Kaya Byinshi yahagarariye neza u Rwanda mu iserukiramuco ‘Sauti za Busara’ rifatwa nk'irya mbere muri Afrika

Sauti za Busara ifatwa nk’imwe mu nkingi zikomeye z’umuziki wa Afurika, ikaba ihuza abahanzi, abategura ibitaramo, abashakashatsi n’abakunzi b’umuziki baturutse impande zose z’Isi. Kwinjira muri iri serukiramuco ni intambwe ikomeye ku muhanzi uwo ari we wese, bityo ku munyarwanda bikaba ari inkuru ikomeye ku muziki w’igihugu.

Mu gitaramo cye, Kaya Byinshi yafashwe nk’umuhanzi ujyana abamureba mu rugendo rwa roho binyuze mu muziki ushingiye ku muco, imizi n’inkuru z’ubuzima bwa buri munsi. Abitabiriye iri serukiramuco bagaragaje ko umuziki we wumvikanye nk’uwivugira, utagira imipaka y’indimi cyangwa ibihugu.

Uyu muhanzi ntiyagarukiye ku gutaramira gusa, kuko yanagize uruhare mu bikorwa bigamije guhuza umuziki n’inganda zawo, cyane cyane mu biganiro bya “Movers & Shakers Session 2”, byagarukaga ku nsanganyamatsiko yubakiye ku “rusobe rw’amaserukiramuco y’umuziki rutangiza rugendo rw’umuhanzi, rukamufasha kubaka umwuga we, ndetse rukagira uruhare mu gushyiraho ahazaza h’inganda z’umuziki.”

Muri ibi biganiro, Kaya Byinshi yiri kumwe n’abarimo Pilani Bubu (wo muri Afurika y’Epfo, akaba n’umuyobozi wa Folklore Festival) na Isack Abeneko (uyobora Marafiki Festival i Dar es Salaam), baganira ku kamaro k’amaserukiramuco mu kubaka izina ry’umuhanzi no gutuma umuziki ugira aho ugera.

Kaya Byinshi mu mushinga w’ubuhanzi uhuza Afurika

Kimwe mu byaranze cyane Sauti za Busara 2026 ni umushinga wa Swahili Encounters, uhuza abahanzi baturutse hirya no hino muri Afurika icyumweru mbere y’iserukiramuco, bagahurira hamwe bagahana ibitekerezo, bakandika indirimbo nshya kandi bagasobanura izisanzwe mu buryo bushya.

Uyu mushinga warimo abahanzi barimo Ahamada Smis (Comoros), Irene Labdi (Kenya), Seby Ntege (Uganda), ndetse n’abandi benshi bo muri Tanzania.

Kuba Kaya Byinshi yari muri iri tsinda, byagaragaje icyizere ahabwa nk’umwe mu bahanzi Afurika ifitemo icyizere mu muziki w’umuco n’uw’ubutumwa.

Kuri iyi nshuro ya 23, Sauti za Busara yari yihariye kuko yahindutse iserukiramuco rinini rimara iminsi ine rifite ibyiciro byinshi.

Ryari riyobowe n’icyamamare mu muziki wa Afurika, Salif Keita wo muri Mali, n’ubwo atabashije kuririmba kubera ibibazo by’ubuzima, abana be bakamuserukira ku rubyiniro.

Abandi bahanzi bakomeye bari muri iri serukiramuco barimo Ben Pol (Tanzania), Atanda & Afrojazz Messengers (Nigeria/UK), Nara Couto (Brazil), Lindigo (Réunion), Seby Ntege (Uganda), Pilani Bubu (South Africa), Hammer Q wo muri Zanzibar wakomeje gutaramira abafana n’igihe imvura yagwaga, agaragaza ko umuziki utahagarikwa n’ikirere.

Iri serukiramuco ryibanze ku gushyira imbere umuco, impano z’aho rikorwa, n’abahanzi b’abagore.

Kwitabira Sauti za Busara 2026 kwa Kaya Byinshi si intsinzi ye bwite gusa, ahubwo ni intambwe ikomeye ku muziki nyarwanda, werekana ko impano zo mu Rwanda zifite ubushobozi bwo guhangana ku rwego rwa Afurika n’Isi.

Ni ubutumwa bugaragaza ko umuziki ushingiye ku muco n’ukuri kw’ubuzima ushobora kugera kure, ugahuza abantu batandukanye, ugasakaza isura nziza y’igihugu.

Kaya Byinshi yanditse amateka aba umunyarwanda rukumbi watumiwe mu Iserukiramuco mpuzamahanga rya Sauti za Busara 2026 i Zanzibar, aho yaserukiye u Rwanda mu muziki ushingiye ku muco n’imizi nyarwanda 

Mu rubyiniro rwa Sauti za Busara 2026, Kaya Byinshi yajyanye abitabiriye iri serukiramuco mu rugendo rwa roho n’umuco, agaragaza ko umuziki nyarwanda ufite ijambo ku ruhando rwa Afurika

Kaya Byinshi yaserukiye igihugu muri Sauti za Busara 2026, iserukiramuco rifatwa nk’irya mbere mu muziki wa Afurika

Usibye gutaramira abafana, Kaya Byinshi yanagize uruhare mu biganiro bya Movers & Shakers muri Sauti za Busara 2026, byagarukaga ku kamaro k’amaserukiramuco mu guteza imbere inganda z’umuziki