Aba barwayi bari bamaze igihe bavurirwa mu bitaro, barekuwe ku wa Kabiri nyuma yo kugaragaza ibimenyetso by'uko ubuzima bwabo bwongeye kumera neza.
Mu itangazo ryasohowe na Minisiteri y'Ubuzima ya Kenya, yatangaje ko abandi barwayi babiri banduye Ebola bakiri mu bitaro byo mu murwa mukuru Nairobi, aho bakomeje kwitabwaho n'abaganga.
Kugeza ubu, abantu icyenda ni bo bamaze kwemezwa ko banduye Ebola muri Kenya, muri bo babiri bakaba baritabye Imana.
Iyi minisiteri kandi yatangaje ko kuva ku wa 19 Ukwakira 2026 nta wundi muntu mushya uragaragaraho ubwandu bwa Ebola.
Mu rwego rwo gukumira ikwirakwira ry'iyi ndwara, abantu 46 bari barahuye n'umurwayi wa mbere banduye Ebola barekuwe aho bari barashyizwe mu kato, nyuma yo kurangiza igihe cyagenwe cyo gukurikiranwa. Aba biyongereye ku bandi 20 bari barekuwe ku wa 26 Ukwakira.
Abandi bantu 52 baracyari mu kato, aho biteganyijwe ko bazarekurwa bitarenze ku wa 11 Ugushyingo 2026, nibamara kuzuza iminsi 21 bakurikiranwa kuva bahuye n'umuntu wari wanduye.
Icyorezo cya Ebola cyatangiriye muri Repubulika Iharanira Demokarasi ya Congo muri Gicurasi 2026, mbere yo kugera muri Kenya.
Ibi byatumye havuka impungenge ku mikorere y'ubugenzuzi bw'ubuzima ku mipaka, cyane cyane mu gukumira abantu bashobora kuba bafite virusi binjira mu gihugu.
Ebola imaze gutangazwa mu bihugu bine byo muri Afurika y'Iburasirazuba, Afurika yo Hagati n'Afurika y'Iburengerazuba, bikomeza gutuma inzego z'ubuzima zishyira imbaraga mu gukumira ikwirakwira ryayo.