Izi ndishyi zahawe Kardashian nyuma
y’uko Urukiko rw’i Paris rufashe icyemezo ku kirego cy’abagizweho ingaruka
n’ubwo bujura bwabaye mu 2016, ubwo yari yagiye i Paris mu cyumweru cy’imideli.
Kardashian yari yasabye ko ahabwa
€1 gusa, atari mu rwego rwo kwishyurwa agaciro k’imitako yibwe, ahubwo
nk’ikimenyetso cy’uko ibyabaye kuri we byemejwe n’ubutabera.
Ku wa 3 Ukwakira 2016, Kim
Kardashian yari acumbitse muri hoteli yitwa Hôtel de Pourtalès i Paris, aho
yari yagiye mu bikorwa bijyanye n’icyumweru cy’imideli.
Muri iryo joro, abagabo bitwaje
intwaro binjiye muri iyo hoteli. Bamwe muri bo bari biyambitse nk’abapolisi,
bituma babasha kugera aho Kardashian yari acumbitse.
Kardashian yarafashwe bamushyira mu
bwiherero, mu gihe abo bajura bashakaga imitako yari afite.
Muri ubwo bujura, hibwe imitako
yari ifite agaciro kagera kuri miliyoni 6 z’amadolari, harimo n’impeta ya
diyama yari ifite agaciro ka hafi miliyoni 4 z’amadolari, yari yarahawe
n’uwahoze ari umugabo we, Kanye West.
Kugeza ubu, igice kinini cy’iyo
mitako ntikiraboneka.
Nyuma y’ubwo bujura, abategetsi b’u
Bufaransa batangiye iperereza, bafata abantu bakekwaho kugira uruhare muri icyo
gikorwa.
Abantu 10 ni bo bagejejwe mu rukiko
baburanishwa ku byaha bifitanye isano n’ubwo bujura. Mu mwaka wa 2025, abantu
umunani bahamwe n’ibyaha, mu gihe abandi babiri bagizwe abere.
Kim Kardashian na we yagiye i Paris
gutanga ubuhamya mu rubanza, asobanurira urukiko uburyo ubwo bujura bwamuteye
ubwoba ndetse n’ingaruka bwagize ku buzima bwe nyuma yaho.
Kardashian
ntiyasabye miliyoni, yasabye €1
Nubwo imitako ye yari ifite agaciro
ka miliyoni nyinshi z’amadolari, Kardashian ntiyasabye urukiko kumuha
amafaranga angana n’agaciro k’ibyo yibwe.
Ahubwo we n’inshuti ye magara,
Simone Harouche, basabye guhabwa €1 buri umwe.
Harouche yari umuntu wari ushinzwe
kumwambika kandi na we yari muri hoteli igihe ubwo bujura bwabaga.
Mu itangazo Kardashian na Harouche
bahuriyemo nyuma y’icyemezo cy’urukiko, bagaragaje ko iyo ndishyi nto cyane
itari igamije kubaha amafaranga menshi, ahubwo yari ikimenyetso cy’uko
ibyababayeho byemejwe ndetse n’ababigizemo uruhare bakaryozwa ibyo bakoze.
Bavuze ko nyuma y’imyaka myinshi
ishize kuri ubwo bubabare, icyemezo cy’urukiko kibafasha gushyira akadomo kuri
icyo gice cy’ubuzima bwabo no gukomeza ubuzima.
Mu cyemezo cy’urukiko, Kardashian
na Harouche si bo bonyine bahawe indishyi.
Uwahoze ari umukozi ushinzwe
kwakira abantu muri Hôtel de Pourtalès, na we wagizweho ingaruka n’ubwo bujura,
yahawe €109,516, mu gihe hoteli yo yahawe €50,000.
Ibi bitandukanye n’indishyi
Kardashian yasabye, kuko we yashimangiye ko icyo yashakaga atari amafaranga,
ahubwo ko yashakaga ko ubutabera bwemeza ko yarenganyijwe.
Abakekwaho gukora ubwo bujura
bamenyekanye cyane mu itangazamakuru ry’u Bufaransa nka “les papys braqueurs”,
izina risobanura “abajura b’abasaza”.
Ni izina bahawe kubera imyaka bari
bafite. Benshi muri bo bari bafite imyaka iri hagati ya 60 na 70 igihe
baburanaga.
Ubu bujura bwabaye bumwe mu
byibanzweho cyane kubera uburyo abajura babashije kwinjira muri hoteli, gufata
Kardashian no gutwara imitako y’agaciro ka miliyoni nyinshi z’amadolari.
Nyuma y’imyaka hafi 10, urubanza
rwageze ku musozo ku bijyanye n’indishyi, Kardashian asigarana €1 yasabye
nk’ikimenyetso cy’uko ibyabaye kuri we byemejwe n’ubutabera.
Ku ruhande rwe, agaciro k’iyo ndishyi ntikangana n’amafaranga yatakaye muri ubwo bujura, ariko ku bwa Kardashian na Harouche, icyo cyemezo gifite ubusobanuro burenze amafaranga: ni ukwemeza ibyababayeho no gushyira iherezo ku rugendo rw’ubutabera rwamaze imyaka hafi icumi.
Urukiko rw’i Paris rwategetse ko
Kim Kardashian ahabwa indishyi y’iyero rimwe ni ukuvuga hafi 1800 Frw