Aba basore bombi bashinja
Wilhelmina kubategeka gusinya amasezerano y’imyaka itatu y’imikoranire,
ikabahisha ko bagiye kwirukana abajyanama babo ba hafi—Matt Trust na Gene
Kogan—bari bamaze igihe kirekire babahagarariye. Ibyo barabishingira ku kuba
ayo masezerano barayasinyanye bizeye ko abo bajyanama bagikomeje imirimo yabo,
nyamara kompanyi yari yarafashe icyemezo cyo kubirukana.
Mu nyandiko y'ikirego
cye, Malik Lindo-Ireland yavuze ko nyuma yo kwirukana abo bajyanama, Jessica
Rosenberg wari usigaye ari we muyobozi mukuru mu ishami ry’abagabo, na we
yeguye. Ibi byatumye iryo shami risigara riyobowe n’abakozi bato badafite
ubunararibonye buhagije, ibyagize ingaruka zikomeye ku kazi ke, kuko avuga ko
Wilhelmina yananiwe kumuhuza n’amahirwe menshi y’akazi.
Alfredo Nemer, na we
washyikirije urukiko ikirego nk’icyo, yavuze ko iyo aza kumenya ko Trust na
Kogan bagiye kwirukanwa, atari gusinya amasezerano mashya y’imyaka itatu,
ahubwo yari kujyana nabo bagasohoka muri Wilhelmina.
Izi manza zombi zibaye mu
gihe hari amakuru aturuka imbere muri kompanyi avuga ko higeze kuba
"akaduruvayo gakomeye" mu buyobozi, aho bamwe mu bayobozi bakuru
barimo n’abajyanama b’abamurika imideli basezeye cyangwa bakirukanwa, ibintu
byafashwe nko gusenya burundu ishami ry’abamurika imideli b’abagabo.
Umwe mu bantu b’imbere
muri Wilhelmina yatangarije Page Six
ati: “Ni nko gusubira ku ntangiriro. Bashegeshe ikipe yose y’abagabo.”
Amakuru avuga ko hari
abandi bamurika imideli benshi bari gutegura inzira zo kwikura muri iyi
kompanyi kubera izo mpinduka zitunguranye.
Nubwo bimeze bityo,
ubuyobozi bwa Wilhelmina burahakana ibyo birego, bukabifata nk’ubushotoranyi
bukorwa n’abarwanira amasoko mu rwego rw’imideli. Umwavoka wa Wilhelmina,
Matthew Heerde, yavuze ko ibyo birego “nta shingiro bifite” ndetse abifata
nk’“uburyo bwo guhangana budakwiye bukorwa n’indi kompanyi ishaka kwambura
Wilhelmina abakozi bayo b’ingenzi.”
Yakomeje agira ati: “Ibi
bibazo ntaho bihuriye n’Itegeko ry’Abakozi b’Imideli (Fashion Workers Act),
iryo Wilhelmina ishyigikiye kandi yubahiriza neza. Turizera ko urukiko
ruzubahiriza amasezerano Nemer na Lindo-Ireland basinyanye n’iyo kompanyi.”
Na none, Guarav Pahwa,
Umuyobozi Ushinzwe Imari n’Imicungire muri Wilhelmina, yavuze ko badashobora
kugira icyo batangaza ku masezerano y’abamurika imideli cyangwa amakuru ajyanye
n’abahoze bakorana na kompanyi, ariko yizeza ko intego ari ugukomeza kongerera
imbaraga amashami yose no guteza imbere impano zabo n’ubufatanye bwabo.
Malik Lindo-Ireland yajyanye kompanyi ya Wilhelmina Models mu nkiko
Alfredo Nemer nawe yareze Wilhelmina kumusinyisha amasezerano atwikiriwe n'ikinyoma