Itsinda rya Zuby Comedy ryatandukanye

Mu myaka ibiri ishize, ibikorwa by’aba bombi byagiye bitandukana, bituma bamwe bibaza niba koko bakigikorana cyangwa se baramaze gutandukana, nubwo bakomeje kugaragara ku rubyiniro nka Zuby Comedy mu bitaramo bitandukanye byabereye hirya no hino mu gihugu.

Mu kiganiro cyihariye na InyaRwanda, Seth yemeje ko we na Samu batagikorana, ariko ko Zuby Comedy nk’izina n’ikirango cy’ibikorwa byo bisekeje kigikomeje kubaho.

Ati: “Ntabwo nyikorana na Samu ariko Zuby Comedy yo iracyahari. Nitwa Seth Zuby Comedy, Samu akitwa Samu Zuby Comedy, ariko twe, ntabwo tugikorana.”

Uyu munyarwenya avuga ko gutandukana kwabo kwatewe n’uko batari bagifite intego zimwe mu rugendo rwabo rwa ‘Comedy’.

Ati: “Ntabwo muba mpuhuje inzozi. Abantu bibeshya ko ikintu gisenya amatsinda ari amafaranga, ariko siko bimeze. Ntabwo ari amafaranga, ahubwo ni inzozi.”

Seth avuga ko nubwo batagikorana nk’uko byahoze, iyo bahawe akazi bagahuriraho nk’itsinda, baragakora kandi bagahabwa ibihembo uko bisanzwe. Gusa ngo ibyo gukorana nk’itsinda rihoraho ntibikibaho.

Yagize ati: “Iyo duhawe akazi nka Zuby Comedy, njyewe na Samu turahura tugakora. Iyo bahamagaye, bahamagara Zuby Comedy, ntabwo baba bahamagaye Seth na Samu.”

Buri wese yakomeje ibikorwa bye ku giti cye

Nyuma yo gutandukana, Seth yatangiye gutegura ibitaramo birimo Iwacu Summer Comedy, ndetse yitabira n’ibindi nka Gen-Z Comedy. Yanatangije kompanyi ye bwite yise Lion Dreams, itegura ibitaramo bitandukanye.

Ku rundi ruhande, Samu we yatangije umushinga wihariye yise Comedy for Peace, nawo ugamije gukoresha urwenya mu guteza imbere amahoro n’ubumwe mu baturage.

Seth yasoje ashimangira ko nubwo batandukanye, batigeze bagirana ikibazo ku giti cyabo, ahubwo ko buri wese yiyemeje gukurikira inzozi ze.

Itsinda rishobora gute gukomeza kubaho nyuma y’uko abanyamuryango baryo batandukanye?

Abahanga mu mibanire no mu miyoborere y’amatsinda bagaragaza ko itsinda rishobora gukomeza kubaho nubwo abanyamuryango baryo batandukanye, bitewe n’impamvu zitandukanye:

Izina ry’itsinda nk’ikirango (brand): Iyo izina ry’itsinda rimaze kumenyekana, riba rifite agaciro nk’ikigo cyangwa ikirango cy’ubucuruzi. Kabone n’iyo abanyamuryango batandukanye, riracyakoreshwa mu bitaramo cyangwa ibikorwa bihuriweho.

Guhurira ku nyungu rusange: Hari ubwo abanyamuryango batagikorana bya hafi, ariko bagakomeza guhurira ku bikorwa byinjiriza itsinda, nk’ibitaramo runaka cyangwa amasezerano y’ubucuruzi.

Impamvu z’ubucuruzi n’amasoko: Abahanga bavuga ko abantu bashobora gutandukana, ariko ntibiteshe agaciro k’izina ry’itsinda ku isoko. Gukomeza kuryifashisha bifatwa nk’ubwenge mu bucuruzi.

Ubushake bwo gukomeza umurage: Nubwo haba habaye gutandukana, hari ubwo abanyamuryango bifurizanya amahoro, bakemeranya gukomeza kwita ku murage w’itsinda, rikabaho nk’ikintu bahuriraho igihe bibaye ngombwa.

Ibi bigaragarira no mu yandi matsinda mpuzamahanga nka Destiny’s Child, P-Square, cyangwa UB40, aho abanyamuryango batandukanye ariko izina ry’itsinda rikomeza kugaragara mu bikorwa by’imyidagaduro.

Umunyarwenya Seth yemeje ko yatandukanye na mugenzi we Mucyo Samson wamamaye nka Samu bakoranaga mu Itsinda rya Zuby Comedy

Seth yatangaje ko yatandukanye na mugenzi we Samu kubera ko batari bahuje intego

KANDA HANO UBASHE KUREBA IKIGANIRO TWAGIRANYE NA SETH