Nk’uko byatangajwe n’umuryango
we, Kelley Klebenow yitabye Imana ku wa Gatandatu tariki ya 2 Kanama 2025, agwa iwabo i Cincinnati muri Leta ya Ohio, nyuma y’imyaka arwana n’iyi ndwara igira
ingaruka ku bwonko n’umugongo.
Mack yatangiye kugaragara
muri sinema akiri umwana, ubwo yagaragazaga urukundo rwo gufata amashusho n’inkuru,
amaze guhabwa camera nk’impano y’amavuko. Yaje kwandika izina mu ruganda rwa
filime muri Leta Zunze Ubumwe za Amerika binyuze mu myanya y’ingenzi yagiye
akinamo.
Yamamaye cyane ubwo yakinaga yitwa Addy muri The Walking
Dead (season 9), Penelope Jacobs muri Chicago Med (season 8) ndetse no kuri shene ya FOX mu kiganiro 9-1-1. Yanakoze ibikorwa byinshi byo
kwamamaza ibigo bikomeye nka Dr. Pepper, Ross Stores, Dairy Queen na
Chick-fil-A, anagaragaza impano ye mu gutunganya amajwi.
Muri rusange, Mack yari
afite uburambe mu ruganda rwa Sinema yagaragayemo nk’umukinnyi wa filime, hamwe
n’imishinga 5 yakoze nk’umwanditsi n’umuyobozi (producer). Yarangwagaga
n’ishyaka, ubupfura n’ubwitange byatumye yubahwa n’abakorana na we
n’abamukurikira.
Mu butumwa bwatangajwe
n’umuryango we kuri konti ye ya Instagram no ku rubuga CaringBridge, bavuze ko Mack yapfuye mu mahoro, bamwibuka
nk’“umucyo udacogora, utazibagirana mu mitima y’abakundaga ibihangano bye
n’umutima we mwiza.”
Alanna Masterson,
bakinanye muri The Walking Dead,
yavuze ko yamubonaga nk’umuntu wihariye, agira ati: “Kelley yari umuntu
w’igitangaza. Nishimira cyane kuba twari kumwe mu gice cya nyuma twakinanye.”
Yize amashuri yisumbuye
muri Hinsdale Central High School
mbere yo gukomereza muri Kaminuza ya Chapman
University ahazwi nka Dodge
College of Film and Media Arts muri California, aho yakuye
impamyabumenyi mu gukina no gukora amafilime.
Yasize ababyeyi be,
Kristen na Lindsay Klebenow; ndetse n'abavandimwe be Kathryn na Parker; ndetse n’umusore bakundanaga witwa Logan
Lanier.
Ibirori byo kumusezeraho
bizabera muri Glendale Lyceum,
i Glendale, muri Ohio ku wa 16 Kanama 2025. Hazakurikiraho ibirori byo
kumwibuka bizabera i Los Angeles, bigamije guha icyubahiro umurage yasize mu
ruganda rwa filime.
