Jeff Bezos na Lauren Sánchez basoje ubukwe bwabo mu birori by’ab

Ibi birori byitabiriwe n’ibyamamare byinshi, bamwe bambaye imyenda ya kinyamwuga, abandi bambara imyambaro yoroshye isanzwe yambarwa nijoro nko mu rugo, irimo impuzankano zoroshye, amakanzu maremare, imyambaro yo kurarana n’inkweto zoroheje.

Muri ibi byamamare harimo umuririmbyi Usher, Leonardo DiCaprio, umushoramari Brian Grazer, Bill Gates witabiriye yambaye imyenda ya Prada ijyanye n’insanganyamatsiko y’igitaramo, Oprah Winfrey n’inshuti ye Gayle King bari bambaye imyambaro y’igikundiro, na Kim Kardashian waserutse yambaye imyenda yegereye umubiri irimo umwambaro ugaragaza igituza, n'indi myenda yoroheje ku buryo wabonaga ko yasobanukiwe neza insanganyamatsiko.

Lauren Sánchez yabwiye ikinyamakuru Vogue ko yateganyije kwambara ikanzu ya Atelier Versace itagira amaboko, ikozwe muri georgette yoroheje itatseho amabuye y’agaciro, iherekejwe n’indi myambaro yoroshye. Yatangaje ko iyi kanzu yari yateguwe by’umwihariko kuri uwo munsi.

Abatumirwa bahawe inkweto zijyanye n’igitaramo. Nk’uko Vogue yabitangaje, abagabo bahawe inkweto z’ubudodo z’ubururu zikorwa na Vibi Venezia, naho abagore bahabwa inkweto zifunguye imbere zoroshye zituruka muri Amazon. Lauren yagize ati: “Twifuje guhuza ibyiza n'ubwiyoroshye, buri wese akagira ikimworoheye.”

Ku munsi nyir’izina w’ubukwe, Lauren yinjijwe mu rusengero n’abahungu be babiri, Nikko w’imyaka 24 na Evan w’imyaka 19. Yari yambaye ikanzu yihariye yakozwe na Dolce & Gabbana, ifite igitambaro cyiza cyo mu Butaliyani n’imiterere yihariye ikoze mu buryo bwa ‘mermaid’.

Lauren yabwiye Vogue ko yashatse ikanzu itandukanye n’izo asanzwe yambara ku itapi itukura, ahitamo kuyikora ahereye ku mwambaro Sophia Loren yambariye muri filime Houseboat yo mu 1958. Yagize ati: “Nashakaga ikintu cyoroshye kandi kigezweho, ariko naje gusanga nshaka ikintu gifite igisobanuro, kigaragaza aho ngeze mu buzima. Ndi umuntu mushya ugereranyije na mbere y’imyaka itanu.”

Yakomeje agira ati: “Ni ubwa mbere nambaye ikanzu itwikiriye igituza cyose. Bitandukanye n’ibyo abantu banyitezeho ndetse nanjye ubwanjye, ariko biranyerekana neza.”

Nyuma yo gusezerana, Lauren yashyize ifoto ya mbere y’ubukwe kuri Instagram agaragara ari kumwe na Jeff Bezos mu busitani bari hamwe n’abatumirwa babo, ayiherekeresha amagambo agira ati: “06/27/2025 ♥️”, yemeza ko yamaze gushyingirwa. Yanahinduye amazina kuri Instagram yitwa Lauren Sánchez Bezos.

Ubukwe bwabo bwitabiriwe n’abantu bagera kuri 200, barimo imiryango n’incuti zigera kuri 70, hakabamo n’ibyamamare byamenyekanye ku isi nka Khloé Kardashian, Kris Jenner, Kylie Jenner, Karlie Kloss, Tom Brady, Ivanka Trump, Tommy Hilfiger, Umwamikazi Rania wa Jordanie na Brooks Nader.

Amakuru yatangajwe na PEOPLE avuga ko umuhango nyir’izina watangijwe n’indirimbo “Can’t Help Falling in Love” ya Elvis Presley iririmbwa na Matteo Bocelli.

Ibirori byo kwakira abatumirwa byabaye ku wa Kane, tariki 26 Kamena, hafi y’urusengero rwa Madonna dell'Orto. Abatumirwa bari bateguriwe pizza zatekerwaga aho n'umutetsi uzwi cyane w’i Napoli, hakurikiraho n'andi mafunguro menshi.

Mbere y’uko asezerana na Bezos, Lauren yabwiye Vogue ati: “Ndanezerewe kuba ngiye gushyingirwa n’inshuti yanjye magara, umuntu umpa agaciro, unyubaha, umuntu nkunda cyane kandi unyitaho. Ndumva ndi umugore uhiriwe ku isi yose.”