Ku butumire bwa Davido, The Ben n'umugore we bageze muri Zambia

Amakuru InyaRwanda ifite ni uko The Ben n’umugore we bageze muri iki gihugu ku wa Kane tariki ya 30 Mata 2026, mu gihe igitaramo nyamukuru bazitabira giteganyijwe kuri uyu wa Gatanu tariki ya 1 Gicurasi 2026, kikabera muri Ciela Resort, ahazwiho kwakira ibitaramo n’ibirori by’icyubahiro bihebuje muri Zambia.

Iki gitaramo cyiswe “The Royal Networking” kiri mu bigize uruhererekane rw’ibitaramo Davido ari kuzengurukamo isi yise “5IVE Alive Tour 2026”. Ni ibitaramo byahuje amazina akomeye mu muziki wo ku mugabane wa Afurika no ku rwego mpuzamahanga.

Usibye Davido watumiye The Ben, biteganyijwe ko kuri uru rubyiniro hazanagaragara ibindi byamamare birimo umunyamerika Rick Ross, icyamamare mu njyana ya Rumba yo muri Repubulika Iharanira Demokarasi ya Congo, Koffi Olomide, ndetse na Cindy Le Cœur, umwe mu baririmbyi bakomeye muri aka karere.

Iki gitaramo cyateguwe nk’igikorwa cyihariye kigamije guhuza abantu bafite aho bahuriye n’ubucuruzi n’imyidagaduro, aho abacyitabira bishyura amafaranga ari hagati ya K15,000 na K25,000 kugira ngo binjire muri iyi “VIP experience”.

Mu mashusho magufi Uwicyeza Pamella yashyize ku mbuga nkoranyambaga ze, yagaragaye ari kumwe n’umugabo we The Ben bari muri hoteli ya Bonanza Golf Course, imwe mu hantu hihariye kandi hahenze i Lusaka, izwiho ubwiza n’ituze ridasanzwe.

Davido ubwe yemeje ko afite gahunda y’ibitaramo bibiri muri Zambia, aho azataramira Ciela Resort ku wa Gatanu, akazakomereza ku wa Gatandatu tariki 2 Gicurasi 2026 ahitwa Polo Field Show Grounds, nabwo mu Mujyi wa Lusaka.

Nyuma y’ibi bitaramo, Davido azakomereza urugendo rwe muri Guinea, aho azataramira i Conakry ku matariki ya 8 na 9 Gicurasi 2026. Ibi bitaramo bizaba bisoza ku mugaragaro tour ye ya “5IVE Alive Tour 2026”, yakoreye mu bihugu bitandukanye ku Isi.

Kwitabira kwa The Ben muri iki gitaramo cyitabiriwe n’ibyamamare mpuzamahanga, bikomeje kugaragaza uko umuziki nyarwanda ugenda waguka ugera ku rwego mpuzamahanga, aho abahanzi bawo batumirwa mu birori bikomeye bihuza ibyamamare byo ku isi.

The Ben na Pamella bageze i Lusaka muri Zambia aho bitabiriye igitaramo gikomeye batumiwemo na Davido

Ku butumire bwa Davido, The Ben n’umugore we Pamella bari mu byamamare byitabiriye igitaramo cya “The Royal Networking” i Zambia

The Ben ari kumwe n’umugore we Uwicyeza Pamella bageze muri Zambia mbere y’igitaramo Davido azahuriramo na Rick Ross na Koffi Olomide

Davido ari gukomeza kuzenguruka Isi mu bitaramo bya “5IVE Alive Tour 2026”, aho ari guhuriza hamwe ibyamamare bikomeye muri Afurika no ku rwego mpuzamahanga

Davido, Koffi Olomide na Cindy Le Coeur barahurira mu gitaramo kibera muri Ciela Restort, kuri uyu wa Gatanu tariki 1 Gicurasi 2026