Kellia Kaneza yegukanye ikamba rya Miss Burundi mu birori byitabiriye n’umugore wa Perezida Ndayishimiye - AMAFOTO

Ni ibirori byari byitezwe cyane n’abakurikirana umuco n’ubwiza, aho abakobwa 15 bari basigaye mu cyiciro cya nyuma bahataniye ikamba ry’ubwiza riherekejwe n’ibisobanuro bikomeye kuri ejo hazaza h’u Burundi.

Kellia Kaneza ntiyegukanye gusa ikamba, ahubwo yatashye n’ibihembo bikomeye birimo: Imodoka nshya ya Skyline ikoresha umuriro w’amashanyarazi, yatanzwe na Banki ya CRDB, Miliyoni 25 z’amarundi, Itike y’indege izamujyana mu rugendo rwo kwiga muri Ethiopia, Buruse y’umwaka umwe mu cyiciro cya Kaminuza, Mudasobwa nshya na Telefone igezweho.

Mu bandi begukanye amakamba harimo: Quessia Kubwarugira, wabaye igisonga cya mbere, Tania Bazahica, igisonga cya kabiri, Monica Celeste Mugisha, Miss Popularité, Nelly Charlène Iteka, Miss Développement na Jennifer Mugisha wabaye Miss Photogénique.

Ibi birori byaranzwe n’imbyino z’umuco gakondo, imideli yihariye iranga akarango k’u Burundi, aho abakobwa bambaye imyambaro ikozwe mu biti, bafite ibisabo n’ibyansi by’umuco. Byari ibyishimo byuzuye imbere y’imbaga y’abatumiwe.

Madamu wa Perezida, Angeline Ndayishimiye, yavuze ko gukorera igihugu bitagarukira ku myambaro no ku masura meza, ahubwo ko bikwiye kuzanwa no gutekereza iterambere.

Yunzemo ati:"Umukobwa w’Uburundi akwiye kuba inyangamugayo, usobanutse, ushoboye kandi wiyemeje kugira uruhare mu cyerekezo cy’igihugu kigana 2040-2060."

Rossalynn Kamariza, uyobora INGO itegura Miss Burundi, yibukije nyampinga mushya ko ikamba atari indangamuntu y’ubwiza, ahubwo ko ari urubuga rwo kugaragaza ubwenge, ubushobozi n’icyerekezo kizima. Ati: "Miss Burundi si ikanzu nziza izakujyana kure, ahubwo ni ibikorwa bizatuma uba icyitegererezo."

Ibirori byari byashushanyije neza umuco w’Uburundi, aho abakobwa bari bambaye imyambaro gakondo, batambuka baririmba, babyina imbyino za kinyafurika kandi bagaragaza imigambi y’imishinga yabo imbere y’akanama nkemurampaka.

Umufasha w’Umukuru w’Igihugu yanasabye abakobwa bose bahatanye mu marushanwa y’ubushize n’uyu mwaka kwishyira hamwe bagashinga cooperative, kugira ngo bakomeze gutera imbere no nyuma y’irushanwa.

Umugore wa Perezida w'u Burundi, Angeline Ndayishimiye yashimye Kellia Lagloire Kaneza wegukanye ikamba rya Miss Burundi

Angeline Ndayishimiye yasabye abakobwa begukanye ikamba kwishyira hamwe bagashinga ‘Cooperative’

Kellia Lagloire Kaneza mu byishimo by’intsinzi nyuma yo kwambikwa ikamba rya Miss Burundi 2025 

Yatsindiye imodoka nshya, miliyoni 25 z’amarundi n’amahirwe yo kwiga muri kaminuza 

Umugore w’Umukuru w’Igihugu, Angeline Ndayishimiye, yitabiriye ibirori bya Miss Burundi. Yatanze impanuro ku bakobwa, abashishikariza kuba intangarugero mu iterambere 

Aba bakobwa 15 bari bahataniye ikamba, berekanye umuco n’ubwiza bw’akaranga k’i Burundi

Uru ni urugori rw’intsinzi, ariko n’inshingano nshya ku gihugu cyanjye, Kellia Kaneza nyuma yo kuba Miss Burundi 2025

Ndayizeye Lellie Carelle wegukanye ikamba rya Miss Burundi 2023, yambitse ikamba mugenzi we wamusimbuye, Kellia Kaneza

Uko byatangiriye ni inzozi, uko birangiye ni amateka -Miss Burundi 2025

Ibyishimo bidashira! Kellia Kaneza yambitswe ikamba rya Miss Burundi 2025 mu birori by’imbaturamugabo

Umunyarwenya Michael Sengazi ari mu bayoboye umuhango w'ibirori byo gutangaza Miss Burundi 2025

Rossalynn Kamariza, uyoboye INGO itegura Miss Burundi, yibukije ko ubwenge ari bwo butanga icyerekezo kirambye

Kellia Lagloire Kaneza yashyikirijwe imodoka yatsindiye

Kellia Lagloire Kaneza yashyikirijwe sheki ya Miliyoni 25.000.000 BIF

Quessia Kubwarugira wabaye igisonga cya mbere yahembwe 15.000.000 BIF 

Tracy Nabukeera wabaye Miss Tanzania 2023; Natasha Nyonyozi wegukanye ikamba rya Miss Uganda 2024 ndetse na Derartu Tesfaye Etana wabaye Miss Tourism Oromia muri Ethiopia bitabiriye ibirori byatorewemo Miss Burundi 2025