Uyu muhanzi yabitangaje nyuma yo gutaramira abitabiriye
iserukiramuco ryiswe “Festival Culturel – 1ère edition”, ryabereye mu gace ka
Neuville-sur-Saône, mu Mujyi wa Lyon mu Bufaransa, ku wa 17 Ukwakira 2026.
Iri serukiramuco ryateguwe n’umuryango Le Ballet des Grands
Lacs, rikaba ryari ribaye ku nshuro ya mbere. Ryari rigamije guhuza
Abanyarwanda n’Abarundi baba mu Bufaransa, ndetse no kumenyekanisha umuco
w’ibihugu byombi ku bandi batuye muri icyo gihugu.
Mu byaranze iri serukiramuco harimo ibikorwa byagaragazaga
umuco nyarwanda n’uw’ABarundi, birimo gukoresha ingoma zo muri ibyo bihugu,
gusabana no kwishimira umurage w’umuco bisangiye. Jules Sentore na we yari mu
bahanzi bafashije abitabiriye kwishimira ibyo bikorwa binyuze mu ndirimbo ze.
Mu kiganiro yagiranye na InyaRwanda, Jules Sentore yavuze ko
iki gitaramo cyagenze neza, ashimangira ko cyaranzwe n’umunezero, ubwitabire
bw’abantu benshi ndetse no kwishimira umuco.
Yagize ati: “Ni igitaramo cyarimo gusabana no gutarama,
hagaragaramo umuco w’Abarundi n’umuco nyarwanda. Habayeho gukoresha ingoma
Ndundi n’ingoma nyarwanda, na njye ndabataramira, mbaririmbira indirimbo
zinyuranye.”
Yakomeje avuga ko abitabiriye iki gitaramo bari bitabiriye
ku bwinshi, buri wese afite inyota yo kwishimira umuco no kuwusigasira. Kuri
we, kuba abantu barahuriye hamwe bagasabana binyuze mu muco n’umuziki byatumye
iki gikorwa kiba umwanya wihariye wo kugaragaza ubwiza bw’umurage w’ibihugu
byombi.
Ati: “Byari ibihe by’umunezero, kandi hari abantu benshi.
Twese twabukereye kugira ngo twizihize umuco. Navuga ko ari igitaramo cyagenze
neza.”
Nubwo yari amaze iminsi mu bikorwa by’umuziki hanze y’u
Rwanda, Jules Sentore yavuze ko agiye kugaruka mu gihugu kugira ngo akomeze
indi mishinga afite. Muri yo harimo gufata amashusho y’indirimbo no gusohora
ibihangano bishya, agamije gukomeza gusigasira umuco nyarwanda no kuwugeza ku
bawukunda.
Uyu muhanzi yavuze ko hari indirimbo nshya ateganya gushyira
hanze mbere y’uko umwaka wa 2026 urangira, ariko ko bishobora no kwimukira mu
ntangiriro za 2027 bitewe n’uko gahunda zizagenda.
Yagize ati: “Ikindi navuga ni uko ngomba kugaruka mu Rwanda,
kuko hari izindi gahunda nteganya gukora, zirimo gufata amashusho y’indirimbo.
Hari indirimbo nshya ngomba gushyira hanze umwaka utararangira, cyangwa se mu
ntangiriro z’umwaka utaha.”
Ibi bigaragaza ko nyuma yo kwitabira ibikorwa byo
kumenyekanisha umuco nyarwanda mu mahanga, Jules Sentore afite gahunda yo
gukomeza gukora ibihangano bishya no kugumana umubano n’abakunzi be binyuze mu
muziki.
Yasoje ashimira abakunda umuziki we n’abakomeza kumuba hafi,
abasaba gukomeza kumushyigikira no kwishimira umuco nyarwanda binyuze mu
bihangano bye.
Ati: “Abakunzi b’umuziki wanjye n’ibihangano byanjye,
ndacyakomeza kubashimira. Mukomeze kumba hafi, maze twizihire umuco wacu.
Murakoze, murakarama.”
Jules Sentore ni umwe mu bahanzi nyarwanda bazwi mu njyana
gakondo, aho ibihangano bye byibanda ku muco, amateka n’indangagaciro
by’Abanyarwanda. Ibikorwa bye bikomeje kugira uruhare mu kugeza umuziki gakondo
ku bantu bo mu Rwanda no hanze yarwo.
Mu gitaramo cyahuje umuco nyarwanda n’uw’Abarundi, Jules Sentore yataramiye abitabiriye abasusurutsa mu ndirimbo ze, mu gikorwa cyaranzwe no gusabana no kwishimira umurage w’ibihugu byombi
Jules Sentore yashimye uko yakiriwe mu iserukiramuco Festival Culturel – 1ère édition ryabereye mu Bufaransa, avuga ko ryitabiriwe n’abantu benshi bari bahuriye ku ntego yo kwizihiza umuco
Indirimbo nshya ni zimwe mu mishinga Jules Sentore ahanze amaso, aho yavuze ko hari izo ateganya gushyira hanze mbere y’uko 2026 irangira cyangwa mu ntangiriro za 2027
Le Ballet des Grands Lacs yateguye iserukiramuco ryahuje Abanyarwanda n’Abarundi baba mu Bufaransa, hagamijwe guhuza abaturage b’ibihugu byombi no kumenyekanisha umuco wabyo
