Ibi bivugwa byabaye mu kwezi gushize hafi y'ikigo cy'imyitozo cy'ingabo z'u Bwongereza cyitwa BATUK (British Army Training Unit Kenya), hafi y'umujyi wa Nanyuki, uri mu ntera ya kilometero 200 mu Majyaruguru y'umurwa mukuru Nairobi.
Uwo mugabo yatawe muri yombi abazwa ibibazo, bijyanye n'icyo gikorwa bivugwa ko cyabaye ubwo itsinda ry'abasirikare ryajyaga mu kabari kari muri uwo mujyi. Iperereza riri gukorwa n'umutwe ushinzwe imyitwarire mu gisirikare ('military police') cy'Ubwongereza, mu itsinda rikurikirana ibyaha bikomeye mu gisirikare.
Ejo Minisiteri y'ingabo z'u Bwongereza yemeje ko uyu musirikare yatawe muri yombi muri Kenya. Yavuze ko imyitwarire mibi itemewe mu gisirikare cyabo.
Mu itangazo yashyize hanze yagize iti"Imyitwarire itemewe kandi y'ubugizi bwa nabi nta mwanya na busa ifite mu ngabo ndetse amakuru ayo ari yo yose y'icyaha gikomeye gikozwe n'umusirikare uri mu kazi akorwaho iperereza mu buryo bwigenga".
Ibi byo gufata ku ngufu bivuze ku umusirikare wo mu kigo cy'ingabo z'u Bwongereza kiri muri Kenya nyuma y'ibindi birego byabayeho aho umusirikare wo muri iki kigo yagize uruhare mu kwica umugore w'Umunya-Kenya mu mwaka wa 2012.