Ivumburamatsiko ku mashini izajya yuhagira umuntu ikanamuhanagura mu minota 15 gusa

Iyo mashini yiswe Mirai Ningen Sentakuki, yakozwe na kompanyi yo mu mujyi wa Osaka yitwa Science Co.. Binyuze mu gukoresha ubuhanga bw'ubwenge buhangano n’ubumenyi buhanitse, iyi mashini itanga uburambe bushya bwo kuhagira umuntu, aho ituma uva mu koga usukuye neza kandi wanaruhutse mu minota 15 gusa.

Iyi mashini iteye mu buryo butangaje, aho uyinjiramo ukicara mu cyumba gifite umucyo mwinshi, ikuzengurutsa ku buryo usohoka usa neza. Iyo winjiyemo imbere, haba harimo amazi ashyushye aringaniye, hanyuma hakinjira umuyaga wihuta urimo utuntu dusohora imyanda yo mu ruhu.

Ikirenzeho, iyo mashini ikoranye ikoranabuhanga rifata amakuru y'umubiri w’uri kuyikoresha. Uko amakuru afatwa, AI ihita ihindura ubushyuhe bw’amazi n’umuvuduko w’umuyaga kugira ngo buri wese agire uburambe bwiza butandukanye n’ubwo mu buryo busanzwe.

Si isuku gusa iyi mashini yakorewe, ahubwo n’imitekerereze. Bimwe mu biyigize, bisuzuma uko umuntu ameze mu mutwe, niba ananiwe cyangwa atameze neza, maze imbere mu cyumba hagashyirwamo amashusho acyeye atuma umuntu aruhuka mu mutima no mu mubiri. Nk’uko Yasuaki Aoyama, umuyobozi wa Science Co., yabivuze: “Ntabwo hagamijwe isuku gusa, ahubwo ni ubuzima bwiza muri rusange.”

Si igitekerezo gishya

Igitekerezo cyo gukora imashini ikarabya umuntu cyatangijwe mu 1970 na Sanyo Electric Co. (ubu yahindutse Panasonic Holdings Corp.) ubwo yerekanywaga bwa mbere mu imurikagurisha mpuzamahanga ryabereye mu Buyapani. Nubwo icyo gihe itageze ku isoko, byasigiye isi igitekerezo cyashimishije benshi.

Ubuyapani bwongeye guhanga hashyirwa imbere ikoranabuhanga rishya rikoresha AI, bituma iki gitekerezo kibasha kugera ku rwego rwo hejuru cyane. Ibi byose bizerekanwa bwa mbere mu Kansai Expo 2025 izabera mu Buyapani, aho abantu 1,000 bazahabwa amahirwe yo kugerageza iyi mashini.

Uko izakoreshwa n’ibyitezwe mu bihe bizaza

Hari ibiganiro byinshi by’uko iyi mashini ishobora kuzifashishwa mu bigo byita ku bageze mu zabukuru, mu bitaro cyangwa n’abakorera mu buryo butabaha umwanya uhagije wo kuruhuka. Kuri ubu kompanyi Science Co. irateganya kuyigeza ku isoko ryagutse nyuma y’imurikagurisha, ndetse no gukora verisiyo zikoreshwa mu ngo.

Nubwo igihe izagerera ku isoko n’igiciro bitaramenyekana, abantu benshi bamaze kwerekana amatsiko menshi ku mbuga nkoranyambaga, bamwe babifata nk’uburyo bushya bwo guhuza isuku n’iterambere, abandi bakabifata mu buryo bw’urwenya.

U Buyapani bwakoze imashini izajya yuhagira umuntu, imwumutse neza kandi imufashe kuruhuka neza mu minota 15 gusa

Ni imashini itegerejwe na benshi ku isoko