Korali Betesida iri mu bitaramo by’icyumweru byo gushima Imana no kwizihiza isabukuru y’imyaka 43

Kuva mu mwaka wa 1982, Korali Betesida yahereye umurimo w’Imana mu itorero rya ADEPR Nyarugenge ikaza kwimukira Karama, yomoye imitima ya benshi ndetse ikwirakwiza agakiza k’Imana mu bice byinshi by’Igihugu binyuze mu ndirimbo zuzuye ubutumwa bwiza z’iyi korali.

Byasabye imbaraga zidasanzwe ndetse n’Imana irabashyigikira kugira ngo bagure umurimo w’Imana hirya no hino mu gihugu.

Mu mwaka wa 1982, Korali Betesida yari yaravukiye muri ADEPR Nyarugenge yaje kwimurirwa i Karama kuko abaririmbyi bari bayigize muri icyo gihe benshi baturikaga aho i Karama.

Nyuma yo kugera i Karama, iyi korali yakoze imirimo idasanzwe harimo kubyara andi makorali arimo abacunguwe, iyitwa Elayono i Mageragere, mu Nzove n’ahandi henshi harimo na Rugarika mu karere ka Kamonyi.

Uretse kuba yarabyaye ayo makorali yose, muri imyaka 43 ivutse hagiye havukamo abakozi b'Imana benshi barimo Abapasiteri, Abarimu n’Abadiyakoni ndetse n’ubu iracyakomeje kuvukisha abakozi b'Imana banshi.

Ku bw'ibyo byose Imana yabashije korali Betesida, bari mu cyumweru cyo gushima Imana ndetse no kwizihiza imyaka 43 bamaze bakora umurimo w’Imana. Icyo cyumweru cyatangiye ku wa 8/9/2025 kikazasozwa ku cyumweru tariki ya 14/9/2025.

Muri iyi minsi yose, iki gitaramo kiri guhera saa kumi n’ebyiri z’umugoroba kugeza saa mbili ariko ku cyumweru ho bizaba ari akarusho kuko kizahera saa munani kikageza saa mbili z’umugoroba.

Amakorali arimo Hoziyana, Abacunguwe, na Betesida niyo arimo afasha abantu kuramya no guhimbaza Imana bashima ndetse bishimira ibyo bakoze nk’uko intego y’iki gitaramo ivuga ngo “Uwiteka yadukoreye ibikomeye natwe turishimye.”

Korali Betesida iri mu bitaramo by'icyumweru bigamije gushima Imana ko yabanye nabo mu myaka 43 bamaze mu murimo w'Imana ndetse banishimira isabukuru y'imyaka 43