Aba bombi bamaze kubaka izina rikomeye mu muziki wo kuramya no guhimbaza Imana mu Rwanda, bavuga ko iyi ndirimbo yabo nshya ari ubutumwa bugamije gukomeza abafite kwizera no guha ibyiringiro abataramenya Kristo.
Mu kiganiro na InyaRwanda, Jado Sinza & Esther bavuze ko iyi ndirimbo ishingiye ku kuri kwa Bibiliya kuvuga ko umuntu wemeye Yesu Kristo aba abaye icyaremwe gishya, ubuzima bwa kera bugashira hagatangira ubuzima bushya bwuzuye ubuntu n'ibyiringiro.
Yagize ati: "Ni indirimbo ivuga ku mbaraga z'agakiza kabonerwa muri Yesu Kristo. Yubakiye ku kuri kwa Bibiliya kuvuga ko umuntu wemeye Kristo aba abaye icyaremwe gishya; ubuzima bwa kera burashira, hagatangira ubuzima bushya bwuzuye ibyiringiro n'ubuntu bw'Imana".
Aba baramyi bavuze ubutumwa nyamukuru bw'iyi ndirimbo ni uko amaraso ya Yesu ahumanura ibyaha kandi agahindura ubuzima bw'umuntu burundu. Bati: "Ni yo mpamvu amagambo agira ati: 'Ndi icyaremwe gishya muri Kristo, ibya kera byararangiye, dore byose byahindutse bishya. Yesu yankijije burundu.'"
Bongeyeho ko iyi ndirimbo igamije gukomeza abafite kwizera no guha ibyiringiro abataramenya Kristo, ibibutsa ko nta buzima bwananiranye Imana idashobora guhindura. Ni ubutumwa bw'urukundo, imbabazi n'agakiza bubwira buri wese ko muri Kristo hari intangiriro nshya.
Urukundo rwabo rwabaye inkingi y'umurimo bakorera Imana
Jado Sinza na Esther Umulisa bafite amateka y'urukundo amaze imyaka myinshi. Batangiye gukundana mu 2017, maze nyuma y'urugendo rwuzuyemo kwihangana no gukomezanya, basezerana imbere y'amategeko n'Imana mu 2024.
Jado Sinza na Esther bahagaze neza mu muziki no mu bushabitsi bakora binyuze muri Sinza Coffee Shop, bahuriye ndetse bamenyanira muri New Melody Choir, imwe muri korali zubatse izina rikomeye mu muziki wo kuramya no guhimbaza Imana mu Rwanda.
Nyuma yo kubana nk'abashakanye, bakomeje gukorera Imana bafatanyije, basohora indirimbo zitandukanye kandi zikomeje guhembura imitima ya benshi zirimo: "Ni Nziza", "Aragukunda", "Imbabazi", "Forever" na "Yankijije Burundu".
Indirimbo yabo nshya "Yankijije Burundu" iri ku mbuga zose zicururizwaho umuziki, mu gihe amashusho yayo yamaze gushyirwa kuri YouTube Channel ya Jado Sinza & Esther, aho abakunzi babo bashobora kuyireba no kuyumva.
Jado Sinza na Esther bashyize hanze indirimbo nshya y'amashusho "Yankijije Burundu"
REBA INDIRIMBO NSHYA "YANKIJIJE BURUNDU" YA JASO SINZA & ESTHER