Katy Perry yatunguwe n'umufana wamusanze ku rubyiniro agatangira kumukorakora

Amashusho yakwirakwiye ku mbuga nkoranyambaga agaragaza Perry w’imyaka 40 ari kuririmba indirimbo ye “Hot N Cold”, ari kumwe n’itsinda rimucurangira, ubwo umusore yihutiraga kuzamuka ku rubyiniro, agashyira ukuboko ku rutugu rw’uyu muhanzikazi.

Perry yahise yegera ku ruhande yihuta, yirinda uyu mufana wari utangiye gusimbuka mu buryo butunguranye, arangije atangira kubyina imbyino isanzwe izwi cyane mu rubyiruko, itamenyerewe mu bitaramo nk’ibyo.

Abashinzwe umutekano bahise bamubona, bagerageza kumufata ariko birabagora, kuko uwo musore yakomezaga kubigobotora. Nubwo Perry yari agikomeje kuririmba, yagaragaje ubwoba ndetse avuga ijambo ryatumye benshi baseka nubwo ibintu bitari bisanzwe.  Ati: “Ntihazongera kubaho ikindi gitaramo nk’iki. Nimususuruke, Sydney!”

Yakomeje kuririmba indirimbo ye yamenyekanye mu 2008, mu gihe abashinzwe umutekano babiri bari bamaze kujyana wa mufana ku ruhande. Haje no kwiyongeraho abandi babiri bafatanyije n’abo mbere, bamukura burundu ku rubyiniro.

Si ubwa mbere Perry ahuye n’ibintu bitunguranye mu bitaramo bye. Ku wa 17 Gicurasi 2025, mu gitaramo i Las Vegas, Perry yagarutse ku kibazo cy’umufana wari umaze igihe yandikira umugabo we bitegura kurushinga, umukinnyi wa filime Orlando Bloom.

Mu mvugo yuje urwenya, yabwiye uwo mufana ati: “Ufite akamwenyu keza. Ndabizi impamvu uri hano. Ariko niba ukomeje kwandikira umugabo wanjye... Oya se ni wowe Kyle? Ndabizi, umaze amezi menshi ubikora kuva aho natangiriye ibi bitaramo bya [Play].”

Muri icyo gitaramo kandi, Perry yahuye n’ikindi kibazo cy’imyambaro ubwo yaririmbaga indirimbo ye “Part of Me” yasohotse mu 2012. Mu mashusho yakwirakwiye kuri TikTok, Perry yumvikanye avuga ati: “Mana yanjye, agapfukamunwa kanjye kagiye kunyambika ubusa!”

Yahise ahindura imigendere n’imbyino, agaragaza ko ari kubyina yitonze nkana, mu rwego rwo kwirinda ikibazo gikomeye cyari hafi kumubaho.

Nubwo Perry yahuraga n’ibitunguranye, ntiyigeze ava ku izima. Yakomeje igitaramo cye nta nkomyi, ashimirwa cyane n’abafana be bari baje kumushyigikira i Sydney.

Urugendo rwe rw’ibitaramo “Lifetimes Tour” rurakomeje, aho igitaramo gikurikira giteganyijwe kuri uyu wa Kabiri tariki ya 10 Kamena 2025, muri Qudos Bank Arena, mu mujyi wa Sydney.

Katy Perry yarakajwe n'umufana wamusanze ku rubyiniro mu buryo butunguranye maze agatangira kumufata ku rutugu

Ari mu rugendo rw'ibitaramo yise 'Lifetimes Tour'