Iyi Komite yashyizweho n'Urwego rw'Igihugu rw'Imiyoborere (RGB) ku wa 20 Gicurasi 2026, nyuma yo gukuraho Komite Nyobozi yari isanzwe iyobora iri torero. Kuva icyo gihe, yatangiye gahunda zitandukanye zigamije guhuza abayobozi n'inzego zose z'itorero, kongera icyizere no kubaka umusingi mushya w'imikoranire.
Mu rwego rwo kugera kuri izo ntego, Komite Nyobozi y'Inzibacyuho yateguye imyiherero ibiri yahuje abayobozi n'abahagarariye inzego zitandukanye z'Itorero Inkuru Nziza mu Rwanda.
Umwiherero wa mbere wabaye kuva ku wa 10 kugeza ku wa 12 Kamena 2026, uhuza abagize Komite Nyobozi y'Inzibacyuho, abayobozi ba paruwasi, abagize Komite Ngishwanama, Abagenzuzi ndetse n'abahagarariye ibyiciro bitandukanye by'itorero bagize Inteko Rusange, bose hamwe bagera kuri 43.
Muri uwo mwiherero, Umuvugabutumwa Bariho Lambert yatanze inyigisho zishingiye ku nsanganyamatsiko igira iti "Gusana Inkike", agaragaza akamaro ko kongera kubaka ubumwe, ubufatanye n'icyerekezo gihuriweho nyuma y'ibihe itorero ryanyuzemo.
Umwiherero wa kabiri wabaye kuva ku wa 30 Kamena kugeza ku wa 2 Nyakanga 2026, uhuza Komite Nyobozi y'Inzibacyuho n'abayobozi b'amatorero yose (Local Churches) agize Itorero Inkuru Nziza mu Rwanda. Witabiriwe n'abagera ku 130.
Uyu mwiherero waranzwe n'inyigisho zatanzwe na Rev. Dr. Antoine Rutayisire, wari watumiwe nk'umwigisha mukuru. Yigishije ku nsanganyamatsiko igira iti "Komora Ibikomere no Kubabarira", ashimangira ko gukira ibikomere byo mu mutima, kubabarirana no kongera kubaka ubumwe ari byo shingiro ry'iterambere rirambye ry'itorero.
Abateguye iyi myiherero bavuga ko yari igamije ibintu byinshi birimo: Kumenyekanisha no guhuza Komite Nyobozi y'Inzibacyuho n'inzego zitandukanye zigize Itorero Inkuru Nziza mu Rwanda; Kongera ubumwe, ubusabane n'ubufatanye hagati y'abayobozi n'abagize itorero; Gusengera itorero n'icyerekezo cyaryo; Gusengera u Rwanda no gukomeza guteza imbere amahoro n'ubumwe;
Gukusanya ibitekerezo bizafasha gushimangira imiyoborere myiza; Gusobanukirwa impinduka zijyanye no gushyiraho abayobozi bujuje ibisabwa n'amategeko n'amabwiriza agenga amadini n'amatorero; no Gushyiraho ingamba zo gukomeza umurimo w'ivugabutumwa no kubaka itorero rikomeye, rifite ubumwe n'icyerekezo gihamye.
Perezida wa Komite Nyobozi y'Inzibacyuho, Pastor Karerangabo Eric, wayoboye iyi gahunda, yashimiye abayobozi n'abagize itorero bitabiriye iyi myiherero ku bwitange n'umutima wo gukorera hamwe bagaragaje.
Yabashishikarije gukomeza kugira uruhare rugaragara mu kubaka Itorero Inkuru Nziza mu Rwanda no kwagura umurimo w'Imana, bashyira imbere ubumwe, gukorera hamwe n'indangagaciro za gikristo.
Hateganyijwe amahugurwa ku bayobozi bize Theology
Komite Nyobozi y'Inzibacyuho yatangaje ko ibikorwa byo kuvugurura no kongerera ubushobozi abayobozi bitarangiriye kuri iyi myiherero.
Guhera ku wa 7 kugeza ku wa 9 Nyakanga 2026, hateganyijwe amahugurwa azahuza Komite Nyobozi y'Inzibacyuho n'abarangije amasomo ya Theology, agamije kubongerera ubumenyi ku nsanganyamatsiko igira iti "Ubuyobozi Buhindura Abantu n'Imibereho."
Abateguye iyi gahunda bateganya ko izatanga umusaruro ugaragara mu kongera kubaka ubumwe n'ubufatanye hagati y'abayobozi n'abagize itorero, gusubiza icyizere mu bayobozi no mu bakristo, no gushyiraho icyerekezo gihuriweho kizafasha Itorero Inkuru Nziza mu Rwanda gukomeza umurimo waryo neza.
Biteganyijwe kandi ko aya mahugurwa n'imyiherero bizafasha gutegura abayobozi bafite ubushobozi bwo kuyobora neza amatorero, kongera umurava n'ubusabane mu murimo w'Imana, no gutuma Itorero Inkuru Nziza mu Rwanda rikomeza kuba umusemburo w'impinduka nziza n'iterambere ry'umuryango nyarwanda.
Komite Nyobozi y'Inzibacyuho y'Itorero Inkuru Nziza yihaye intego yo kuvugurura no kongerera ubushobozi abayobozi