Juda Muzik basohoye indirimbo yashibutse mu gahinda ka Junior uherutse gupfusha umukunzi we-VIDEO

Ku wa Mbere tariki 10 Mutarama 2022, ni bwo Alex Mbaraga uzwi nka Junior yatangaje ko uwari umukunzi we Umuringa Liliane yitabye Imana. Ni nyuma y’iminsi ibiri gusa yari ishize uyu mukobwa ajyanwe mu bitaro. 

Junior na Umulinga bari bamaze imyaka ibiri bari mu rukundo, ariko ibyabo ntibyavuzwe cyane mu itangazamakuru kuko bashakaga kubanza kubaka umubano.

Mu ijoro ryo kuri iki Cyumweru tariki 13 Gashyantare 2022, nibwo Juda Muzik bashyize ku mbuga zicururizwaho umuziki indirimbo yabo bise ‘Iminsi’.

Basohora iyi ndirimbo bagize bati “Ushobora kuba warabuze uwo wakundaga umukunzi umubyeyi, incuti, abavandimwe bikananiza umutima gusa hari byinshi bakundaga kubona ukora baharanira iterambere ryawe ntuzabatenguhe komeza ukore uzabatere ishema aho bari ‘Iminsi’ uyibature wongere ubabwire ko ubakunda."

Junior ni we wanditse iyi ndirimbo, anayihimbira ‘melody’ yayo. Avuga ko yakoze iyi ndirimbo bitewe n’ibihe yari arimo byo kubura umukunzi, ariko kandi nk’itsinda bifuza ko yafasha buri wese wanyuze mu bihe bikomeye nyuma yo gupfusha uwo bakundana.

Ati “Igitekerezo cyaturutse mu bihe nari ndimo ariko ndi kuyikora numva nayikorera buri muntu wese umeze nkanjye muri ubu buzima […] Iyi ni indirimbo yagukomeza kandi igafasha buri wese. Iyo umuntu wawe agiye hari igihe ushobora gusubira inyuma ariko ni byiza ko ukora ibyo yakundaga."

Uyu muhanzi avuga ko umukunzi we yakundaga kumubona aririmba, ari nayo mpamvu agiye gushyira imbaraga mu muziki wabo. Ngo bisa nk’aho batangiye urugendo rushya rw’umuziki nk’abahanzi bigenga.

Ishimwe Prince uzwi nka Darest yabwiye INYARWANDA ko nk’itsinda batekereza gukora album, ariko ko izasohokaho indirimbo abantu batigeze bumva.

Ati "Album isa nk’iri kurangira...Muri uyu mwaka hari indirimbo twarangije gufatira amashusho zizasohoka. Igisigaye ni ugutanga ibikorwa hanyuma turi gutegura album mu mwaka utaha."

Akomeza ati “Dufite indirimbo nyinshi cyane zirenga 50 ziri muri studio […] Guhera muri Kanama 2022 nibwo tuzasubukura gukora ku ndirimbo ziri kuri album duhitemo izo twasohora."

Uyu muhanzi avuga ko mu gihe cy’imyaka irenga itatu bari mu muziki bishimira uko bashyigikiwe, bagasaba abafana babo gukomeza kubaba hafi.

Itsinda rya Juda Muzik ryasohoye amashusho y’indirimbo bise ‘Iminsi 

Darest yavuze ko muri studio bafite indirimbo zirenga 50, ko bazahitamo izo gushyira kuri album yabo ya mbere

Junior avuga ko agahinda ko gupfusha umukunzi we kashibutsemo indirimbo yo gukomeza benshi

KANDA HANO UREBE INDIRIMBO ‘IMINSI’ YA JUDA MUZIK

">