Iyi nkuru ibabaje y’urupfu rwe yemejwe n’umuhagarariye, Julie
Smith, wabwiye CNN ko Marinelli yari amaze igihe arwaye kanseri y’umuhogo n’iy’igifu. Gusa nta
bindi bisobanuro birambuye byatangajwe ku bijyanye n’ibihe bya nyuma by’ubuzima
bwe.
Joe Marinelli yari azwi cyane muri filime zirenga 50 yakinnyemo, by’umwihariko akagaragara cyane nka 'guest actor' muri filime zikomeye za televiziyo.
Yatangiye kumenyekana cyane ubwo yakinaga nka Bunny Tagliatti, umunyabyaha wo mu
rwego rwa mafia wambara nk’abagore (cross-dresser), muri filime y’uruhererekane
“Santa Barbara” guhera mu 1988.
Yagaragaye muri iyi 'serie' mu bice birenga 170 kugeza mu 1990, ndetse yegukana igihembo cya Soap Opera Digest Award kubera uko yayikinnye.
Imyaka ye ya mbere muri
sinema yagaragaye muri filime zamamaye nka “Cagney & Lacey”, “Hill
Street Blues”, na “L.A. Law”, zagiye zitambuka mu myaka ya 1980.
Mu myaka yakurikiyeho,
yagaragaye mu zindi filime zikomeye nka “ER”, “JAG”, “The King of Queens”, ndetse no mu
yandi makinamico yagiye akundwa n’abatari bake.
Muri filime ya vuba
yagaragayemo, Marinelli yagaragaye muri “Insecure”,
“Hollywood”, na “The Offer.” Umushinga we wa nyuma
wari “The Morning Show”, aho
yakinagamo nka Donny Spagnoli,
umuyobozi wa gahunda, mu bice 20.
Abari bagize iryo tsinda bose baje no guhatanira
igihembo cya Screen Actors Guild mu 2022 mu cyiciro cy’abakinnyi bitwaye
neza mu ruhererekane rwa filime ndende.
Leigh J. McCloskey,
bakinanye muri “Santa Barbara”, yamuhaye icyubahiro anyuze ku mbuga nkoranyambaga
agira ati: “Yari umufatanyabikorwa
mwiza, umwigisha, inshuti y’umutima, kandi yari umuntu wizeraga
imbaraga z’abantu n’inkuru zabo. Yari intangarugero.”
Yasoje agira ati: “Birambabaje cyane gusezera ku nshuti
yanjye, umuntu warebaga isi mu ndorerwamo y'ibyiza n’ubushobozi bw’abantu.
Nishimiye kuba narabayeho muri iyi si turi kumwe, Joe.”
Umukinnyi wa filime, Joe Marinelli yitabye Imana ku myaka 68 y'amavuko