Mu rwego rwo gukomeza imyiteguro y'iki gikorwa, abagize Itorero Inkomezaruhimbi baherutse kwitabira ibirori bya Mango Festival and Pakistani Breakfast, byabereye ku Cyicaro cya Ambasade ya Pakistan mu Rwanda ku wa 20 Nyakanga 2026.
Muri ibyo birori, Itorero Inkomezaruhimbi ryasusurukije ababyitabiriye binyuze mu mbyino gakondo zigaragaza umuco nyarwanda, zashimwe n'abashyitsi batandukanye bari bitabiriye uwo muhango.
Aba babyinnyi bavuze ko kwitabira ibyo birori byari mu rwego rwo gukomeza kubaka ubufatanye n'inzego mpuzamahanga, kumenyekanisha ibikorwa by'itorero no gushaka abafatanyabikorwa bazabafasha gushyigikira gahunda zabo zo guteza imbere urubyiruko binyuze mu muco n'uburezi.
Ubuyobozi bw'Itorero Inkomezaruhimbi bwanagiranye ibiganiro na Ambasaderi wa Pakistan mu Rwanda, H.E. Naeem Ullah Khan, byibanze ku buryo impande zombi zakomeza ubufatanye mu bikorwa bigamije kuzamura urubyiruko.
Ambasaderi wa Pakistan yagaragaje ubushake bwo gukomeza gukorana n'Itorero Inkomezaruhimbi mu mishinga iteza imbere urubyiruko, anemeza ko azitabira ku mugaragaro Iserukiramuco "Tuganure Twubaka Umuco n'Uburezi", riteganyijwe ku wa 7 Kanama 2026, umunsi u Rwanda ruzizihizaho Umuganura.
Biteganyijwe ko iri serukiramuco rizaba ririmo ibikorwa bitandukanye bigamije kwimakaza umuco nyarwanda, birimo imbyino gakondo, indirimbo, imivugo, kumurika imideri ishingiye ku myambaro gakondo ndetse n'ibindi bikorwa by'umuco bizasusurutsa abazaryitabira.
Abategura iri serukiramuco bavuga ko rizahuza urubyiruko ruturutse mu bice bitandukanye by'igihugu, hagamijwe kurushishikariza gukunda umuco nyarwanda, gukomeza amashuri no kwitegura kuba abayobozi n'abubatsi b'ejo hazaza.
Banagaragaza ko iri serukiramuco rifite intego yo gushyigikira abana n'urubyiruko barererwa mu Itorero Inkomezaruhimbi, kugira ngo babashe gukomeza amasomo yabo no kubaka ejo hazaza habo.
Mu kiganiro yagiranye n'ubuyobozi bw'Itorero Inkomezaruhimbi, H.E. Naeem Ullah Khan yagaragaje ko ateganya kuganiriza urubyiruko ruzitabira iri serukiramuco ku mahirwe ari imbere yarwo, arusangiza inama zijyanye n'uburezi, iterambere n'akamaro k'ubufatanye mpuzamahanga.
Yanashimangiye ubushake bwe bwo gukomeza gushyigikira ibikorwa by'Itorero Inkomezaruhimbi no gukorana na ryo mu guteza imbere urubyiruko.
Ubuyobozi bw'Itorero Inkomezaruhimbi bwatangaje ko kwitabira Mango Festival and Pakistani Breakfast, no kugirana ibiganiro n'abadipolomate, by'umwihariko Ambasaderi wa Pakistan mu Rwanda, ari intambwe ikomeye mu rugendo rwo kwagura ubufatanye no gushakira urubyiruko amahirwe mashya.
Bwashimangiye kandi ko gukorana n'abafatanyabikorwa bo mu gihugu no hanze yacyo bizafasha kurushaho guteza imbere urubyiruko binyuze mu kwimakaza umuco, uburezi, ubunyangamugayo n'indangagaciro z'ubunyarwanda, ari na byo shingiro ry'ibikorwa Itorero Inkomezaruhimbi rikomeje gushyira imbere.
Itorero Inkomezaruhimbi igiye gukora iserukiramuco "Tuganure Twubaka Umuco n'Uburezi" rizitabirwa na Ambasaderi wa Pakistan mu Rwanda