Mu ijoro ryo ku wa Gatatu, Tom Holland na Zendaya bitabiriye ibirori byo kumurika Spider-Man: Brand New Day byabereye i Leicester Square mu mujyiwa London, bikurura abafana benshi bari baje kwihera ijisho aba bakinnyi babiri bakunzwe cyane muri Hollywood.
Mu kiganiro yagiranye na BBC News, Zendaya yabajijwe niba afite inama yagira abantu bakorana n'abo bashakanye. Mu gusubiza, yagize ati: "Iyo muri inshuti magara, ibintu biba byoroshye cyane."
Aya magambo yagaragaje uburyo umubano we na Tom Holland utagendera gusa ku rukundo, ahubwo ushingiye no ku bucuti bukomeye.
Bamaze imyaka hafi 10 bakinana muri Spider-Man
Tom Holland yongeye kugaragara nka Peter Parker (Spider-Man), mu gihe Zendaya yongeye gukina nka MJ, umukobwa ukundana na Peter Parker muri iyi filime.
Aba bombi batangiye gukinana muri filime za Spider-Man kuva mu mwaka wa 2016, ibintu byatumye ubucuti bwabo bukura buhoro buhoro kugeza bubyaye urukundo.
Tom Holland yavuze ko nyuma y'imyaka hafi 10 bakinana, bagikunda izi nshingano.
Yagize ati: "Tumaze imyaka icumi dukina nk’aba bantu, kandi twishimira buri mwanya. Iyo habonetse ikintu gishya gituma imico yabo irushaho gushimisha, biba ari iby'agaciro."
Zendaya yongeye kwigaragaza mu myambarire yakunzwe na benshi
Nk'uko bisanzwe, Zendaya yongeye gukurura amaso y'abitabiriye ibirori kubera imyambaro ye.
Yari yambaye ikanzu ndende yakozwe na Tamara Ralph, ifite imishumi imeze nk'inzu y'igitagangurirwa, ibintu benshi babonye nk'uburyo bwo kwamamaza no kwerekana insanganyamatsiko ya Spider-Man.
Abajijwe niba iyo myambaro yari irimo ibanga ryerekeye inkuru ya filime, Zendaya yasubije abanyamakuru ati: "Ibyo sinabivuga. Mubyumve uko mubishaka."
Yavuze kandi ko akunda gukoresha imyambarire mu gukomeza inkuru ya filime no mu gihe cy'ibikorwa byo kuyamamaza.
Tom Holland yanze kuvuga niba ari ubwa nyuma agaragaye muri Spider-Man
Tom Holland na we yabajijwe niba Spider-Man: Brand New Day ari yo filime ye ya nyuma muri uru ruhererekane. Yanze kubitangazaho byinshi, agira ati: "Muzabanze murebe iyi filime, ishobora kubasubiza icyo kibazo."
Yongeyeho ko yishimira kuba umwe mu bagize Marvel Cinematic Universe (MCU) kandi ko yifuza kuzakinana n'abandi bantu benshi muri iyo filime mu gihe kiri imbere.
Filime irimo n'abakinnyi bashya
Iyi filime irimo n'abakinnyi bashya barimo Sadie Sink, wamamaye muri Stranger Things. Nubwo abakunzi ba Marvel bamaze igihe bibaza uwo ari bukine ariwe muri iyi filime, abakora iyo filime bakomeje kubigira ibanga.
Mu nkuru ya Spider-Man: Brand New Day, Peter Parker aba agomba kongera kubaka ubuzima bwe nyuma y'ibyabaye muri Spider-Man: No Way Home, aho abantu bose, harimo n'inshuti ze ndetse na MJ, baba batakimwibuka.
Filime yatangiye kwakirwa neza
Abasesenguzi ba sinema batangiye gutanga ibitekerezo byabo kuri iyi filime, aho benshi bayihaye amanota meza. The Independent yayise imwe muri filime nziza za Spider-Man mu myaka irenga 20 ishize, mu gihe ikinyamakuru The Telegraph na cyo cyayishimye.
Ku rundi ruhande, The Guardian yayihaye amanota ari hagati na hagati, ariko ishimangira ko Zendaya ari umwe mu bantu bagize uruhare rukomeye mu gutuma filime irushaho gushimisha abayireba.
Filime yabanje, Spider-Man: No Way Home, yasohotse mu mwaka wa 2021, yinjije arenga miliyari 1.9 z'Amadolari ya Amerika ku rwego rw'isi, bituma iba imwe mu zaciye agahigo mu mateka ya Marvel.