Jay-Z yizihije imyaka 30 mu muziki, agarura ku isoko ‘Dread Presidents’ yabaye umusingi w’izamuka rye

Uyu muhango w’imyaka 30 wanajyanye no kongera gucapisha iyi ndirimbo kuri disiki y'umuziki 'Vinyl', 'Cassette' na 'CD', biha abafana n’abakusanya umuziki amahirwe mashya yo kuyibona no kuyigumana mu buryo bugezweho.

'Dead Presidents' yakozwe na Producer Ski Beatz, ifatirwa amajwi muri D&D Studios, isohorwa ku wa 19 Gashyantare 1996 binyuze muri Roc-A-Fella Records, label yigenga Jay-Z yashinze afatanyije na Damon Dash na Kareem “Biggs” Burke. Iyi ndirimbo yabaye iya mbere imenyekanisha album ye ya mbere yise “Reasonable Doubt”.

Nubwo yari indirimbo y’ingenzi mu kumenyekanisha album, verisiyo (Version) ya mbere ya “Dead Presidents” ntiyashyizwe ku rutonde rwa nyuma rwa Album “Reasonable Doubt”.

Ahubwo hashyizwemo indi ‘verisiyo’ yahinduwe yitwa “Dead Presidents II”, irimo imirongo mishya ariko yubakiye ku muziki umwe, ubwo album yasohokaga muri Kamena 1996.

“Dead Presidents” yubakiye ku gace (sample) k’indirimbo “The World Is Yours” yo kuri Album ‘Illmatic’ ya Nas. Muri iyo ‘sample’ humvikanamo umurongo wubatse amateka: “I’m out for dead presidents to represent me.” Bisobanuye “Ndi mu gushaka amafaranga kugira ngo abe ari yo amvugira.”

Muri Amerika, ku mafaranga y’amadolari hariho amashusho y’abaperezida bapfuye (nk’aba George Washington, Abraham Lincoln n’abandi). Bityo “dead presidents” bisobanura amadolari cyangwa amafaranga muri rusange.

Uwo murongo wabaye nk’ikirango cy’inyota n’ishyaka ryo gushaka amafaranga no kwiteza imbere mu myaka ya 1990.

Muri iyi ndirimbo, Jay-Z yagaragaje ubuhanga bwe mu kwandika (lyricism) no kuvuga inkuru zishingiye ku buzima yabayemo mbere y’uko aba icyamamare.

Yavugaga ku buzima bwo ku muhanda, ku nzozi zo kuzamuka no ku nzira yo gushaka ubukire binyuze mu muziki.

Roc-A-Fella yigaragaje nk’ikirango cy’ubwigenge

Igihe iyi ndirimbo yasohokaga, Roc-A-Fella Records yari ‘label’ nto yigenga itari ifite inkunga ya kompanyi zikomeye zifasha abahanzi.

Gushyira hanze iyi ndirimbo no kuyimenyekanisha nta bufasha bw’izo kompanyi byari igikorwa cy’ubutwari muri icyo gihe, kuko byari bigoye ko ‘label’ yigenga yinjira ku isoko rinini.

Icyakora, “Dead Presidents” yabaye umwe mu musingi w’izamuka rya Jay-Z, ryarangiye rimuhindura umwe mu bahanzi bafite ijambo rikomeye mu bucuruzi n’umuco wa hip-hop ku isi.

Nyuma y’imyaka itatu (30), “Dead Presidents” iracyafatwa nk’imwe mu ndirimbo z’ingenzi zaranze intangiriro za Jay-Z.

Gusubira kwayo ku ndirimbo zicururizwaho umuziki bituma igera ku rubyiruko rutayizi neza, mu gihe ku bakuru ibutsa aho byose byatangiriye.

Iyi ndirimbo ntigaragaza gusa urugendo rw’umuhanzi umwe, ahubwo ni igipimo cy’ubuhanga mu kwandika no gutambutsa ubutumwa muri hip-hop, umurage Jay-Z akomeje kubakiraho izina rye no kugeza uyu munsi.

Jay-Z yizihije imyaka 30 amaze mu muziki, yongera gusohora “Dead Presidents”, indirimbo yabaye umusingi w’izamuka rye muri Hip-Hop ku rwego rw’Isi

KANDA HANO UBASHE KUREBA AMASHUSHO Y'INDIRIMBO 'DEAD PRESIDENTS' YA JAY-Z