Joshua Baraka yageze i Kigali, agaragaza inyota yo gukorana n’abarimo Bruce Melodie na Element –AMAFOTO+VIDEO

Akigera ku kibuga cy’indege mpuzamahanga cya Kigali kuri uyu wa Gatanu tariki 15 Kanama 2025, Joshua Baraka yagaragaje ibyishimo byo kongera kugaruka i Kigali, aho asanga ibikorwa bye bishyigikirwa cyane. Yagize ati: “Nishimiye kugaruka i Kigali, mbona uburyo nshyigikiwe hano, rero nishimiye kuba ngarutse. Maze igihe nitegura, nkora imyitozo, ndashaka kubaha ibintu byiza cyane.”

Yahageze nyuma y’iminsi mike avuye mu iserukiramuco rya Afro Nation, aho yavuze ko yagiriye ibihe byiza ndetse akanagirana ibiganiro n’abandi bahanzi mu rwego rwo kwagura umuziki we ku rwego mpuzamahanga. Ati: “Afro Nation byari byiza cyane, nagombaga kuba ndiyo kugira ngo ngirane ibiganiro n’abahanzi batandukanye. Byari ibintu by’agaciro ku rugendo rwanjye.”

Joshua Baraka yavuze ko mu Rwanda yiyumva nk’uri mu rugo, kuko buri gihe iyo ahageze yisanga, akanakunda indyo zitandukanye ziharangwa.

Yongeyeho ko mbere yo gusubira muri Uganda yifuza gukorana indirimbo n’abahanzi nyarwanda akunda barimo “Bruce Melodie, Mike Kayihura, Element na Kivumbi King, ndetse n’abandi numva nshaka gukorana nabo. Hari abahanzi benshi b’inshuti zanjye bari hano, kandi ndatekereza ko bishoboka.”

Uyu musore wigeze kuza mu Rwanda bwa mbere akoresheje 'Bus' mu rugendo rwo kumenyekanisha ibihangano bye, avuga ko umuziki w’Afurika uri gutera imbere kandi yishimira kugira uruhare mu kwaguka kwawo.

Nubwo yivuga nk’umunya-Uganda, ariko yavutse ku munyarwandakazi. Ndetse ku myaka 40 ateganya kuzasoza urugendo rwe rw’umuziki.

Yashimangiye ko kimwe mu byamushimishije ari uko agiye guhurira ku rubyiniro na Dj Pius, amushimira kuba yaramutumiye mu gitaramo cy’uyu muhanzi wamamaye mu ndirimbo Nana, iyo avuga ko ifite umwihariko kuko yayikoze ari mu gitutu, ariko ikamufungurira amarembo menshi mu muziki.

Dj Pius we yavuze ko yishimiye kwakira Joshua Baraka mu gitaramo cy’amateka, amuhitamo kubera ubuhanga bwe n’imibanire myiza basanzwe bafitanye. 

Joshua Baraka akigera i Kigali yiteguye gususurutsa abakunzi b’umuziki

Umuhanzi w’Umunya-Uganda yishimira uburyo ashyigikirwa mu Rwanda 

Afro Nation yamuhaye amahirwe yo guhura n’abahanzi bo ku rwego mpuzamahanga

Joshua Baraka avuga ko mu Rwanda yiyumva nk’uri mu rugo 

Ateganya gukorana na Bruce Melodie, Mike Kayihura, Element na Kivumbi King 

Yigeze kuza i Kigali bwa mbere akoresheje bisi 

Umuziki w’Afurika uri gutera imbere kandi yishimira kugira uruhare mu kwaguka kwawo

Dj Pius yishimira guhurira ku rubyiniro na Joshua Baraka mu isabukuru y’imyaka 15 mu muziki

KANDA HANO UREBE IKIGANIRO TWAGIRANYE NA JOSHUA BARAKA