Abagore bo mu Murenge wa Runda, mu Karere ka Kamonyi, mu ntara y'Amajyepfo, basanzwe bakataje mu kwiteza imbere mu byiciro binyuranye, bifatanyije n'Isi yose mu kwizihiza Umunsi Mpuzamahanga w’Abagore wizihijwe kuwa 08 Werurwe 2026. Ku rwego rw'Umurenge wa Runda, uyu munsi mukuru wizihirijwe mu kagari ka Muganza.
Aba bagore bahisemo kwizihiza uyu munsi mukuru wabo bafashanya guhindura ubuzima. Ni ibirori byabanjirijwe n'akarasisi k’abagore bo muri uyu Murenge aho bamwe bagaragaje iterambere bagezeho ririmo no gutwara ibinyabiziga. Bamwe bari batwaye moto, abandi batwaye imodoka.
Ubuyobozi bw’uyu Murenge bwifatanyije n’abatuye mu bice bitandukanye bafasha bamwe muri bo kubona isaso, ibiribwa ndetse n’imashini zo kudoda mu rwego rwo guhindurira ubuzima abaturiye uyu murenge.
Ababyeyi 7 bafite abana bari mu mirire mibi bahawe ibiribwa n’ibikoresho by’isuku ndetse abana bagenerwa ifunguro bazafata mu minsi 15 riteguwe n’abahanga mu mirire bo muri aka gace.
Musengimana Epiphanie uri mu bahawe isaso yavuze ko anezerewe cyane kuko yari asanzwe arara ahantu habi. Yagize ati: “Ndanezerewe cyane kuko nari nsanzwe ndara ahantu habi ariko bampaye matella ngiye kujya ndara heza”.
Hanabaye ikiganiro mpaka cyayobowe na bamwe mu batuye muri uyu Murenge bungurana ibitekerezo ku nsanganyamatsiko yahujwe n’umunsi mpuzamahanga w’abagore “Umugore ni uw'Agaciro” aho bamwe bemezaga ko umugore koko ari uw'agaciro abandi bakavuga ko bikabirizwa, byaje gusoza hemejwe ko koko umugore ari uw'agaciro ntagereranywa.
Muri ibi birori kandi hashimiwe ba mutima w’urugo bagaragaza ishyaka ntagereranywa mu bikorwa bya buri munsi bihuza abatuye uyu murenge.
Umunyamabanga Nshingwabikorwa w’Umurenge wa Runda, Ndayisaba Jean Pierre, wari umushyitsi mukuru muri ibi birori, yasabye ba mutima w’urugo kurushaho kwimakaza indagaciro ziranga umunyarwandakazi kugira ngo barusheho kubaka umuryango ukeye kandi utekanye ufite ba mutima w’urugo barangwa n'ingeso nziza.
Ibirori byo kwizihiza Umunsi Mpuzamahanga w'Umugore [International Women's Day] mu Murenge wa Runda, byasojwe n’ubusabane, abayobozi bahuza urugwiro na ba mutima w’urugo bo muri uyu murenge.
Umunsi Mpuzamahanga w’Abagore washyizweho n’Umuryango w’Abibumbye mun mwaka wa 1972, ugamije kugaragaza ibyagezweho mu iterambere ry’uburinganire bw’abagabo n’abagore, uburenganzira no kubaka ubushobozi bw’umugore.
Abagore n’abakobwa ku Isi hose bagira uruhare rukomeye mu kubaka ubukungu, umuco, politike n’iterambere muri rusange.
Ku rwego rw’Isi uyu munsi wizihijwe ku nshuro ya 54, naho mu Rwanda ni ku nshuro ya 51.
Umunyamabanga Nshingwabikorwa w'Akagali ka Muganza, Grace, yahawe umudali
Akarasisi k'abagore bo mu Murenge wa Runda batwaye moto n'imodoka
Bakoze ikiganiro mpaka bungurana ibitekerezo ku nsanganyamatsiko yahujwe n’umunsi mpuzamahanga w’abagore “Umugore ni uw'Agaciro”
Umunyamabanga Nshingwabikorwa w'Umurenge wa Runda, Ndayisaba Egide, na Perezida wa Njyanama
Abagore bo mu Murenge wa Runda baremeye bagenzi babo batishoboye mu kwizihiza Umunsi Mpuzamahanga w'Abagore