Ni inama yateguwe ku nsanganyamatsiko igira iti: “Kwifashisha ubufatanye bwacu n'imikoranire y'akarere mu kurwanya ibyaha byambukiranya imipaka n’iterabwoba” izamara iminsi ibiri ihuza Komite esheshatu z’umuryango wa EAPCCO na Komite mpuzabikorwa ihoraho (PCC).
Muri izo Komite hari; Komite ishinzwe amahugurwa, ishinzwe kurwanya iterabwoba, ishinzwe amategeko, ishinzwe uburinganire, ishinzwe iperereza ku byaha na Komite ishinzwe kurwanya ibyaha by’ikoranabuhanga.
Ubwo yatangizaga ku mugaragaro iyi nama; mu izina ry’Umuyobozi Mukuru w’Umuryango EAPCCO; Umunyamabanga Mukuru w’Urwego rw’igihugu rw’Ubugenzacyaha; Col. (rtd) Pacifique Kayigamba Kabanda, yagarutse ku kamaro k’ubufatanye no kunga ubumwe mu guhagarika ubukana bw’ibyaha bikorwa mu karere.
Yagize ati: “Turimo guhura n’imbogamizi zikomeye. Ibyaha nko gucuruza ibiyobyabwenge, ibyaha byifashisha ikoranabuhanga, ubucuruzi bw’abantu n’iterabwoba bikomeje kwiyongera no gufata intera.
Abanyabyaha bambukiranya imipaka bitabagoye, bityo tugomba gukorera hamwe. Kunga ubumwe no guhuza ibikorwa ni cyo gikoresho cyacu gikomeye mu guhangana na bo.”
Yakomeje avuga ko iyi nama itagamije guhuza abahagarariye ibihugu bigize Umuryango wa EAPCCO gusa, ko icy’ingenzi ari intego imwe bahuriyeho yo kurwanya ibyaha no guteza imbere umutekano mu karere.
Ati: “Mu myaka ishize, Umuryango wa EAPCCO wakomeje gutera imbere. Binyuze mu bufatanye, twafashije imiryango yari yugarijwe, duhagarika ibikorwa by’udutsiko tw’abanyabyaha, tunateza imbere umutekano. Iyi ni intsinzi yagiye ituruka ku kubaka icyizere, ubufatanye no kwiyemeza.
Uyu munsi rero ntituri hano nk'abahagarariye ibihugu byacu gusa, twanahuye nk'abafatanyabikorwa bafite intego imwe yo kurwanya ibyaha no guteza imbere umutekano mu karere kacu."
Col (rtd) Kabanda yagaragaje ko hagomba kubaho gukomeza gukorera hamwe no kugendera ku ndangagaciro z'ibanze z’umuryango ari zo; ubumwe, ubufatanye n'umurimo, kandi hibukwa abapolisi batakaje ubuzima bwabo ubwo bari mu kazi, mu guha agaciro ubwitange bwabo no gukomera ku ndangagaciro zabaranze.
Umuhuzabikorwa w’Ubunyamabanga bw’Umuryango wa EAPCCO akaba n’umuyobozi wa Polisi Mpuzamahanga (Interpol) mu Karere, Africa Sendahangarwa Apollo, mu ijambo rye yavuze ko ubufatanye bw’akarere buhamye bugira uruhare runini mu guhangana n’ibyaha byambukiranya imipaka.
Yashimye ubushake n’imbaraga bishyirwa mu guhangana n’abanyabyaha binyuze mu bufatanye butuma umuryango wa EAPCCO uba intangarugero mu gushyigikira iyubahirizwa ry’amategeko mu Karere, ku mugabane no hanze yawo, yizeza ko hakomeza kurushaho kwimakazwa imikoranire nk’uko bigaragazwa n’abahagarariye ibihugu bigize umuryango ndetse n’abafatanyabikorwa batandukanye bitabiriye iyi nama.
Umuryango wa EAPCCO ugizwe n’ibihugu 14, ari byo; u Rwanda, Uganda, Kenya, Tanzania, u Burundi, Ibirwa bya Comores, Ethiopia, Eritrea, Djibouti, Sudani, Sudani y'Epfo, Repubulika Iharanira Demokarasi ya Congo, Seychelles na Somalia.
Iyi nama y’iminsi ibiri ihuza komite zigize umuryango EAPCCO yitezweho kurushaho guteza imbere ubufatanye, gusangira amakuru ajyanye n’iperereza, no kunoza ingamba zifatika zo kurwanya ibyaha byambukiranya imipaka, hagamijwe kurushaho guteza imbere umutekano w’akarere.
