Kina Rwanda yamuritse igitabo gikubiyemo imikino 21 igenewe aban

Kuri uyu wa Gatanu tariki 11 Ugushyingo 2022, ni bwo Kina Rwanda yamuritse iki gitabo mu gikorwa cyabereye ku isomero rusange rya Kigali (Kigali Public Library).

Iki gitabo kirimo imikino y’abana b’impinja (Iboneka kuri paji ya gatanu), imikino y’ibitambambuga (iboneka kuri paji ya 9) n’imikino igenewe abana bakuru (iboneka kuri paji ya 15).

Kiri mu mabara y’umuhondo, ubururu, umutuku n’andi aryoheye ijisho ry’abakiri bato ndetse n’ababyeyi.

Ijambo ry’ibanze ry’iki gitabo rivuga ko “Uko ugenda uhinduranya impapuro zikigize, uramenya imikino mishya cyangwa ugire n’urukumbuzi kuko uza kwibuka imikino ushobora kuba warakinnye ukiri umwana."

Rigakomeza rigira riti “Iki gitabo cyatunganyijwe ngo gihe ababyeyi n’abandi barezi inama z’uburyo bakina imikino hagamijwe gufasha abana mu mikurire yabo, ari na ko habyazwa umusaruro amahirwe yo kunguka ubumenyi binyuze muri iyi mikino."

Mu mikino abana bigiramo ubumenyi bubafasha kubana neza n’abandi, kwibuka no gufata mu mutwe ibyo bize, gusobanukirwa amarangamutima yabo n’ay’abandi, kugorora no kubaka umubiri ndetse no guhanga udushya.

Iki gitabo cyamuritswe uyu munsi, kigabanyijemo ibice bibiri by’ingenzi: Igice cya mbere kiva imuzingo imikino y’abana b’impinja n’ibitambambuga, na ho igice cya kabiri kikerekana ingero z’imikino y’abantu bakuru.

Buri mukino ufite izina, ibikoresho bisabwa, amabwiriza, amakuru ku bawukina ndetse n’ubumenyi abana bazungukira muri uwo mukino.

Kumurika iki gitabo byitabiriwe n’ababyeyi bakoranye na Kina Rwanda, Isomero Rusange rya Kigali ‘Kigali Public Library’, abanyamakuru bahuguwe na Kina Rwanda ku bijyanye n’imikino y’abana n’abandi batandukanye bumva akamaro k’imikino ku buzima bw’abana.

Malik Shaffy Lizinde uhagarariye Kina Rwanda, yavuze ko Kina Rwanda yatangijwe kugira ngo ababyeyi babone ko iyo ‘abana bari gukina baba bari kwiga’. Ibi binashimangirwa no kuba iyo umwana akivuka atangira gukina.

Yavuze ko hakozwe ubukangurambaga butandukanye mu Rwanda mu kugaragaza akamaro ko gukina, bituma batekereza gukora iki gitabo gikubiyemo iyi mikino.

Ati “Icyo muri Kina Rwanda twakoze, twagiye dukora ubukangurambaga bwinshi ndetse n’ibikorwa bitandukanye kugira ngo Abanyarwanda muri rusange bashobore gusobanukirwa no gukina icyo ari cyo."

Akomeza ati “Ni muri urwo rwego rwakoze kano gatabo (agatabo k’imikino) kubera ko twasanze ni byiza ko abantu basobanukirwa gukina ni iki? (â€¦) Twaravuze tuti buri mukino wa Kina Rwanda ufite ikintu ushobora kwigisha abantu noneho dukusanya imikino igera kuri 21 aba ariyo dushyira hamwe."

Malik avuga ko iki gitabo kizajya ahantu hatandukanye mu gihugu’. Kandi Kina Rwanda yiteguye gukora byinshi mu gufasha abana gukina imikino itandukanye.

Yavuze ko mu bafatanyabikorwa bafite harimo na Kigali Public Library ibafasha mu bikorwa bitandukanye byari buri munsi. Ati “Ni ibintu batekerezaho cyane ku kuba umwana yakunguka ubumenyi mu gihe ari gukina."

Maliky Shaffy avuga ko ‘gukina n’umwana ari ukumufasha mu mikurire ye’. Kandi ngo ushobora kumenya umwana bitewe n’uko mukina.

Malik avuga ko bitoroshye kumenya amafaranga yashowe mu gukora aka gatabo, kubera ko hari abafatanyabikorwa babashyigikiye. Ati “Ntabwo kano gatabo kagurishwa."

Rusera Tessy, umukozi muri Kigali Public Library yavuze ko bafatanyije na Kina Rwanda ‘kubera ko badufashirisha abantu batugana’. Avuga ko iki gitabo Kina Rwanda yamuritse, kizifashishwa cyane n’abana bagana iri somero n’ababyeyi.

Yavuze ko gufatanya na Kina Rwanda biri no muri gahunda yo guteza imbere umuco wo gusoma.

Ati “Icyo dushaka guteza imbere ni ukumenya gusoma no kuvumbura n’icyo dukora hano kuri Kigali Public Library. Kandi tuzi neza ntabwo bikorwa gusa, twifashisha igitabo cyonyine, twifashisha ibindi bintu.

"Twifashisha abarezi batandukanye bajya badufasha muri iki kigo cyacu, twifashisha imikino itandukanye tujya dukora, ariko ibyo byose twarabyikorera hano duhuye na Kina Rwanda twasanze rero ko hari byinshi twabigiraho kugira ngo bagere ahantu badukorera iki gitabo kinafasha ababyeyi."

Iki gitabo cyashyizwe muri Kigali Public Library, kandi kiraboneka ku rubuga rwa internet rwa Kina Rwanda. Umubyeyi wese ufite internet ashobora ku gisoma.

Binateganyijwe, iki gitabo kizagezwa mu masomero arenga 70 ari mu gihugu, aho babyeyi bashobora kujya bagisoma.

Hari na gahunda yo kubaka ahantu habugenewe, aho abana bazajya bajya bagasomerayo iki gitabo.

Hazabaho no guhitamo ababyeyi bamwe na bamwe bagiye bakorana na Kina Rwanda mu bihe bitandukanye nk’abatuye Musanze, Bugesera, Nyanza na Rubavu, bazifashishwa mu gutuma abana basobanukirwa n’iki gitabo.

Mu gihe cy’ukwezi kumwe, hari gahunda y’uko iki gitabo kizaba cyageze mu bice bitandukanye by’u Rwanda.

Iki gitabo cyateguwe mu gihe cy’amezi atandatu, harimo imikino 21. Cyabanje guhabwa ababyeyi n’abana bakina imikino yarimo, banagaragaza imbogamizi zirimo.

Nyuma cyongera gukorwa, gisubizwa mu babyeyi bemeza ko nta kibazo kirimo. Cyashyizwe mu icapiro, abahanga mu Kinyarwanda banyuzamo amaso mbere y’uko gisohoka.

Ubu kiri mu Kinyarwanda, ariko kazasohoka no mu Cyongereza. Kiri kuri Paji 44. Cyatunganyijwe bigizwe uruhare n’umuryango w’abagide mu Rwanda, Agati Library n’abandi.

Muri Car Zone y’Ukwakira 2022, Kina Rwanda yegereje imikino abantu. Hari ibiganiro bishobora gutuma Umujyi wa Kigali ufasha Kina Rwanda gukorera ahari ibibuga bya Tennis yo mu muhanda, yatangijwe kuri uyu wa Kane tariki 10 Ugushyingo 2022.

KANDA HANO UBASHE GUSOMA IKI GITABO CYA KINA RWANDA

Kina Rwanda na Kigali Public Library batangije imikoranire, banamurika igitabo cy’imikino 21 igenewe abana

Malik Shaffy Lizinde yashyikirije Tessy Rusera wari uhagarariye Kigali Public Library iki gitabo cy’imikino

Malik yavuze ko iki gitabo bakitezeho gufasha ababyeyi kurushaho gukina n’abana babo nk’imwe mu nzira yo kubafasha mu mikurire

Malik avuga ko ‘gukina ari inkingi ya mwamba mu mikurire y’umwana'

Tessy Rusera yavuze ko imikoranire ya Kigali Public Library na Kina Rwanda igamije guteza imbere umuco wo gusoma

Tessy Rusera yavuze ko Kigali Public Library iganwa cyane n’amashuri yegereye iri somero, ariko ntawe uhejwe mu kugana iri somero rusange

Nkusi Arthur yavuze ko iki gitabo kizagezwa mu masomero 70 yo mu gihugu. Kandi hari gahunda yo kubaka ahantu abana bazajya bakinira, bakahasanga n’ibi bitabo