Iki gikorwa cyabaye nyuma y'uko Guverinoma y'u Rwanda itangije gahunda yo guhangana n'ibinyobwa bitujuje ubuziranenge, bikomeje guteza ibibazo bikomeye by'ubuzima birimo impfu n'ubumuga. Muri uru rwego, hamaze gufungwa inganda zirenga 130 zikora cyangwa zikwirakwiza ibi binyobwa.
Mu rwego rwo gushyira mu bikorwa izi ngamba, Ikigo cy'Igihugu gishinzwe Ibiribwa n'Imiti (Rwanda FDA) cyategetse ko ibikorwa byose byo kwamamaza ibinyobwa birebwa n'iki cyemezo bihagarikwa, ndetse n'ibyapa byose bibyamamaza bigakurwaho mu gihugu hose.
Nk’uko byatangajwe na Polisi y’u Rwanda, igikorwa cyo kumena Etanolo cyakozwe ku bufatanye bw'inzego z'umutekano n'iz'ibanze mu Mujyi wa Kigali, hagamijwe gukuraho iki kinyabutabire gikoreshwa mu buryo bunyuranyije n'amategeko mu gukora inzoga zitujuje ubuziranenge.
Umuvugizi wa Polisi mu Mujyi wa Kigali, Chief Inspector of Police (CIP) Wellars Gahonzire, yavuze ko litiro zamenwe zakusanyijwe mu turere dutatu tugize Umujyi wa Kigali, aho zari zarafashwe zikabikwa ahantu hizewe mbere yo kuzimenwa.
Yagize ati: "Izi litiro zamenwe uyu munsi ni izakusanyijwe mu turere dutatu tugize Umujyi wa Kigali zihurizwa ahantu hizewe kugira ngo zirindirwe umutekano hamwe zikuwe aho zari zibitse. Igikorwa rero cyo gukomeza gushaka n'izindi kuko hari abakizibitse kizakomeza."
CIP Gahonzire yagaragaje ko ibikorwa byo gushakisha Etanolo n'ibindi binyobwa bitujuje ubuziranenge bizakomeza hirya no hino mu gihugu, ashimangira ko intego ari ukurengera ubuzima n'umutekano by'abaturage.
Yagize ati: "Turagira inama umuntu wese uziko yaba afite ibi binyobwa n'iki kinyabutabire ko yatanga amakuru bigakusanyirizwa hamwe bikamenwa kuko ibikorwa byo kubishaka ntibizigera bihagarara kandi uzabifatanywa azahanwa.
Turagira inama kandi abaturage kwirinda kunywa ibinyobwa byose bitujuje ubuziranenge kuko bibangiriza ubuzima, ndetse bakaduha amakuru ku gihe y'aho babibonye."
Minisiteri y'Ubuzima yatangaje ko mu mezi arindwi ya mbere y'uyu mwaka, abantu 50 bamaze guhitanwa n'inzoga zitujuje ubuziranenge, mu gihe abarenga 100 bahuye n'ikibazo cy'ubuhumyi kubera zo, abandi benshi bagahura n’ibibazo byumutima n’impyiko.
Ku rundi ruhande, Urwego rw'Igihugu rw'Ubugenzacyaha (RIB) rwatangaje ko iperereza rimaze iminsi rikorwa ku bakora n'abakwirakwiza ibinyobwa bitujuje ubuziranenge ryatumye abantu barenga 61 bafungwa, mu gihe abandi bagishakishwa.
Mu byaha bakekwaho harimo guha umuntu ikintu gishobora kwica cyangwa gushegesha ubuzima bwe, icyaha giteganywa n'amategeko y'u Rwanda, gihanishwa igifungo kiri hagati y'imyaka ibiri n'itatu n'ihazabu iri hagati ya 300,000 Frw na 500,000 Frw.
Mu gihe icyo kinyobwa cyateye uwagihawe indwara idakira cyangwa ingaruka zikomeye ku buzima, ibihano birushaho gukomera, aho uwahamwe n'icyo cyaha ashobora guhanishwa igifungo kuva ku myaka 20 kugeza kuri 25, hamwe n'ihazabu iri hagati ya 500,000 Frw na miliyoni 1 Frw.
Leta ikomeje gusaba abaturage kugira uruhare mu kurwanya ibinyobwa bitujuje ubuziranenge batanga amakuru ku gihe ku babikora, ababicuruza cyangwa ababibika, mu rwego rwo gukumira ingaruka zikomeje guterwa n'ibi binyobwa ku buzima bw'Abanyarwanda.