Jay-Z, usanzwe agira uruhare mu gutoranya abahanzi baririmba muri iki gitaramo abinyujije muri sosiyete ye Roc Nation, yatangaje ko agiye kujya ku rubyiniro ubwe nyuma y’imyaka amaze afasha NFL gutegura iki gikorwa cy’imyidagaduro gikurikirwa n’abantu benshi ku Isi.
Kuva mu 2019, Roc Nation ifite amasezerano na NFL yo gufasha gutegura ibitaramo byo mu karuhuko ka Super Bowl, harimo no gutoranya abahanzi bazataramira abakunzi b’umupira w’amaguru.
Komiseri wa NFL, Roger Goodell, yavuze ko igihe sosiyete ye yagiranaga amasezerano na Roc Nation, yari afite icyifuzo cy’uko Jay-Z na we yazagera igihe akajya ku rubyiniro muri iki gitaramo.
Yagize ati: “Igihe twumvikanaga na Roc Nation ku bijyanye no gutegura iki gitaramo, nari mfite icyifuzo kimwe: ko JAŸ-Z yazagera igihe akajya ku rubyiniro ubwe, igihe yaba yumva ko gikwiriye.”
Itangazo ryatangaje ko Jay-Z azataramira muri Super Bowl LXI ntiryasobanuye niba hari abandi bahanzi bazafatanya na we cyangwa niba azatarama wenyine.
Beyoncé ashobora kuzatungurana ku rubyiniro
Nubwo bitaramenyekana niba Jay-Z azataramana n’abandi bahanzi, hari abakunzi b’umuziki bashobora kwifuza kubona umugore we, Beyoncé, amwiyungaho muri iki gitaramo.
Aba bombi basanzwe bafatanya mu bikorwa by’umuziki, ndetse banazengurutse ibihugu bitandukanye mu bitaramo byiswe “On the Run Tour” mu 2014 na “On the Run Tour II” mu 2018.
Beyoncé kandi aherutse kugaragara nk’umushyitsi mu bitaramo bya Jay-Z byo kwizihiza imyaka 30 ishize hasohotse album ye “Reasonable Doubt”.
Beyoncé na we afite amateka akomeye muri Super Bowl. Mu 2013, ni we wari umuhanzi mukuru mu gitaramo cyo mu karuhuko ka Super Bowl XLVII, aho yongeye guhurira ku rubyiniro n’itsinda Destiny’s Child yari amazemo imyaka.
Mu 2016, yanagaragaye muri Super Bowl 50, aho yafashije Coldplay mu gitaramo cyari cyatumiwemo na Bruno Mars.
Jay-Z na Beyoncé bashakanye mu 2008, bakaba bafitanye abana batatu.
Super Bowl izahuza umuziki n’umunsi w’abakundana
Super Bowl LXI iteganyijwe ku Cyumweru, tariki ya 14 Gashyantare 2027, kuri SoFi Stadium iherereye i Inglewood, muri Leta ya California, muri Leta Zunze Ubumwe za Amerika.
Uyu munsi uzaba ari uwa Saint Valentin, uzwi nk’umunsi wahariwe abakundana, ibintu bishobora gutuma abakunzi b’umuziki barushaho kwifuza kubona Jay-Z na Beyoncé bahurira ku rubyiniro.
Nubwo kugeza ubu hataratangazwa abandi bazafatanya na Jay-Z, kuba agiye gutaramira muri Super Bowl ni intambwe ikomeye ku muhanzi umaze imyaka myinshi agira uruhare mu gutegura iki gitaramo gikunzwe ku Isi.
Jay-Z yihaye akazi mu karuhuko k’umukino wa Super Bowl 2027