Ni igikorwa cyabaye kuwa 29 Gicurasi 2025, kibera ku rwibutso rwa Jenoside rwa Rubengera mu Karere ka Karongi mu Murenge wa Rubengera. Cyitabiriwe n'abakozi ba Inkunga Finance Plc, abayobozi bayo, abanyamuryango bayo, inshuti n'abavandimwe. Bunamiye abanyamuryango b'iki kigo bishwe muri Jenoside yakorewe Abatutsi mu 1994.
Umuyobozi Mukuru wa Inkunga Finance Plc, Abed Cheilif, yavuze ko iki gikorwa cyo #Kwibuka31 ari umwanya wo kuzirikana uruhare rukomeye rw’abanyamuryango bayishinze ndetse bagize uruhare mu gutangiza ibikorwa by’ubwizigame no guteza imbere ubukungu bw’abaturage, bakaba barishwe urupfu rw'agashinyaguro bazira uko Imana yabaremye muri Jenoside yakorewe Abatutsi.
Yagize ati: "Kwibuka ni inshingano yacu nk’urwego rufite inkomoko mu bumwe n’ubufatanye mu iterambere ry'igihugu. Ababayeho mbere yacu bakoze byinshi, natwe tugomba gukomeza umurage wabo mu guharanira iterambere rirambye rishingiye ku ndangagaciro z’ubumwe, ukuri n’ubwiyunge. Kwibuka ni uguha agaciro amateka no gukomeza umurage w’ubwitange."
Habimana Jean Nepomuscene yasobanuriye abitabiriye iki gikorwa amateka ya Jenoside yakorewe Abatutsi mu 1994. Kanyabashi Anastase wanabaye n'umucungamutungo mu yahoze ari Komini Mabanza, yavuze byinshi mu rugendo rw'inzitane yanyuzemo muri Jenoside yakorewe Abatutsi , anagaragaza uruhare Inkunga Finance Plc imaze kumufasha mu kwiyubaka magingo aya, dore ko ari umucuruzi mu mujyi wa Bwishyura.
Uwari uhagarariye Ibuka yagarutse ku nsanganyamatsiko igihugu kigenderaho aho #KwibukaTwiyubaka byagizwe intego idateze kwibagirana. Hanatanzwe ubuhamya bw’abarokotse Jenoside yakorewe Abatutsi yahitanye abarenga miliyoni mu minsi 100 gusa.
Mu batanze ubuhamya harimo n’abasuwe na Inkunga Finance Plc bo muri Rutsiro ahitwa Gihango, aho bagarutse ku buryo bagenzi babo bishwe urw’agashinyaguro ndetse n’uruhare Inkunga Finance PLC yagize mu kubafasha kuva mu bibazo bikomeye bahuye nabyo nyuma ya Jenoside yakorewe Abatutsi.
Inkunga Finance Plc yagaragaje ko Kwibuka atari igikorwa cy’umunsi umwe gusa, ahubwo ari urugendo rw’igihe kirekire rwo guharanira ko Jenoside itazongera kubaho ukundi. Yiyemeje gukomeza gutanga serivisi z’imari zinoze zifasha mu kwiteza imbere, ahanini igamije gukomeza umurage w’abayishinze.
Ubuyobozi bwa Inkunga Finance Plc bwasabye abanyarwanda gukomeza kwibuka biyubaka, gushyigikira abarokotse Jenoside yakorewe Abatutsi no kurwanya ingengabitekerezo ya Jenoside mu nzego zose. Bwasabye kandi abanyamuryango gukomeza gufatanya nk’uko byakozwe n’abababanjirije, kugira ngo ibikorwa by’iterambere by'ikigo bikomeze gufasha Abanyarwanda kugera ku bukungu burambye.
DORE UKO IKI GIKORWA CYAGENZE MU MAFOTO:
Inkunga 𝗙𝗶𝗻𝗮𝗻𝗰𝗲 𝗣𝗹𝗰 y𝗶𝗯𝘂𝘁𝘀𝗲 a𝗯𝗮𝗻𝘆𝗮𝗺𝘂𝗿𝘆𝗮𝗻𝗴𝗼 𝗯𝗮𝘆𝗶𝘀𝗵𝗶𝗻𝘇𝗲 𝗯𝗮𝘇𝗶𝘇𝗲 𝗝𝗲𝗻𝗼𝘀𝗶𝗱𝗲 yakorewe Abatutsi
Umwanditsi: Alain Patrick Kanyarwanda