Mourinho usanzwe azwiho kwivuga ibigwi no kwikomanga mu gituza, aherutse gutwara igikombe cya UEFA Conferance League 2022 ari kumwe na AS Roma, aho cyakinirwaga ku nshuro yacyo ya mbere, Roma ikagitwara itsinze Feyenoord ku mukino wa nyuma.
Intsinzi ya AS Roma na Jose Morinho, yatumye aba umutoza wa mbere mu mateka wujuje ibikombe bitatu bya UEFA bikinwa n'ama-Club, aho yongereye UEFA Conferance League kuri UEFA Europa League na UEFA Champions League.
Mu butumwa yashyize ku rukuta rwa Instagram, yagaragaje ishusho ya 'Tatoo' yishyizeho, agira ati "Iyi ni tatouage [tattoo] yanjye. Ibyishimo by’abafana ba Roma byatumye mbikora. Natekereje ikintu kidasanzwe cyakubahisha amakipe yose natwariyemo amarushanwa y’i Burayi. Nashakaga tatouage imwe yihariye kandi ni njye jyenyine ushobora kuyigira...''
Tatoo ya Mourinho
Iyi Tatoo ya Mourinho iragaragaza igikombe cya UEFA Champions League giteretse hagati y'icya UEFA Conferance League n'icya UEFA Europa League, ibikombe byose uyu mugabo yagize amahirwe yo gutwara mu makipe atandukanye.
Bitangira, Jose Felix Mourinho yatunguye isi ya ruhago ubwo yatozaga FC Porto agatwara UEFA Europa League mu mwaka wa 2003 atsinze Celtics ku mukino wa nyuma, ahita akurikizaho UEFA Champions Legue yatwaranye na FC Porto muri 2004 batsinze AS Monaco ibitego 3-0 ku mukino wa nyuma.
Jose Mourinho yongeye gutwara igikombe cya Champions League muri 2010 ubwo yatozaga Inter de Milan, aho batsinze Bayern Munich ku mukino wa nyuma, atwara UEFA Europa League atoza Manchester United muri 2017, mbere yo kwegukana UEFA Conference League yahaye AS Roma muri Gicurasi 2022, byatumye yuzuza ibi bikombe byose mu gihe cy'imyaka 18 gusa.
Uyu munya-Portugal w'imyaka 59 y'amavuko, ntabwo yagize ibigwi bikomeye mu gihe cy'imyaka 8 yakinnye ruhago, ariko ku ntebe y'ubutoza ho yahiriwe ubudasiba atwara ibikombe umusubizo. Uretse aya makipe yatwayemo ibikombe by' u Burayi, Mourinho yatwaye ibindi bikombe bya Shampiyona na Chelsea, Copa Del Rey na Shampiyona muri Real Madrid n'ibindi.
Mourinho ukunda kwivuga ibigwi no guhangana cyane na bagenzi be, asanzwe ari umwe mu batoza baryoshya ibiganiro bya ruhago bititiza imbuga nkoranyambaga.
Ibikombe 5 bya UEFA arabyujuje