Ku myaka 27 afite PhD n’akazi ko kwigisha muri Kaminuza, ariko benshi bamwitiranya n’umunyeshuri

Lloyd ubu ni umwarimu muri Cardiff Metropolitan University, aho yigisha amasomo ajyanye n’iyamamazabikorwa mu bijyanye n’imideli. Yabonye impamyabumenyi ye ya PhD muri Werurwe uyu mwaka, nyuma y’imyaka ine yari amaze mu rugendo rw’amashuri makuru.

Uyu mugore ukomoka i Bromyard muri Herefordshire, mu Bwongereza, avuga ko nubwo yamaze imyaka myinshi mu mashuri, atigeze areka kwita ku isura ye.

Akunda imisatsi itunganyije neza, inzara zisize neza ndetse no kwambara no kwisiga mu buryo bugezweho, ari na yo mpamvu bamwe bamwise “Academic Barbie”, bisobanuye Barbie w’umunyabwenge cyangwa ukora mu rwego rw’uburezi.

Lloyd kandi akora akazi ko kwamamaza imyambaro y’abageni nk’umunyamideli w’igihe gito. Avuga ko intego ye ari ugutera abandi bagore umwete wo kwinjira mu mwuga w’ubushakashatsi n’uburezi, ndetse no guhindura imyumvire ivuga ko umwarimu wa kaminuza agomba kuba umuntu ukuze kandi wambara mu buryo butuje cyane.

Yavuze ko akenshi ahura n’abantu badaha agaciro amasomo yigisha kubera ko ajyanye n’imideli. Ku bwe, hari abahita bafata “fashion” nk’amasomo adafite uburemere bukomeye.

Ati: “Iyo mvuze ko nigisha fashion marketing, abantu bamwe ntibahita bamfata nk’umuntu ukomeye. Iyo bumvise ijambo fashion, bahita batekereza ko ari isomo ryoroshye.”

Yongeyeho ko n’imyaka ye n’uko yambara bishobora gutuma abantu babanza kumufata nk’umukobwa ukiri muto utaragera ku rwego rwo kuba inzobere.

Ati: “Nshobora kuba nsa n’umukobwa ukiri muto ufite umusatsi w’umuhondo kandi usa na Elle Woods. Ariko iyo mpagaze imbere y’abantu, bumva ibyo mvuga bakabona ko mbizi kandi ko fashion ari ingingo ishimishije cyane.”

Akunda kwigisha yambaye uko ashaka

Lloyd avuga ko adashaka guhindura uburyo yambara kubera akazi akora. Akunda kwiyitaho kubijyanye n’imyambarire, kwisiga no gutunganya umusatsi, ndetse n’iyo yaba afite isomo saa tatu za mu gitondo, akomeza kwiyitaho uko abyifuza.

Ati: “Nishimira ko nshobora kujya ku kazi nambaye uko nshaka. Uburyo nambara ndetse n’uko nisanisha ni igice cy’umuntu ndi.”

Yavuze kandi ko kuba akiri muto bituma ahora yibeshywaho nk’umunyeshuri. Ati: “Iyo igihembwe gishya gitangiye, abantu bakunze kumbaza niba nkeneye ubufasha cyangwa niba nzi aho ngiye. Buri gihe bibeshya ko ndi umunyeshuri.”

Yarangije kaminuza afite amanota yo ku rwego rwo hejuru

Lloyd yarangije muri Cardiff Metropolitan University mu 2020, aho yabonye impamyabumenyi y’icyiciro cya mbere mu bijyanye no gucunga iyamamazabikorwa ry’imideli, ayisoza ku rwego rwo hejuru.

Mu 2022, yabonye impamyabumenyi y’icyiciro cya kabiri cya Masters mu bijyanye n’iyamamazabikorwa ryo kuri murandasi no gucunga amakuru, nayo ayisoza ku manota meza cyane.

Muri uwo mwaka ni bwo yatangiye PhD, ayikorera ku nkunga y’amasomo y’igihe cyose.

Mu bushakashatsi yakoze, yibanze ku buryo abantu bazwi cyane ku mbuga nkoranyambaga, cyane cyane influencers, bahangana n’urwango no kunengwa kuri murandasi. Mu rwego rw’ubushakashatsi bwe, yagiranye ibiganiro n’abantu bazwi mu biganiro by’imyidagaduro birimo Love Island na Married at First Sight.

Avuga ko igihe yamenyaga ko yatsinze ikizamini cya PhD kikamuhesha izina rya “Doctor”, byari ibintu bitazibagirana. Ati: “Nari nishimye cyane. Hari umwanya umwe mu buzima bwanjye numvise neza ko nari mbikwiye kandi ko nari narabikoreye cyane.”

Abagore bakwiye kutagira ubwoba bwo kwinjira muri academia

Uyu mwarimu avuga ko mu gihe kizaza yifuza gushinga ikigo gifasha influencers, akoresheje ubumenyi n’ubushakashatsi amaze imyaka akora.

Arasaba kandi abandi bagore gutinyuka kwinjira mu rwego rw’ubushakashatsi n’uburezi, kuko asanga hakenewe abantu bafite imyumvire n’imiterere itandukanye mu rwego rw’ubumenyi.

Ati: “Sinzigera mpindura uko nsa kubera akazi nkora. Nkunda kwigaragaza uko ndi.”

Lloyd avuga ko bamwe bamugereranya na Elle Woods, uzwi muri filime Legally Blonde, kubera isura ye n’uko akunda imyambarire itandukanye. Abandi bamwita Barbie, ndetse kuri konti ze ku mbuga nkoranyambaga yiyita “Academic Barbie”.

Ati: “Mu kazi byabaye nk’urwenya rusanzwe. Iyo umuntu abajije ati ‘Katie ni nde?’, bahita bavuga ko ari wa mukobwa w’umuhondo usa na Barbie.”

Nubwo avuga ko kuba umugore ukiri muto mu bushakashatsi bishobora gutuma ijwi rye ritumvwa vuba, Lloyd avuga ko atazigera areka guharanira ko ibitekerezo bye byumvikana.

Ati: “Nk’umugore ukora ubushakashatsi, biragoye rimwe na rimwe ko ijwi ryawe ryumvikana. Ariko ni ngombwa guca kuri izo mbogamizi no kwagura imbibi. Ndi umuntu ukomeza gukomanga ku muryango kugeza igihe numviswe.”