Itorero Indinzi ryateguje igitaramo ‘Uruharazinyonga’ cyitezweho kugaragaza ubwiza bw’umuco nyarwanda

Iki gitaramo kizaba umwanya wihariye ku bakunda umuco nyarwanda, ariko kandi n’abo utaragera ku mutima kikazaba amahirwe yo kuwumenya, kuwusobanukirwa no kurushaho kwishimira umurage u Rwanda rufite.

Umuyobozi ushinzwe ubukungu n’iterambere ry’itorero Indinzi, bwana Ntwali Abdoulkarim, yabwiye InyaRwanda, ko igitaramo ‘Uruharazinyonga’ atari igitaramo cyo kwidagadura gusa, ahubwo ari umushinga ugamije gusangiza abantu ubutumwa bw’umuco, amateka n’indangagaciro byaranze u Rwanda.

Iri torero risobanura ko iki gitaramo kizibanda ku kwerekana u Rwanda nk’umubyeyi urera, urinda kandi uha imbaraga urubyiruko, kugira ngo rukomeze kuba igice cy’ingenzi mu kubungabunga umurage w’igihugu.

Izina ‘Uruharazinyonga’ rifite igisobanuro gishingiye ku ishusho y’u Rwanda rutatse ubwiza, rufite abana barangwa n’uburere, ubudasa n’ishema ry’igihugu cyabo.

Binyuze mu bihangano bizatangwa kuri uwo munsi, abitabiriye bazahabwa umwanya wo kwishimira ibyiza biranga u Rwanda no gusobanukirwa amateka aherekeje imwe mu mico n’imigenzo byarwo.

Itorero Indinzi ryavutse mu 2022, rikaba ryarahisemo izina rifitanye isano n’inshinga ‘kurinda’, risobanura kubungabunga no gusigasira ikintu kugira ngo kidatakara.

Ni igitekerezo gihura n’intego zaryo zo kurinda umuco nyarwanda, kuwuteza imbere no kuwugeza ku Banyarwanda n’abanyamahanga, baba abari mu Rwanda cyangwa abari mu mahanga.

Iri torero rigizwe ahanini n’urubyiruko, aho abarigize bagera kuri 90% ari urubyiruko, kandi bose hamwe barenga 100. Muri bo harimo ababyinnyi n’abandi bakora ibikorwa by’itorero ku buryo buhoraho, abaritorezwamo bakiri mu ntangiriro ndetse n’abakomeza kurishyigikira no kuribera hafi.

Kuba urubyiruko ari rwo rwinshi muri iri torero bigaragaza umwanya umuco ushobora kugira mu kubaka no guhuza abakiri bato, cyane cyane mu gihe ibikorwa by’umuco bishobora kubafasha kumenya inkomoko yabo, indangagaciro zabo n’amateka y’igihugu.

Ku ruhande rw’Indinzi, kubyina, kuririmba no kuvuza ingoma si ibikorwa byo kwidagadura gusa, ahubwo ni inzira yo kugeza ku bandi ibiranga Abanyarwanda no gufasha uwo murage gukomeza kubaho no guhererekanywa hagati y’ibisekuru.

Mu myaka ishize, Itorero Indinzi ryagiye rigaragara mu bikorwa bitandukanye birimo ubukwe, ibirori by’abantu ku giti cyabo, inama n’ibindi bikorwa bya Leta, haba mu Rwanda no mu mahanga.

Ibyo bikorwa byarifashije mu kugeza umuco nyarwanda ku bantu batandukanye, binyuze mu mbyino, indirimbo n’ingoma gakondo, ari na byo bigize zimwe mu nkingi z’umuco w’u Rwanda.

Igitaramo ‘Uruharazinyonga’ kizaba intambwe nshya mu rugendo rw’iri torero, kuko kizaba igitaramo cyaryo cya mbere bwite cyateguwe hagamijwe guhuriza hamwe abantu mu birori byihariye byahariwe umuco nyarwanda.

Aho gutaramira abantu mu birori by’abandi, kuri iyi nshuro Indinzi izaba ifite umwanya wo kwerekana igitekerezo cyayo mu buryo bwagutse, ihuza ibihangano bitandukanye mu gitaramo kimwe gifite insanganyamatsiko ihamye.

Mu bikorwa by’Indinzi byo kugeza ubutumwa bw’umuco ku bantu, harimo n’indirimbo ‘Rwanda’s Pride’ yakoranye n’abahanzi Yvan Ngenzi na Charles Mwafurika.

Iyi ndirimbo igaruka ku ishema ry’u Rwanda n’ibiruranga, ikaba imwe mu nzira iri torero ryifashishije mu gusangiza abantu ubutumwa bushingiye ku gukunda igihugu no kwishimira umwihariko wacyo.

Binyuze mu gitaramo ‘Uruharazinyonga’, Indinzi irateganya gukomeza urugendo rwo gukundisha abantu umuco nyarwanda, cyane cyane urubyiruko, no kwerekana ko indirimbo, imbyino, ingoma n’amateka ari umurage ukwiye kurindwa no guhererekanywa.

Ku wa 27 Ugushyingo 2026, muri Kigali Universe, abakunzi b’umuco bazahurira mu gitaramo kizaba umwanya wo kwishimira ibyiza biranga u Rwanda no kurushaho gusobanukirwa n’umurage warwo.

‘Uruharazinyonga’ ni ubutumwa bw’Itorero Indinzi buvuga ko umuco atari uw’abawusigiwe gusa, ahubwo ko ari umurage buri wese afite inshingano zo kumenya, kurinda no kugeza ku bazamukomokaho.

Itorero Indinzi ryateguye igitaramo cyaryo cya mbere bwite ryise ‘Uruharazinyonga’, kizaba ku wa 27 Ugushyingo 2026, kikazibanda ku kugaragaza ubwiza bw’u Rwanda binyuze mu mbyino, indirimbo, ingoma n’amateka y’umuco nyarwanda

Ryashinzwe mu 2022, Itorero Indinzi rigizwe n’abarenga 100, aho urubyiruko rugize 90% by’abarigize. Ryiyemeje gusigasira umuco nyarwanda, kuwuteza imbere no kuwugeza ku Banyarwanda n’abanyamahanga, haba mu Rwanda no hanze yarwo

Itorero Indinzi ryakoranye n’abahanzi Yvan Ngenzi na Charles Mwafurika mu ndirimbo ‘Rwanda’s Pride’, igaruka ku ishema ry’u Rwanda. Binyuze mu gitaramo ‘Uruharazinyonga’, iri torero rirateganya gukomeza gukundisha abantu umuco nyarwanda no kwerekana uruhare rw’urubyiruko mu kubungabunga umurage w’igihugu