Iki kiganiro gishya cyatangijwe n’umunyamakuru Kalex Kavukire, usanzwe amenyerewe mu biganiro by’imyidagaduro kuri Isango Star birimo Isango na Muzika na Sunday Night. Kalex kandi ari mu bagize itsinda ritegura ibihembo bya Isango na Muzika Awards (IMA).
The Space izibanda ku makuru n’ibiganiro bijyanye n’imyidagaduro mu ngeri zitandukanye. Izajya inagaragaza urugendo rw’abahanzi n’ibindi byamamare, inahere umwanya impano nshya zifuza kumenyekana no kugeza ibikorwa byazo ku bantu benshi.
Kalex Kavukire yabwiye InyaRwanda ko azajya akorana n’umunyamakuru Mandela Mugisha, uzwi nka Mr Mandela, muri iki kiganiro giteganyijwe kujya gitambuka kuri Isango Star TV buri wa Mbere, ku wa Gatatu no ku wa Gatanu, saa 21:30 z’ijoro.
Binyuze muri The Space, Isango Star TV yiyemeje gukomeza guha abakunzi b’imyidagaduro umwanya wo kumenya amakuru mashya, gutahura impano no gukurikirana inkuru ziri inyuma y’ibyamamare.
Kalex Kavukire ni muntu ki?
Kalex Kavukire ni umunyamakuru urambye mu makuru y'imyidagaduro, akaba afite impamyabumenyi ya kaminuza mu Itangazamakuru n’Itumanaho yakuye muri Institut Catholique de Kabgayi (ICK).
Amaze imyaka irenga umunani akora mu itangazamakuru n’itumanaho mu Rwanda, aho yanyuze mu bitangazamakuru bitandukanye birimo Radio Huguka na Isango Star akorera magingo aya.
Kuri Isango Star, Kalex azwi mu gutegura no kuyobora ibiganiro by’imyidagaduro birimo Isango na Muzika na Sunday Night.
Ni umwe mu bashinze ibihembo bya Isango na Muzika Awards (IMA), anagira uruhare mu gutegura ibikorwa bigamije gushimira abahanzi n’ibikorwa by’umuco mu Rwanda.
Yanagize uruhare mu bikorwa bishyigikira impano nshya, birimo ibitaramo bizenguruka amakaminuza yo mu Rwanda. Yigeze guhatanira ibihembo bya Rwanda Influencer Awards.
Mu buzima bwe bwite, Kalex yarushinze mu ntangiriro za 2025, ubwo yasabaga akanakwa umukunzi we Angelique Uwayezu mu birori byabereye i Rukali, mu Karere ka Nyanza.
Kalex Kavukire asanzwe amenyerewe mu biganiro by’imyidagaduro kuri Isango Star birimo Isango na Muzika na Sunday Night
Mu kiganiro the Space, Mandela Mugisha uzwi nka Mr Mandela ni we uzajya akorana na Kalex
Kalex Kavukire azajya akorana n’umunyamakuru Mandela Mugisha mu kiganiro 'The Space'
Imyidagaduro nyarwanda igiye kubona urubuga rushya rwo kuganiriraho binyuze mu kiganiro The Space, kigiye gutangira kunyura kuri Isango Star Tv