Igitaramo cyabereye muri Stade Nyayo i Nairobi ku wa Gatandatu tariki ya 20
Ukuboza 2025, aho Karen Lojore, wari ufite imyaka 20, yapfuye ubwo abantu
benshi bageragezaga kwinjira mu gitaramo, bitewe n’umubyigano.
Mu butumwa yanyujije kuri Instagram, Asake yavuze ko
byamubabaje cyane, yifatanyije n’umuryango, inshuti n’abakunzi ba Karen.
Yijeje ko azatanga ubufasha no gukora ibishoboka byose kugira
ngo hamenyekane icyateye iyo mpanuka, anasaba ko ababa bafite uruhare muri ibyo
bakurikiranwa. Yifurije iruhuko ridashira Karen.
Polisi ya Kenya yemeje ko uwo mwana yapfiriye hafi
y’umuryango winjira muri stade, itangaza ko igitaramo cyakomeje nyuma y’iyo
mpanuka.
Umuvugizi wa Polisi yavuze ati: "Mu gitaramo cyabereye
Stade Nyayo, habaye umubyigano muto ku muryango winjira. Nubwo ibintu byaje
guhosha kandi abakunzi bashoboye kwinjira, hari umuntu umwe w’imyaka 20
wapfiriye aho hantu."
Umuyobozi w’igitangazamakuru Tukutane Entertainment,
cyateguye igitaramo, nawe yemeje ibyabaye, asaba abantu kubaha umuryango wa
Karen no kudakwirakwiza ibihuha.
Yongeyeho ko bakorana n’inzego z’umutekano kugira ngo
hamenyekane neza uko byagenze, kandi bifuza gukorana n’abashinzwe iperereza mu
mucyo no mu buryo bwitondewe.
Igitaramo cya Asake cyari cyarakozwe ku bufatanye n’umuhanzi
Gabzy [Uherutse i Kigali tariki 21 Ukuboza 2025 mu gitaramo cyabereye muri Mundi Center]; muri stade ifite ubushobozi bwakira abantu 18,000.
Asake yatangaje ko iby’iki gitaramo byari mu rugendo rwe
rw’ibitaramo muri Afurika muri iki gihe.
Si ubwa mbere Asake ahura n’ikibazo nk’iki; mu Ukuboza 2022,
abantu babiri basize ubuzima mu gitaramo cye i London (Brixton Academy) kubera
umubyigano w’abantu. Yari yatangaje icyo gihe ko abyicuza cyane, ndetse ko
yakoranye na Polisi kugira ngo hamenyekane icyateye iyo mpanuka.
Asake yihanganishije umuryango wa Karen Lojore [Uri iburyo] nyuma
y’umubyigano mu gitaramo cye i Nairobi asaba inzego zibishinzwe gukurikirana
kugirango batange ubutabera ku muryango w’uyu mwana