Jay Jay Okocha ufatwa nka Ronaldinho wa Afurika, yashyizwe mu ba Minisitiri ba Nigeria

Nubwo nta tangazo rirashyizwa hanze  na Leta  ya Nigeria ryemeza aba baminisiri, gusa kuva tariki 10 Nyakanga muri iki gihugu hasohotse urutonde rw'Abaminisitiri bagomba gutangazwa ndetse bagatangira imirimo yabo.

Kuri uru rutonde hagaragayeho rutahizamu wabaye na Kapiteni w'ikipe y'igihugu ya Nigeria, Augustine Azuka Okocha wamenyekaniye ku izina rya Jay Jay Okocha.

Uyu mugabo w'imyaka 49 y'amavuko, ari mu baminisitiri basaga 30 bashyizwe kuri uru rutonde. Jay Jay Okocha ahagarariye agace ka Enugu yavukiyemo nubwo atariho yakuriye.

Okocha wavutse Kanama tariki 14 mu 1973 mu gace ka Enugu, yakiniye ikipe y'igihugu ya Nigeria kuva mu 1993 kugera mu 2006, akaba yarayikiniye imikino 73, atsindamo ibitego 14.

Jay Jay Okocha afatwa cyangwa se akunze kugereranywa na Ronaldinho ukomoka muri Brazil, bigendanye n'ubuhanga bwe ndetse n'ubushobozi bwo gukoresha icyo ashaka ku mupira bituma bamwe bavuga ko yanarushaga Ronaldinho.

Jay Jay yabaye kapiteni wa Nigeria na nyuma yo guhagarika ruhago, akomeza kuba ishusho y'iki gihugu 

Yakiniye ikipe ya PSG iri no mu makipe akomeye yanyuzemo

Jay Jay aherutse mu Rwanda mu nama ya FIFA, aho yari mu ikipe y'u Rwanda yakinnye na FIFA