Uwo murwayi mushya ni umugabo w’imyaka 39, wo mu muryango wa hafi w’umuntu wa mbere wahitanywe n’iyi ndwara muri Kenya.
Nk’uko abashinzwe ubuzima babitangaje, uyu mugabo yari yarashyizwe mu kato kandi akurikiranwa buri munsi. Ku wa Kabiri, tariki ya 13 Ukwakira 2026, yatangiye kugaragaza ibimenyetso birimo kugira umuriro mwinshi, umunaniro n’ububabare mu ngingo.
Ibizamini byakorewe muri Laboratwari y’Igihugu isuzuma indwara ziterwa n’udukoko no muri laboratwari ya KEMRI-CDC byemeje ko yanduye Ebola. Kugeza ubu, arimo kwitabwaho n’abaganga mu kigo cyagenewe kuvurirwamo abarwayi b’iyi ndwara.
Kenya imaze kwemeza abantu babiri banduye Ebola, mu gihe uwa Mbere yitabye Imana.
Minisiteri y’Ubuzima yatangaje ko hamaze kumenyekana abantu 128 bahuye n’umurwayi wa mbere. Muri bo, 113 bamaze kuboneka, barimo 108 bashyizwe mu kato muri Kenya kugira ngo bakurikiranwe mu gihe cy’iminsi 21, mu gihe abandi batanu bari hanze y’igihugu.
Abantu 15 basigaye ntibaraboneka, mu gihe inzego z’ubuzima zikomeje kubashakisha. Hanashakishwa abandi bantu bashobora kuba barahuye n’umurwayi wa kabiri kuva yatangira kugaragaza ibimenyetso.
Abategetsi ba Kenya bavuga ko abarwayi bombi bafitanye isano, ariko ko kugeza ubu nta bimenyetso bigaragaza ko Ebola yatangiye gukwirakwira mu bandi baturage.
N'ubwo iki gihugu cyemeje ko cyongeye kugira umurwayi wa Ebola, imbibi zacyo ziracyafunguye. Nta ngendo, ubucuruzi cyangwa amakoraniro rusange byahagaritswe kubera iyi ndwara.