Amakuru y'urupfu rwe yatangajwe n'umuryango we ndetse n'ikipe ya Newcastle United, imwe mu makipe yasizemi amateka akomeye. Muri Mutarama 2026 ni bwo byari byatangajwe ko Keegan ari kuvurwa kanseri, mbere y'uko muri Kamena ubwe atangaza ko yari ageze ku rwego rwa kane rw'iyi ndwara.
Mu butumwa Newcastle United yashyize hanze, yavuze ko yabuze umwe mu bantu bafite amateka akomeye kandi bakunzwe cyane muri iyi kipe. Yagize iti: "Twakiriye inkuru y'incamugongo y'urupfu rwa Kevin Keegan".
Yari umwe mu bantu bafite amateka akomeye, bagize uruhare rukomeye mu mateka ya Newcastle United. Nk'umukinnyi yazanye icyizere n'impano zidasanzwe, naho nk'umutoza yatumye abafana bongera kwizera ikipe yabo."
Keegan yavutse muri Gashyantare 1951, atangira gukina muri Scunthorpe United mbere yo kwerekeza muri Liverpool mu 1971, aho yahinduye amateka.
Mu myaka itandatu yamaze muri Liverpool yakinnye imikino 323, atsinda ibitego 100, anatwarana n'iyi kipe ibikombe bitatu bya Shampiyona y'u Bwongereza, FA Cup, UEFA Cup ebyiri ndetse na European Cup.
Mu 1977 yerekeje muri Hamburger SV yo mu Budage, aho yakomeje kwigaragaza kugeza yegukanye Ballon d'Or inshuro ebyiri zikurikiranya mu 1978 no mu 1979, aba kugeza n'ubu ari we mukinnyi rukumbi w'umwongereza wabigezeho.
Nyuma yaho yagarutse mu Bwongereza akinira Southampton na Newcastle United mbere yo gusezera ku mupira mu 1984 afite imyaka 33.
Mu ikipe y'igihugu y'u Bwongereza ho yakinnye imikino 63 atsinda ibitego 21, anayibera kapiteni inshuro 31 hagati ya 1972 na 1982. Nyuma yo guhagarika gukina yahise yinjira mu butoza, atangira gutoza Newcastle United mu 1992.
Yayifashije kuva mu bibazo byo kumanuka mu cyiciro cya gatatu ayigarura mu rwego rwo hejuru, ndetse ayigira imwe mu makipe yakinaga umupira ushimisha abafana benshi.
Muri shampiyona ya 1995/96, Newcastle yayoboye urutonde igihe kinini ariko iza gutwarwa igikombe na Manchester United ku munota wa nyuma.
Naho mu 1999 yagizwe umutoza w'ikipe y'igihugu y'u Bwongereza asimbuye Glenn Hoddle, ariko yeguye mu 2000 nyuma yo gutsindwa n'u Budage mu mukino wo gushaka itike y'Igikombe cy'Isi cya 2002. Icyo gihe yavuze amagambo yasigaye azwi cyane agira ati: "Sinari nkiri umuntu ukwiriye aka kazi."
Nyuma yatoje Manchester City, aza no gusubira muri Newcastle United mu 2008, gusa urugendo rwe rwa kabiri rwamaze amezi umunani kubera kutumvikana n'ubuyobozi bw'iyi kipe.
Mu buzima bwe bwose nk'umukinnyi, Kevin Keegan yakinnye imikino 592 atsinda ibitego 204 mu makipe atandukanye, anaba umwe mu bakinnyi n'abatoza basize amateka akomeye mu mupira w'amaguru w'u Bwongereza