith for the Gospel Festival'
cyatumiwemo Theo Bosebabireba, korali Bethlehem y'i Rubavu muri ADEPR,
abapasiteri bo mu matorero atandukanye n’abakozi b’Imana baturutse muri Leta
Zunze Ubumwe za Amerika bari barangajwe imbere na Pastor Greg na Pastor Bob.
Ku cyumweru tariki 24 Gashyantare 2019 wari umunsi wo gusoza iki giterane. Korali Bethlehem yahazindukiye mu cya kare mu gihe Bosebabireba yari yaharaye dore ko yahageze ku wa Gatandatu. Bethlehem choir yakiriwe mu ndirimbo zirenga 10 iziririmba mu byiciro bitandukanye, imaze kuririmba ihita isohoka irataha. Abapasiteri bo muri ADEPR barimo umushumba wa ADEPR mu karere na Rubavu n’umushumba wa ADEPR mu karere ka Rutsiro nabo bahise basohokana n’abaririmbyi ba Bethlehem, barataha.
Bethlehem choir yarishimiwe cyane muri iki giterane
Icyo gihe hari hagiye gukurikiraho Theo Bosebabireba. N’ubwo ariko aba baririmbyi n’abashumba babo basohotse bagataha, abantu benshi cyane bari bitabiriye iki giterane, bagumye muri salle, ibyagaragariye buri wese ko bari banyotewe cyane no gutaramana na Theo Bosebabireba. Rukundo Darius wari uyoboye iki giterane yavuze ko agiye kwakira Bosebabireba kuri stage, nuko abantu bose basakuriza icyarimwe, bakoma amashyi menshi, ibyishimo birabarenga. Bosebabireba yakiriwe nyuma y’uko Bethlehem yari imaze kuririmba indirimbo zirenga 10 ndetse n’umwigisha waje aherekeje iyi korali yari yamaze kubwiriza.
N’ubwo korali Bethlehem yamaze kuririmba ubona bwije dore ko Saa Moya z’ijoro zari zageze, hari abibajije impamvu aba baririmbyi batarindiriye gato ngo Bosebabireba abanze agere kuri stage na cyane ko nawe yari yakurikiranye uko baririmba ndetse akaba yaranagaragaje ko yanyuzwe cyane n’imiririmbire yabo. Theo Bosebabireba yageze kuri stage Saa Moya n’iminota 25, abanza gushimira cyane abantu bihanganye bakamutegereza ko ajya kuri stage.
Theo Bosebabireba mu giterane cyabereye i Boneza muri Rutsiro
Yavuze ko i Rutsiro ari ho hantu ha mbere abonye abantu bihangana cyane. Yabaririmbiye indirimbo zigera ku 10 abantu barizihirwa mu buryo bukomeye dore ko igiterane cyarangiye ubona badashaka gutaha. Indirimbo ye bishimiye cyane ni 'Kubita utababarira'. Ibi byagaragaje ko Theo Bosebabireba akunzwe bidasubirwabo mu bice binyuranye by’u Rwanda cyane cyane hanze ya Kigali. Aganira na Inyarwanda.com Bosebabireba yavuze ko yatunguwe n’uburyo yishimiwe muri Rutsiro ndetse ahamya ko byatumye acanganyukirwa.
KUBA BOSEBABIREBA YARAHAGARITSWE NI YO MPAMVU ABO MURI ADEPR BATASHYE AGIYE KUJYA KURI STAGE
Bamwe mu banyamakuru n’abakurikiranira hafi ibibera mu gisata cy’iyobokamana mu Rwanda, mu busesenguzi bakoze bavuga ko korali Bethlehem yo muri ADEPR Gisenyi ndetse n’abapasiteri bakomeye muri iri torero, kuba baratashye mbere y’uko Bosebabireba ajya kuri stage babitewe n’uko uyu muhanzi yatenzwe muri ADEPR, kugeza ubu akaba atarakurwaho icyo cyasha dore ko nta rusengero na rumwe rwa ADEPR yemerewe kuririmbamo. Aba basesenguzi bavuga ko bitari gushoboka ko Theo Bosebabireba ahagarara imbere y’abamutenze (ADEPR) akababwiriza ubutumwa bwiza kandi nyamara atarahabwa imbabazi mu buryo bweruye. Mu zindi nsengero ariko zitari iza ADEPR aratumirwa cyane, akaririmba, benshi bagafashwa, abandi bakakira agakiza.
ICYO ABO MURI ADEPR N’ABATEGUYE IGITERANE BABIVUGAHO
Inyarwanda.com twagerageje kuvugana n’abo muri ADEPR ndetse n’abateguye iki giterane barebwa n’iyi nkuru kugira ngo tumenye icyo babivugaho. Muhire Innocent perezida wa korali Bethlehem yabajijwe impamvu baririmbye mbere bakabanza kuririmba indirimbo zose zigera ku 10, avuga ko babisabye kubera ko amasaha yari yagiye kandi bafitemo ababyeyi bafite abana bagombaga kugera mu rugo kare. Abajijwe niba gusohoka bakitahira atari uko batashakaga kubona Theo aririmba mu giterane bahuriyemo, yasubije ko atari ko bimeze ahubwo ngo byatewe n’uko bwari bwije. Ati: “Oya ntabwo ari yo mpamvu, ikibazo cyari igihe. Bwari bwije cyane, abashumba bari barimo kudushyiraho igitutu, batubwira ko bwije cyane kandi koko saa mbiri zari zageze."
Iki giterane cyari cyitabiriwe n'abavugabutumwa baturutse muri Amerika
Muhire Innocent yaduhishuriye ko abashumba ba ADEPR bari banze ko Theo Bosebabireba aririmba muri iki giterane. Ngo babonye Theo yinjiye ahaberaga igiterane, baratungurwa bibaza aho aturutse n’impamvu aje kuririmba mu giterane batumiwemo kandi baramuhagaritse. Ati: “Bari banze ko akora (aririmba) kubera ibibazo afitanye na ADEPR byo gucibwa mu itorero." Yadutangarije ko ubwo Bethlehem yari iri kuri stage, habayeho ibiganiro hagati ya Arise Rwanda Ministries n’abashumba bari baherekeje iyi korali, baganira ku kuba Theo agiye gusangira stage n’abaririmbyi babo (Bethlehem). Ati: “Gusa numvise ko Darius yabiganiriyeho n’abashumba, twe twari turi kuri stage."
Ku ruhande rwa Arise Rwanda Ministries yateguye iki giterane, twaganiriye na Rukundo Darius ari nawe wari uyoboye iki giterane. Yabwiye Inyarwanda.com ko impamvu yakiriye Bethlehem mbere, ikabanza ikaririmba indirimbo zayo zose ari uko aba baririmbyi bari basabye ko batanyuranyuranamo kuri stage na Theo Bosebabireba bitewe n’ibibazo afitanye na ADEPR. Ati: “Impamvu ni uko Theo afitanye ibibazo na ADEPR, bansabye ko batanyuranyuranamo na Theo kuri stage." Yashimiye Imana yiyerekanye, Bethlehem ikaririmba ndetse na Theo akaririmba, ibintu byose bikagenda neza. Ati: “Icy’ingenzi ni uko Imana yigaragaje.“
NA MBERE Y'IGITERANE BYARI BIKOMEYE; ADEPR YARI YANZE KWITABIRA AMAHUGURWA Y'ABASHUMBA
Rukundo Darius yakomeje avuga ko mbere y’uko iki giterane kiba yabanje kugirana ibibazo na ADEPR, abapasiteri bo muri iri torero bakorera muri Rutsiro babuzwa kwitabira amahugurwa y’abapasiteri yabaye nyuma y’igiterane ni ukuvuga kuva ku wa Mbere kugeza kuri uyu wa Gatatu. Ni itegeko bahawe n'abayobozi b'iri torero mu karere ka Rutsiro. Ngo byabaye ngombwa ko ajya i Kigali ku cyicaro gikuru cya ADEPR gusaba ko abapasiteri bo muri Rutsiro bakwitabira amahugurwa y’abashumba. Yanakomoje ku nkunga Arise Rwanda Ministries yahaye urusengero rumwe rwa ADEPR rwo muri Rutsiro, ariko ejo bundi bashatse kujya kurusura bari kumwe n’abashyitsi babo bavuye muri Amerika, ADEPR irabangira kuko abo mu yandi matorero ngo bahejwe.
Korali Bethlehem mu giterane cyabereye i Boneza mu karere ka Rutsiro
Yavuze ko izo ari imbogamizi bakoreramo, gusa agashima Imana igenda ibashoboza. Kuri iki Cyumweru tariki 24 Gashyantare 2019 umushumba wa ADEPR mu karere ka Rutsiro yahawe ijambo mu giterane cyateguwe na Arise Rwanda Ministries cyabereye muri Boneza avuga ko inkunga ya Miliyoni imwe y’amanyarwanda (1,000,000Frw) Arise Rwanda Ministries yahaye urusengero rwabo ruri muri Boneza bayishimye, gusa avuga ko idahagije. Yasabye ko babafasha bakazubaka urusengero rwabo rukuzura neza bakanarushyiramo amakaro. Yabivuze ubona akomeje rwose. Arise Rwanda Ministries yavuze ko igiye kubyigaho ikazareba icyo gukora.
Dusubiye hejuru gato, ku munsi wo gusoza iki giterane ni ukuvuga tariki 24 Gashyantare, Theo Bosebabireba yinjiye muri salle biba ibibazo kuko Bethlehem yahise isaba Mc ko itanyuranyuranamo na Theo kuri stage. Icyakora Rukundo yavuze ko kuba Bethlehem na Bosebabireba barahuriye kuri stage bitatunguye aba baririmbyi kuko igiterane cyabaye nyuma y’ibyumweru bitatu ‘posters’ zicyamamaza ziri hanze. Yashimiye Imana yigaragaje igiterane kikagenda neza ndetse hakaboneka n’abakira agakiza. Yashimiye iyi korali na Theo uko bitwaye kuri stage, ati “Bethlehem baririmbye neza, Theo nawe yitwaye neza cyane, ngira ngo wabonye ko abanya Boneza bamwishimiye."
ICYO BOSEBABIREBA AVUGA KU GUTENGWA KWE MURI ADEPR
Theo Bosebabireba aherutse gutangariza umunyamakuru wa Inyarwanda.com ko magingo aya nta kibazo afitanye na ADEPR Kicukiro Shell yamuhagaritse, ahubwo ngo ikibazo agifitanye n’umwe mu bavugizi bakuru ba ADEPR wanze kumuha imbabazi mu gihe abandi bose bamubabariye. Uyu muhanzi ahamya ko yamaze guhinduka, ubu akaba ari Theo Bosebabireba mushya. Mu gushimangira ko nta kibazo afitanye na ADEPR Kicukiro yavuze ko yakira abashyitsi mu rusengero, akajya mu materaniro abera mu cyumba cy’amasengesho, ndetse ngo ajya no ku Igaburo Ryera mu gihe bizwi hose muri ADEPR ko ujya ku Igaburo Ryera aba ari umukristo wemewe na ADEPR ndetse na we agasabwa kuba nta cyaha yishinja mu mutima we.
REBA HANO UKO BETHLEHEM CHOIR YARIRIMBYE
REBA UKO BOSEBABIREBA YARIRIMBYE MURI IKI GITERANE